أولا خالص تحياتى لأعضاء المنتدى اللى برجو منهم يشاركوا فى الموضوع ده اللى معظمنا بيعانوا منه .. بلاش السلبية بتاعة ندخل عشان نشوف معلومة مكتوبة ناخدها ونجرى وخلاص .. لأنك يوم ما بتحتاج معلومة وتطلبها ف موضوع بتتضايق لما تلاقى الناس تدخل تبص وتطلع من غير ما تكلف نفسها دقيقتين تكتب فيهم معلومة تكون عندهم ويكبروا دماغهم
ماحدش يزعل من الكلام بس للأسف ده بيحصل مع أعضاء كتير .. طبعا مش كل الأعضاء كدة .. فى ناس بتجتهد وبتكتب وبترد وبتفيد الناس ويستحقوا التحية بجد
ثانيا نيجى لموضوعنا :
أنا عربيتى أوبترا أوتو 2010 .. أنا تانى يد .. أول ما اشترتها غيرت كل حاجة (كل السيور - كل الزيوت - كل الفلاتر - البوجيهات - تنظيف الرشاشات والحساسات والمانافول) ماسيبتش حاجة
بالنسبة للزيوت أنا حطيت للموتور زيت ميجوين 5-30 (ليكوى مولى سابقا) وللفتيس الأوتو حطيت برده ميجوين ATF III ... الحقيقة بعد كل ده سحب العربية كان معقول جدا لكن سحب البنزين عالى شوية (170 كم/صفيحة) طرق سريعة وبطيئة
الصيانة الأخيرة: غيرت بوجيهات GM أصلى وجبتها من التوكيل بنفسى .. وغيرت الزيت وخليته (شل للموتور) و (موبيل ATF 320) للفتيس الأوتو ,, والحقيقة معدل التسارع بقى أضعف وسحب البنزين بقى أعلى (155 كم/ صفيحة) وبرده طرق سريعة وبطيئة .. للعلم كل ماسبق بالتكييف سواء بالزيوت الأولى أو التانية .. أديكم شايفين الجو النار اللى احنا فيه
طبعا كدة لا أداء العربية كويس ولا التسارع كويس ولا معدل سحب البنزين كويس ..
أنا كتبت تجربتى وياريت اللى عنده معلومة مايبخلش بيها وخلينا كلنا نستفيد من الموضوع ده لأنه أكيد مش أنا بس اللى بتابع الموضوع ده ومش أنا بس اللى عندى المشكلتين دول .. أكيد كلنا عايزين نعرف إزاى نخلى العربية تبقى خفيفة وسحبها حلو ، ونعرف إيه أفضل أنواع زيوت للموتور وللفتيس وتكون متوافقة مع مواصفات Dexron 6 ... وكمان مشكلة معدل استهلاك البنزين العالى ..
مع الشكر ،،،