الموضوع: تجربتي مع لانسر شارك ٢٠١٥ بعد ٧٠٠٠ كيلو

بسم الله الرحمن الرحبم

انا سبب اني بكتب التقرير ده هو مجرد احقاق للحق مش اكتر و رأيي الشخصي في عربيه سمعت عنها كلام كتير زي لانسر شارك

اولا لو انت بتشتري العربيه بناء علي سمعة لانسر مكوه او بومه
فانصحك متغلطش غلطتي لانها مش زيهم اطلاقا
لا في جودة صاج و لا بويه و لا جوده خامات او جوده تقفيل
العربيه تقفيلها بصراحه من اسوأ العربيات اللي ركبتها في حياتي
للعلم انا ركبت ( سيراتو كوبيه ٢٠١١- لانسر ٢٠٠٣- نيسان صني ٢٠١٠ تقفيل مصري - فلوانس هاي لاين ٢٠١٢- فيكترا سي ٢٠٠٨ )
و بدون اي مبالغه و الله تقفيل الصني ٢٠١٠ برقبة الشارك ٢٠١٥ و لو حد فيكم شاف بعنيه و ركز هيعرف كلامي

طبعا العزل مش هتكلم فيه لان العربيه عزلها سئ جدا جدا جدا .... و لو مشيت بيها ٢٠ كيلو من غير ما تشغل كاسيت هتصدع

عفشة العربيه ناشفه و بتدبدب و ده طبعا ع عكس المفروض لان المالتي لينك المفروض طرية

الصاج ضعيف جدا جدا جدا اضعف صاج ركبته في حياتي و ان كنت متقبل ان كل الجديد صاجه ضعيف بس هي اضعف بمراحل عن ما كنت متوقع

البويه و ده عيب قاتل فيها لان بويتها ضعيفه اوي و من اقل خربوش بيجيب الصاج و ده طبعا ع عكس المكوه اللي كنت راكبها و دي لانسر برضو

الثبات و ده حاجه هي واخده فيه سمعه مش حقيقه اطلاقا العربيه فوق ال ١٥٠ ثباتها سئ و اقل مطب هوا هتلاقي العربيه رايحة جايه

فرامل العربيه مش قويه و مش ضعيفه اوي بس لازم كل ٣٠٠٠ كيلو ترجلش الفرامل الخلفيه و الا هتحس العربيه عجله بتفرمل من العجل الامامي بس

الكاوتش اللي نازله بيه طبعا مش محتاج اتكلم عنه لانه المفروض يترمي في الزباله

تكييفها قوي جدا جدا ( كان معايا خليجي ) و ان كان في بعض الشكاوي من الشرق اوسط

طامتها الكبري فب قطع غيارها غاليه ناااااااااااار و مش موجوده حتي في التوكيل الريداتير مثلا ب ٣٦٠٠ جنيه فلتر البنزين ٩٠٠ جنيه

الموتور كويس بس صوته عالي بس مش الضجه اللي معمولاله دي مهواش طياره خالص زي ما بيتقال موتور عادي تقيل تحت ال ١٠٠ الي حد ما و فوق ال ١٠٠ بيفوق شويه

الفتيس معمر بس بينتش و ده مش عيب فيه ده طبيعي لانه مش cvt

الملخص و نصيحه لوجه الله متشتريش العربيه دي عشان شايفها منتشره
جرب العربيه بنفسك لو عجبتك اشتريها متعملش زيي و تمشي ع السمعه

و ميتسوببشي بجد فشلت تماما في فئة السيدان اذا كان في الشارك او الاتراج عربيات ورق ورق ورق

و زي ما قولت لحضراتكم ده رأي شخصي

نصيحه كمان متسألش جروب عربيه عن عربيتهم لانهم عمرهم ما هيقولو وحشه
الحمد لله بيعتها بعد ٧٠٠٠ كيلو