أسباب ضعف السحب مع إستهلاك عالى للبنزين فى الأوبترا الأوتوماتيك

**lancer06** · 29-08-2015 09:38 PM

السلام عليكم ورحمة الله وبركاتة
مرحبا أخى الكريم
العربية ماشية كام كيلو
وهل لم بتعمل كيك داون صوت الموتور بيعلى مع تجميع بتحس أنو مخنوق
غيرت فلتر الهوا ونضفت البوابة
الرشاشات نضفتها قريب ولا لأ

**BraveHeart_13** · 29-08-2015 10:11 PM

المشاركة الأصلية كتبت بواسطة lancer06

السلام عليكم ورحمة الله وبركاتة
مرحبا أخى الكريم
العربية ماشية كام كيلو
وهل لم بتعمل كيك داون صوت الموتور بيعلى مع تجميع بتحس أنو مخنوق
غيرت فلتر الهوا ونضفت البوابة
الرشاشات نضفتها قريب ولا لأ

أولا شكرا لردك ولأسلوبك الراقى ..
ثانيا بالنسبة لأسئلتك .. العربية عاملة عالعداد 147 ألف كم ولكنى أشك إن العداد متغير قبل ما أشتريها لأنها موديل 2010 والحالة فابريقة وده دليل على إنه العداد حصل فيه تلف معين وتم تغييره بواحد تانى إستيراد كان عامل 130 ألف .. فبالنسبة للنقطة دى مش هنقدر نحددها بدقة .. وأنا ماقابلتش صاحبها الأصلى لأنى اشتريتها عن طريق وسيط
بالنسبة للكيك داون فهو كويس ولكن مش بنفس الإستجابة السريعة قبل تغيير الزيت ، وده طبعا بيدينى إحساس إن الموتور عالي ومخنوق نسبياً.
فلتر الهوا أنا مغيره من ألفين كم قبل تغيير الزيت .. ونضفت البوابة قبل تغيير الزيت والبوجيهات بألف كم.
أما الرشاشات فأنا مابنضفهاش عند حد لأنى بحس إن كلهم نصابين وبيبيعولنا الهوا وخصوصا مركز الصفا .. ولكنى بنضفهم عن طريق إضافة عبوة تنظيف الرشاشات "ميجوين" (ليكوى مولى سابقا) على تفويلة تانك بنزين كل 2000 إلى 3000 كم ، والحقيقة بقالى أكتر من 4000 كم ماحطتش ولا عبوة
أنا كدة جاوبتك على كل الإستفسارات عشان أكيد ليك هدف من معرفة المعلومات دى أولا
وبشكرك مرة تانية ..

**lancer06** · 30-08-2015 12:13 AM

السلام عليكم ورحمة الله
أنا تحت أمرك لو نقدر نفيد بعض بأى شىء مهما كان صغير لان دا الهدف من المنتدى أننا نساعد بعض

أنا سألت حضرتك العربية عاملة كم كيلو وحضرتك ذكرت أنها وقت ما أشتريتها كنت عاملة 130 ودلوقت عاملة 147 ودا بالنسبة لسنة الصنع رقم مش قليل ودا بيدى أحتمال أن اللى قبلك كان بيمشى بالعربية كتير وممكن كمان يكون من النوع اللى بيتأخر على العربية فى الصيانة الدورية ومن أهمها الزيت لأن زى ما حضرتك عارف الزيت حياة الموتور والفتيس

أسف على الإطالة فى الكلام

تعالى نفكر بصوت عالى
المشكلة من كلامك لاحضتها بعد ما غيرت زيت الفتيس المرة الأخيرة
يبقى حاول تقف هنا شوية
هل من الممكن أنك مشيت على الزيت وهو ناقص بعد مشكلة التسريب
وسؤل أخير هل بتلاحظ نتشة فى الغيارت كنك سايق مانيوال

**BraveHeart_13** · 31-08-2015 03:18 AM

المشاركة الأصلية كتبت بواسطة lancer06

السلام عليكم ورحمة الله
أنا تحت أمرك لو نقدر نفيد بعض بأى شىء مهما كان صغير لان دا الهدف من المنتدى أننا نساعد بعض

أنا سألت حضرتك العربية عاملة كم كيلو وحضرتك ذكرت أنها وقت ما أشتريتها كنت عاملة 130 ودلوقت عاملة 147 ودا بالنسبة لسنة الصنع رقم مش قليل ودا بيدى أحتمال أن اللى قبلك كان بيمشى بالعربية كتير وممكن كمان يكون من النوع اللى بيتأخر على العربية فى الصيانة الدورية ومن أهمها الزيت لأن زى ما حضرتك عارف الزيت حياة الموتور والفتيس

أسف على الإطالة فى الكلام

تعالى نفكر بصوت عالى
المشكلة من كلامك لاحضتها بعد ما غيرت زيت الفتيس المرة الأخيرة
يبقى حاول تقف هنا شوية
هل من الممكن أنك مشيت على الزيت وهو ناقص بعد مشكلة التسريب
وسؤل أخير هل بتلاحظ نتشة فى الغيارت كنك سايق مانيوال

تخمين حضرتك مظبوط ..
فعلا الزيت فضل ينقص نقطة نقطة على مدار عدة أيام لحد ما بدأت أحس إن الفتيس بينتش (كأنه بيهبد) عند التغيير من d إلى r أو العكس أو فى الغيارات بصفة عامة .. وبعدها بكام يوم روحت لمركز الصيانة عشان أشوف سبب الحكاية دى وطبعا إكتشفت الحكاية السابق ذكرها سلفا فى موضوعى وإن زيت الفتيس فى أدنى مستوى وطبة الزيت بتاعة الكارتيرة لما فتحناها نزلت زيت بس مش كتير يعنى ممكن نقول نصف الكمية اللى المفروض تنزل أو ربما أقل .. لكن حسب كلام المركز إن الحمد لله الفتيس سليم وإتلحق قبل ما يتحرق وتم عمل الصيانة وتغيير الزيت ثم موضوع تغيير الرادياتير .. لكن تخوفى هنا إن يكون الموضوع ده إتسبب فى عمل رايش جوه الفتيس !!