العربية بتاعتي معايا بقالها سنتين أول أما جبتها غيرت فلتر زيت فتيس والزيت بس وقتها الميكانيكي قالي موبيل atf 320 ومن فترة قريبة عرفت إن زيت موبيل مش نفس مواصفة زيت الفتيس الموصى به من كيا وبيقلل العمر الافتراضي للفتيس لأنه مواصفته dexron مش sp iii.
بدأت أدور على نوع زيت كويس بالمواصفة atf sp iii ودا المكتوب في الكتالوج بتاع العربية وكان معايا صديق معاه كارينز 2011. المهم ربنا وفقنا ولقينا زيت ميتسوبيشي atf sp iii ودا نفس المواصفة بتاع الكيا والهيونداي ودا شكل العبوة:
http://nileup.com/up/uploads/nilemotors_14414306661.jpg
العبوة دي 5 لتر بتتباع في مراكز خدمة ميتسوبيشي وتمنها 325 جنيه وفي التوكيل في بنها كان سعر اللتر الواحد 130 جنيه وقالو إنهم بيغيروا 3.5 نص بس بالفلتر لكن ما طلبنا تغيير الزيت بالكامل قالو عاوزين مصنعية 1500 جنيه عشان يفكوا الفتيس وطبعا دا كلام مبالغ فيه جداً.
ملاحظة: الزيت دا ما ينفعش للسيراتو الشكل الجديد زيتها مختلف
كنا محتاجين للسيراتو والكارينز حوالي 14 لتر فجبنا 3 عبوات.
طريقة التغيير: (السيارة في وضع p)
1. فك طبة زيت الفتيس وتفريغ الزيت منها.
2. بعد التصفية، يتم فك كارتيرة الفتيس وفك الفلتر وتغييره بآخر جديد (تمنه 80 جنيه أصلي).
3. تنضيف الكارتيرة والطبه ويوجد بالكارتيرة من الداخل قطع مغناطيس يتم وضعها مرة أخرى عشان الرايش يعلق فيها.
3. وضع سيليكون على حرف الكارتيره (أنبوبة بـ 10 جنيه) سيليكون حراري لونه رصاصي.
4. تركيب الكارتيره بالمسامير الخاصة بها وربط الطبه.
ملاحظة: اللي خرج من الفتيس في التصفية دي لا يزيد عن 3.5 لتر يعني تقريبا لسه فيه قدهم جوه الفتيس
5. هانحط 3 لتر زيت فتيس من مكان مقاس زيت الفتيس.
بعد كده عندنا في الفتيس خارج خرطومين للريدياتير واحد داخل وواحد خارج:
في السيراتو خرطوم الخارج من الفتيس هو اللي تحت يتفك الخرطوم من الردياتير عن طريق أفيز
في الكارينز خرطوم الخارج هو اللي فوق تفك الخرطوم بتاعه من الردياتير برضه
6. يتم تركيب ماسورة رفيعة بخرطوم في خرطوم زيت الفتيس (المكيانيكي استخدم فلتر بنزين لانوس أو نوبيرا راكب في خرطوم عشان السن بتاعه هو اللي كان بيدخل في خرطوم الفتيس)
7. تشغل العربية، يبدأ يخرج الزيت القديم (المتسخ) ولما يبدأ يظهر الزيت الجديد تبطل وتركب الخراطيم والأفايز بتاعتها وتزود من فتحة مقاس الزيت 4 لتر إلا ربع زيت.
وبكده تم تغيير الزيت بالكامل.