- منحنى التضخم فى مصر من سنة 1960.
عرض للطباعة
- منحنى التضخم فى مصر من سنة 1960.
- من نظرة واحدة إلى الرسم البيانى (أعلاه) تجد انخفاض مستمر فى قيمة الجنيه المصرى.
- كل جيل يتولد يلاقى الأسعار غاليه نار فى وجهه.
- الجيل إللى يتولد سنه سبعين الأسعار أغلى عليه عن المواليد سنه ستين.
- الجيل إللى يتولد سنه تمانين يلاقى الأسعار أغلى عليه عن المواليد فى سنه سبعين وهكذا.
- إذا التضحم فى مصر حاجه طبيعيه لأن منحناه فى صعود دائم.
- هتلى فترة زمنيه التضخم كان فيه بيقل.
- تلاقى خمسين واحد دخلو دلوقتى بيقلك فى فترة عاطف عبيد.
- لا يا حبيبى منك ليه. الرسم البيانى (الدليل) بيقلك عكس ذلك.
- دائماً الجنيه المصرى قيمه بتقل.
- إذا فاالمتحاجج بالتضحم حجته واهيه.
- والدليل فى الرسم البيانى.
- طب والحل إيه؟؟؟؟؟؟؟؟؟؟
- وجود صناعه وطنيه قويه ترحمنى من الأستيراد بالدولار.
- ليه؟؟؟؟؟؟؟؟
- عشان فى طلب على المنتج الأجنبى. فيتم استيراده من الخارج بالدولار.
- هيأثر عليه فى ايه الأسيراد من الخارج (سؤال توضيحى للى ميعرفش)؟؟؟؟؟
- المستورد عايز يشترى الحاجه بالدولار من الخارج. يروح داخل البنك بايع الجنيه ومحوله دولارات ثم يرسله إلى الخارج لى شراء منتاجات لا يتم إنتاجها فى مصر. مما يؤدى إلى إنخفاض فى قيمه الجنيه المصرى وزيادة قيمه الدولار.
- والحل يتم تنفيذه الأن وبقوة لأول مره فى عهد الأب سيادة الرئيس/ عبد الفتاح السيسى.
- ممثلاً فى انشاء مصانع جديده.
- طب ده هيبقى حل جذرى للتضخم.
-لاء.
- وكانت النتيجه هو زياده فى سعر الدولار.
- لأن للأسف يتم شراء أشياء(بالدولار) لا يحتاجه الشعب مثل سيارات بى ام ومرسيدس + شيكولاته ................ أشياء لا تمس المواطن البسيط بى صله.
- والعمل.
- عايز تجيب يا حبيبى الشيكولاته والبونبونى السويسرى بتاعك من بره بالدولار.
- يبقى تشترى بقيمه الدولار الحقيقيه وهى لا تقل عن 12 جم.
- مش تروح تشترى الدولار مدعم بى 8 جم.
- طب والدولار المُدعم بى 8 جم. ضر البلد فى إيه؟؟؟؟؟؟؟؟؟؟
- كده كده الدولار بيغلاى طول ما فى استيراد من الخارج.
- يروح البنك المركزى داخل بيعه فى السوق عشان يقلل من صعوده أمام الجنيه المصرى.
- طب هل هينجح البنك المركزى المصرى فى الحفاظ على قيمه الدولار عند 8 جم.
-لاء.
- ليه؟؟؟؟؟؟؟؟
- لأن الدولارات إللى معاك هتخلص فى يوم من الأيام.
- وغصباً عن التخين قيمه الجنيه هتقل للأسباب المذكوره أعلاه.
- طب واشمعنى دلوقتى جيين يخفضه قيمه الجنيه.
- لأن الخليج مش هيديلك دولار واحد من هنا وجى وأنت مع نفسك.
- ليه؟؟؟؟؟؟؟؟؟؟؟
- انخفاض قيمه برميل البترول.
- وده يوضحلك القائمين على شئون البلد خايفيين عليها إزاى. مش أستاذ الفلزات إللى كان عايز يحيب قرض من صندوق النقد الدولى ويخفض من قيمه الجنيه المصرى بى نسبه 40% مرة واحدة (قتل الجنيه المصرى للأبد) ومش كده وبس ده كان موقع على حمايه الشذوذ الجنسى فى مصر + نشر الرذيله والحمد لله حطنا تجار الدين فى السجون وخلصنا.
- فلو استمر الوضع على ما هو عليه هيخلص الاحتياطى من العملات الأجنبيه.
- بس مع هذا القرار هيزيد.
- وتحيا مصر أم الدنيا هى قد الدنيا وهى كل الدنيا. رغم أنف أى إرهابى مُتاجر بالدين.
- وعامه النظرة المستقبليه للجنيه المصرى واعده ليه؟؟؟؟؟
- حاجات كتير من أهمها:-
+ أكتشاف بئرين للغاز الطبيعى تحت بعض فيهم لا يقل عن بى 90 مليار دولار غاز.
+ قناة السويس الجديدة.
+ المفاعل النووى فى الضبعه.
+ العاصمه الإداريه الجديدة.
- الرد على المبراراتى المنافق بمثال.
- من نظام هو بيحبه ويؤيده.
- نظام المُتاجر بالدين أردوغان.
- نبص على قيمه الدولار الأمريكى أمام الليرة التركيه.(الرسم البيانى المرفق)
- بالضبط قيمه الليرة هبطت 50% من قيمتها أمام الدولار فى الأربع سنين إللى فاته.
- وهو ده الحال الأقتصادى لأى نظام متاجر بالدين إرهابى.
- فكان قيمه الدولار الواحد بى ليرة ونص أما الأن فأصبح الدولار بى أكتر من 3 ليرة.
- ولا عمرنا هنشترى من الناس دى كلمه واحده أو نصدقها.
فعلا انخفاض الجنيه هيشجع السياحة قوي
يعني السايح بدل ما يدفع ٥ جنيه في عود القصب اللي بيمصمصه
هيدفع 10 جنيه
يعني دخل بياع القصب هيزيد بنسبة ١٠٠٪
تخيل بقى لو كل شاب اشترى بالفلوس اللي معاه فدان قصب
وسرح بيهم عالكورنيش
شوف هندخل دولارات قد ايه للبلد
انا متفق مع حضرتك في كل كلامك بس المستثمر الموجود بالفعل فيه نقطه صغيرة المواد الخام وباقي الالتزامات اجور وضرايب وحاجات تانيه كتير مش بيدفعها من جيبه الخاص دي بتيجي من مبيعاته لان العجلة بتكون دارت خلاص وفيه دخل داخله جزء منه ربحه والجزء التاني للمواد الخام وباقي التزاماته
خلينا بس نتفق ان أغلب المستثمرين كائنات عايشه على امتصاص الاقتصاد المصري
- المفروض المستثمر بيجي يدخل عملة صعبه يعمل بيها مشروع
- يشغل عماله لادارة المشروع
- المنتج جزء منه يسد العجز فى السوق المحلي
- باقي الانتاج يتصدر يدخل ليه وللبلد عملة صعبه
لكن اللي بيحصل عكس كده
- المشروع هيتكلف مثلا 100 مليون هيدفع هو من جيبه 10 - 15 والباقي هياخدهم قروض من البنوك المصرية
- بيشغل اقل عدد من العماله ممكنه وأقل عدد من ساعات التشغيل وبالتالي الانتاج اقل وبالتالي المنتج سعره باهظ الثمن
- الانتاج مش مكفي السوق المصري ومفيش فائض يبقى هيصدر ازاي يعني مفيش عمله صعبه داخله
طيب ايه الحل ؟
قانون صغير ايا كان اسمه حماية المستهلك أو تحديد هامش الربح
طبعا الحكومة متقدرش تصدر قانون زي ده لان المفروض ان شغلتها جذب الاستثمار والمستثمرين
اساسا الجهة الاصلية المنوط بيها اصدار القوانين هيا مجلس الشعب او النواب ايا كان اسمه
طيب القانون ده هيعمل ايه ؟
الباشا المستثمر اللى كان بيكسب فى الحاجه 200 و 300% والامثلة على كده لا تعد على تحصى زي الاسمنت و الحديد والسيارات و ......الخ
لو صدر القانون (وهو مش بدعه على فكرة ده مطبق فى اغلب الدول الراسماليه ذاتها ) هتنتهى تاني يوم الفوضى دي والناس هتحس بفرق سريع
- تاني يوم من تطبيق القانون هيحدث هبوط شديد لكافة الاسعار وده تأثيرة هيكون مباشر على تخفيض نسبة التضخم
- المستثمر عشان يزيد ربحه (ربحة مش نسبة ربحه) مفيش قدامه غير حل واحد هو زيادة الانتاج وده :
1- هيزود العماله يعني بدل ما كان عمال اقل فى وردية واحده هيبقى عمال اكتر فى تلات ورديات
2- بزيادة الانتاج هيتحول العجز فى السوق المصري لفائض للتصدير يدر ليه وللبلد عملة صعبه
في رأيي الشخصي الاقتصاد مش هيبدأ يتحرر والناس تبدأ تحس بحاجه ايجابيه واضحه وسريعه الا بالقانون ده
الفرصه فى ايدنا دلوقتي حالا ومش هتتكرر انتخابات مجلس الشعب أو النواب كمان اسابيع
احنا اللي نقدر دلوقتي نلزم المرشحين و احزابهم انهم يصدروا القانون بمجرد دخولهم المجلس
ملحوظه :
- مفيش قناة تلفزيونيه تقدر تتكلم عن الموضوع ده ( لان القنوات كلها مملوكه لراجال اعمال ومستثمرين ) ولو حصل وراحلهم ضيف واتكلم فى الموضوع ده مبيجيش ولا بيظهر فى قنوات تاني زي ما حصل مع الدكتور صلاح جودة
- فى الموضوع ده بالذات الحكومه متقدرش تصدر القانون ده زي ما وضحت قبل كده بس لو صدر نقدر نحاسبها على تطبيق
يعني الكورة فى ملعبنا احنا دلوقتي
ختاما البلد بلدنا كلنا لو وقعت هتقع على دماغنا كلنا مش هتقع على دماغ المؤيد وتسيب المعارض هتقع على الكل
خلينا بس نتفق ان أغلب المستثمرين كائنات عايشه على امتصاص الاقتصاد المصري ... اتفق معاك فى المجمل بالطبع ....
و اسمحلى لى بعض نقاط التوضيح ....
المنتج المصنع فى مصر .... حتى الان ... لا يرقى لمنافسة المنتج الصينى ... و مش حقارن بدولة كبرى فى الصناعة .... لسبب مهم ... غلو تمن المنتج المحلى بالمقارنة بجودته
غلو تمنه لاسباب ... منها الجمارك على الواردات .... و انخفاض جودته لاسباب كتيرة .. اغلبها فى نظامنا المصرى بصفة عامة ... فاغلب المنتجات محلية الصنع للاستخدام المحلى ... و ليست للتصدير
و عند التصدير لبعض الصناعات الغذائية و المحاصيل الزراعية .... العائد بالدولار بيرجع للمستثمر ... مش للحكومة ... و ان كان ده حيخف من على الحكومة شوية .... علشان المستثمر ده مش حيطلب دولار من الحكومة زى الاول
تكلفة المشروع ... ده يعتبر زى تشجيع للمستثمرين ... بمعنى ... ان الى معاه 10 مليون ... ييجى يقدم على المشروع الى عاوزه و انا ( كحكومة ) حساعده بالباقى .. لغاية لما يقف على رجليه و ينتج و يردلى القرض الى انا سلفتهولو ..... و ان كنت انا معترض على هذا النظام .... و لكنه يعتبر نوع من انواع التشجيع على الاستثمار
الانتاج الى بيتصدر مش بكميته ... على اد جودته ... و الجودة فى الانتاج المصرى ... منخفضة حبتين ... لاسباب كتير .. منها اننا معندناش حاجة اسمها جودة .... و ممكن تضيف الفهلوة المصرية المعتادة ... و الكسل ... و الاستخسار
قانون تحديد هامش الربح .....
الاول ..... احنا ماشيين تبع انهى نظام ؟؟؟؟ راسمالى ؟؟ و لا اشتراكى ؟؟ و لا من ده على ده ؟؟!!
لو ماشيين رأسمالى ... القانون ده يتعارض مع قوانين الرأسمالية ...
و اتمنى حضرتك توضحلنا ... ايه الدول الى عندها القانون ده و بتطبقه ازاى !!
لو ماشيين اشتراكى ... يبقى احنا مش محتاجين القانون ده علشان المفروض ان عندنا قوانين كتير بتحكم الاقتصاد ككل ... مش الصناعة فقط
لو ماشيين من ده على ده ..... و للأسف ده الى احنا ماشيين عليه ... والنظام ده احنا بنعانى منه من فترة طويلة و مش شايف فيه امل فى التطوير
و على اى حال .... لو انا مستثمر ... و اتقالى ان هامش ربحك لن يزيد عن 20 % مثلا بعد ما كان 50 % ... مثلا ... حسيب البلد دى و اروح استثمر فلوسى فى اى بلد تانية تعملى فلوس اكتر
انا متفهم وجهة نظر حضرتك .... اننا مش صح اننا نسيب المستثمرين براحتهم كدة ....
و لكن ... لو حضرتك ماشى على النظام الرأسمالى ... طلع قوانين تتماشى مع النظام ده ... زى قانون منع الاحتكار مثلا ... و الذى لم يكتب له الظهور للنور ... و هكذا فى بقية الانظمة الاقتصادية
اما عن اعضاء البرلمان ...... اتمنى من الله ... ان يخيب ظنى ... و نحصل على برلمان يعرف يجيب حقوق المواطن العادى ... الا ان تجربة الماضى .. تؤكد على اننا ماشيين زى ما احنا
فيه قاعدة بتقول ... المقدمات المتشابهة تؤدى الى نتائج متشابهة
و انا مختلف مع حضرتك فى موضوع د صلاح جودة ..... بس علشان اكون متأكد ... ده د صلاح جودة الملط ؟؟!! الى قالوا عليه ممثل الاتحاد الاوربى و بعدين نفوا هذا ؟؟!! ..... الراجل ده جات فترة ... كان بيطلع فى كل القنوات تقريبا .... كل ما اقلب المحطات الاقيه بيتكلم ... و بالفعل مش بيطلع فى الفترة الاخيرة
و بالطبع ... اؤيد كلام حضرتك ان الاقتصاد بيأثر على الكل ... سلبا و ايجابا
مستمتع بالحديث مع حضرتك .....
متابع معاك
أخي الكريم
مسألة جودة الانتاج ده طبيعي لانه مقلل المعروض وفي ظل زيادة الطلب فالمستهلك بيرضى بأقل جودة وكمان بيدفع فيها سعر اعلى من قيمتها بكتير
في انواع معينه من الملابس (الغاليه) مفيش عليها اقبال كبير فى السوق المصري فبتلاقي الجوده بتاعتها محترمه جدا وبتتصدر
عايز ابسطها مثلا انا عندي مصنع ممكن ينتج فى الشهر 4000 قطعه والسوق المحلي محتاج 2000 يعني النص والنص التاني ممكن اصدره
لو انا زودت على كل قطعه واحده 1 جنيه مثلا مكسب يبقى في الشهر صافي ربحي 4000 جنيه
نيجي للمصري الاصيل لما يشغل الفهلوه ويحسبها بطريقه تانيه يقولك وانا اشتغل واوجع دماغي ليه السوق محتاج 2000 انتج انا 1000 بس وبكده اضمن انه هيتباعو خطف ومحدش هيتكلم معايا في جوده وكمان انا اللى هحدد السعر بمكسب 4 جنيه فى القطعه الواحده يعني 4000 جنيه بربع المجهود ومحدش قدر يتكلم معايا فى جوده لان بالبلدي السوق عطشان
طيب لو صدر قانون هامش ربح واتطبق هيفضل الوضع كده ولا هيتغير ؟
قانون هامش الربح المفروض انه بيكون بند او مادة من مواد قانون حماية المستهلك
ودول كتير رأسماليه بتطبقه لما تحس ان في قطاع معين بدأ هامش الربح فيه يزيد عن حده
وعلى رأس الدول دي : امريكا - المانيا - فرنسا
ياريت كان المستثمر هنا فى مصر بيرضى بهامش ربح 50% مكنش ده بقى حالنا
فى قطاعات كتير بيتعدى فيها هامش الربح 100 - 200% زي مثلا الاسمنت لو اتحسبت تكلفته واضاف عليه هامش ربح معقول المفروض الطن يوصل للمستهلك ب 230 جنيه شوف حضرتك طن الاسمن بكام
العربيه الفيرنا لو حسبت تكلفتها مش هتتعدى 40 الف جنيه شوف بتتباع بكام
قيس على كده اغلب السلع
الدكتور صلاح جودة خبير اقتصادي بس بيقدر يبسط الاقتصاد بطريقه عجيبه وكان متبني اثارة قانون هامش الربح للرأي العام وكان كل ما يطلع فى اي حديث يتكلم عنه وبالتالي معدش بيطلع نهائي على اى قناه
غير جودة الملط رئيس الجهاز المركزي للمحاسبات السابق
لو البرلمان القادم اتشرط على اعضائه انهم يطلعو قانون هامش الربح بس يبقى كفايه
لانه لو القانون طلع واطبق كل حاجه " بدون استثناء " هترخص
في حاجات كتير أوي هتنزل لأقل من نص سعرها والباقي هيكون هبوط سعره حوالي 25%
كلام حضرتك جميل .... و انا موافق عليه بالطبع .... و لكن يبدو اننا نختلف فى وجهات العمل :)
مثال حضرتك عن الملابس انا متفق معاك فى اغلبه ... مثال حضرتك بيحكى ماساة السوق المحلى ... و انا عاوز اضيف فقط انى من الناس الى بتحاول تختار الجودة و القلة .. علشات ارتفاع السعر .... يعنى ... ممكن اشترى بنطلون واحد فى السنة بس يكون خامة كويسة ... و حشترى واحد فقط على اد فلوسى .... انا نوع من المستهلك موجود منو كتير اوى
و ابحث عن الجيد و لا اجد الكثير
فاضطر لشراء المستورد و الى فى الغالب بيكون مش غالى اوى اد ما هو بيكون جيد
و عذرا ... ما يدور فى بالى صناعات تانية خالص ... الصناعات المعدنية و المكملة ....حاجة زى الى بيسموه بالبلدى ... المكن الى بيعمل مكن
عندنا مشاكل كبيرة جدا فى صناعات الادوات الكهربائية نتيجة زيادة السعر و انخفاض جودة المنتج .. برغم احتياج السوق ... و الى بيحصل ان الناس بتشترى الصينى لأنه اجود و ارخص من المصرى
عاوزين مسامير معينة من خامات معينة ... مفيش ... و محدش عاوز يتعب نفسه و يصنعها و لا يدور على السبيكة بتاعتها
حضرتك لو اتفرجت على دولاب عدة مصرى و اخر تايوانى مثلا .. فرق السما عن الارض ... و مش حقولك كمل فى العدد اليدوية ... علشان مش حتلاقى صناعات مصرية خالص
حتى الخامات ... الالومنيوم و النحاس و الحديد ...و المصنعين فى مصر كخامات ... رديئة بالمقارنة بالمستورد ...
انا عاوز اقول ان مثال حضرتك عن الملابس ... و ان كنت متفق معاه ... بس مش ده كل حاجة
مثال حضرتك ان ممكن تعمل مصنوعات بجودة عالية بس الناس هى الى مش عاوزة ... انا بدى حضرتك مثال ان الناس مش عارفة تطلع منتج كويس .. و استسهلوا الوضع و ده الموجود اذا كان عاجبك
و عذرا .... ياريت حضرتك تشرح اكتر عن تطبيق هذا القانون فى امريكا تحديدا ... علشان على حد علمى و خبرتى القليلة .... مفيش قوانين يلتزم بها الصانع تجاريا غير منع الاحتكار ...... فيه قوانين تانية بيلتزم بها صناعيا و عماليا
فى امريكا .... اشترى الى انت عاوزه ... بالسعر الى انت عاوزه ... و بيعه مرة اخرى بالسعر الى انت عاوزه ...
يوم 11 سبتمبر بالليل ... سعر جالون البنزين وصل ل 5 دولار ... و الناس كانت بتشترى و تعبى فى براميل كبيرة ... و محدش قال للمحطات الى بتبيع انتى بتعملى ايه !!!! قعدوا يقولوا اى كلام فى الجرايد و التليفزيون ... و حنقفلكوا المحطات و حنوقع عليكوا غرامات .. و اصحاب المحطات و لا همها .. فضلوا يبيعوا ب 5 دولار للجالون لغاية لما بنزينهم شطب
للعلم .... الجالون كان ب 1.33 دولار
و فى صناعات زى الاسمنت و الحديد و السيراميك ... ايوة انا متفق مع حضرتك
و لو القانون ده طلع نصا ... انا بقول لحضرتك ان اغلب المستثمرين حيخلصوا اعمالهم و يمشوا من مصر .. علشان فيه دول تانية حتدينى هامش ربح اعلى ... ايه الى يقعدنى فى مصر ....
و فيه حاجات .... لو هامش ربحها مش عالى ... متستاهلش الشغل فيها ... ده رأى اغلب التجار .. ايه الى يخلينى اشتغل فى سلعة ... صناعة او تجارة ... ازا كانت مش جايبة همها ؟؟!!
و ازاى تضمن ان المستثمر مش حيقلل من جودة السلعة او من اجر العمال علشان يحافظ على مكسبه ؟
انا معترض على صياغة القانون بالشكل ده .... و لكن ممكن نحط قوانين تانية نحاول نظبط بيها الموضوع ده و بطرق اخرى
متابع معاك
آسف على تأخر ردي
اولا : انا عايز اوصل لحضرتك نقطه صغيرة " في اي مجال " طالما حضرتك اشتريت منتج مستورد معنى كده ان فيه عجز بين الاستهلاك والانتاج المحلي ( المنتج المحلي اقل من الاستهلاك )
كون ان المستورد ارخص أو اجود من المحلي فده نتيجه طبيعيه لان المنتج ( الصانع ) المحلي وصل لمرحلة الاشباع وطالما هو باع انتاجه ميهموش بقى نقطة المنافسه سواء بالسعر او الجودة وبالتالي بالطريقة اللى احنا ماشيين بيها دي يبقى كله رايح فى داهيه سواء المستهلك او المنتج
مثال بسيط : واحد سواق تاكسي طالع من بيته يشتغل وعايز يرجع ب 200 جنيه أول ما طلع من بيته لقى سائح بيشاورله عايز يروح مكان قريب راح موصله فى اقل من نص ساعه وناصب عليه وواخد منه 30 دولار
سواق التاكسي بعدها هيكمل شغل ؟ لا طبعا هيروح بيته ( خلاص جبرت )
طيب لو معرفش ينصب على حد ؟ هيفضل يشتغل لحد ما يكمل الفلوس اللى هو محتاجها
موضوع هامش الربح انا شايف ان حضرتك بتناقض نفسك فيه
اولا : الكلام عن تحديد حد اقصى لهامش الربح وطبعا ده بيختلف من صناعه لاخرى محدش اتكلم عن تحديد نسبه للربح
ثانيا : بالنسبه للمستثمر ( واغلب المستثمرين اللى فى مصر ليهم استثمارات كتير بره مصر واقدر اعدلك منهم كتير اوي) ماشيين بره زي الالف ومبيجوش يستهبلو غير هنا في مصر بس
ثالثا : مسألة الجوده واجر العمال لو فيه قانون هامش ربح هيتحسنوا بدون شك لانه عشان يحافظ على مكسبه لازم يزود انتاجه فمحتاج عماله أكتر (زيادة فى طلب العمالة) ومع زيادة الانتاج هيبقى في منافسه لازم هيبقى فيه تحسن للجوده لتعزيز التنافسيه فى ظل زيادة الانتاج وتناقص العجز
رابعا : حضرتك حضرتك قولت فى امريكا بتشتري بالتمن اللى انت وتبيع بالتمن اللى انت عايزه وفي السطر اللي بعده انت بنفسك بتقول لما حصل ظرف طارئ وبعض اصحاب المحطات استغلوا الازمه الحكومه هددت بالتدخل بالرغم انها الحكومه كانت مشغوله بمصيبه اكبر وكان وضع مؤقت استمر ساعات مش سنين زي هنا
خامسا : تقدر حضرتك تتأكد من حلقات الدكتور صلاح جودة اللي اتكلم فيها عن تدخل بعض الدول " الرأسمالية " فى جشع بعض المنتجين والزمتهم بحد اقصى لهامش الربح واتكلم بالتفصيل الشديد في دولة كذا سنة كذا ادخلت الدوله وخفضت هامش الربح من كذا لكذا أكتر من واقعه بتفاصيلها تقدر حضرتك لو مش مصدقني تتأكد بنفسك
تحياتي
قوانين الاقتصاد المصري محتاجها ومحتاج تفعيلها
منع الاحتكار
تحديد نسبة الربح الصافي
تعدد الوكلاء
و لا يهمك ... انا قلت اكيد حضرتك بعيد عن الانترنت فى نهاية الاسبوع .. حمدا لله على السلامة
النقطة الى حضرتك عاوز توصلهالى انا مقتنع بيها ... كجزء .... مش كل حاجة ... و اسمحلى اضيف لكلام حضرتك حاجة صغيرة ....
طالما انا اشتريت المنتج المستورد فهناك عجز ... احيانا فى الكمية ... و فى الغالب فى الجودة
و بالفعل ... انا مقتنع بكلام حضرتك ان فيه مستثمرين مش عاوزين يطوروا ... و لا يطمحون فى اكثر مما فى ايديهم و . و ده مش فى كل الصناعات ...
بعض الصناعات لازم تطور فى جودة المنتج نفسه و الا حتموت ان عاجلا او اجلا .... و بالطبع انا متفق مع حضرتك ان ده امر سيئ ... و ان لم يتم تغييره ... فالصناعة المصرية مصيرها للزوال
و مثال حضرتك عن سواق التاكسى صحيح تماما ... طالما هو معندوش خطط و تطوير و طموح انه يتوسع و يكبر
و ده مينفعش فى التصنيع
ياريت حضرتك توضحلى انا بناقض نفسى ازاى فى موضوع هامش الربح !!!!!
اولا .... حضرتك لم تذكر فى مواضيعك السابقة .... الكلام عن تحديد حد اقصى لهامش الربح .... حضرتك اتكلمت عن ... تحديد هامش الربح ... حضرتك ذكرت ده فى المشاركة رقم 56 ..و رقم 58. و عذرا ... فيه فرق كبير بين ... تحديد هامش الربح .. و تحديد حد اقصى لهامش الربح ... و اعتراضى ليس بالكثير على موضوع تحديد حد اقصى لهامش الربح
ثانيا ... ياريت حضرتك تقولنا على المستثمرين الى بيشتغلوا برا ... علشان نعرف و نزود معلوماتنا .... و فى البلاد المحترمة ... فيه قوانين منع الاحتكار ... و ده حيخلى كل المستثمرين يمشوا زى الالف .. و الا حيخسر
ثالثا ... حضرتك بتتكلم فى جزء من الصناعة .. و خلى بال حضرتك من حاجة .... الماكينة هى الى بتحدد عدد العمال الى حيشغلوها ... مش العكس ... و الاتجاه العام فى الصناعة ... الاتجاه لتقليل عدد العمال على قدر الحاجة
يعنى الماكينة الى كانت بتعمل 4 حركات زمان ... دلوقتى بتعمل 10 حركات ... و بتحتاج واحد او اتنين علشان يشغلوها ... و هكذا
و مفيش علاقة بين زيادة عدد العمال ... و اجر العامل
و بالفعل التنافسية حتخلى فيه طلب لتطوير الجودة
رابعا .... انا جبت سيرة الحكومة ؟؟؟!!!! راجع الى انا كتبته ... لم اذكر الحكومة ... و عذرا على عدم توضيح ما ذكرته ... انا ذكرت .... قعدوا يقولوا اى كلام فى الجرايد و التليفزيون .... من ذكروا هذا هم الصحفيين و بعض الجمعيات الاهلية ...
و انا سألت احد اصحاب محطات البنزين على الكلام الى فى الجرائد ده .... و هو لبنانى الاصل ... فقالى محدش يقدر يعملهم حاجة .... علشان قوانين التجارة واضحة و صريحة ... ابيع باى سعر انا عاوزه ... و هو كان عنده محطتين ... بيبيع فيهم باسعار متفاوتة .... على حسب المنطقة .. و على حسب المنافسة
و بعدين الازمة دى قفلت امريكا 3 ايام بلياليهم .... و بعد ما فتحوا تانى بن لادن اذاع خطاب صغير .... راحوا مكملين باقى الاسبوع قافلين
خامسا ... انا مصدق حضرتك بالفعل فى موضوع الدكتور صلاح .... بس كنت عاوز اعرف من حضرتك الملخص .. علشان النت عندى ساعات كتير بيكون ضعيف جدا ... و قافلين اليوتيوب فى الشغل
متابع معاك
الموضوع أتقال فيه كلام كتير و للأسف مش هلحق أقراه كله..
بس لفت أنتباهي من المقتطفات اللي قريتها كلام عن التضخم و الأستعانة بمنحنى الConsumer price index لفترة 60 سنة و الأستشهاد بأتجاه المنحنى على التضخم و غلو الأسعار و ان دي حاجة وحشة..
هو طبيعي ان المنحنى يكون متصاعد كده لأنك بتتكلم على time frame واسع و عدى عليه فترات كتير من النمو الأقتصادي, فده ميعتبرش دليل على ضعف أقتصادي أو حاجة,,
للعلم بس, مفيش نمو أقتصادي في الدنيا مبيكونش مصحوب بنسبة تضخم. و التضخم في حد ذاته بيعتبر من العلامات الصحية للنمو, بس ده لما بيكون في حدود الـHealthy rate اللي هو حوالي 2%.
و للأسف مصر خلاص تعدت مرحلة الInflation "الصحية" و دخلت في الـHyperinflation "الغير صحية" أو ممكن كمان تبقى Stagflation اللي هو كساد تضخمي, و وصلنا دلوقتي تقريباً لمعدل 10-11%..
ده منحنى الـCPI بتاع أمريكا لنفس مدة الـ60 سنة و نفس المنظر تقريباً,
فالعبرة هتكون لما تجيبلي منحنى بـIntervals قصيرة تقدر تخليني اشوف اتجاه و سرعة الحركة..
http://cdn.tradingeconomics.com/char...31&type=spline
نقطة تانية لفتت أنتباهي, هي تخيل هامش ربح خزعبلي و من ثم الأعترض عليه, و المشكلة أن الرقم التخيلي ده كان على صناعات ثقيلة زي الحديد اللي بتتميز بتكاليف أنتاج و Overheads عالية جداً و دورة أنتاج طويلة جداً بتسبب بتحقيق خساير في بعض السنوات لحين بداية تحقيق مبيعات, و في الحالة دي هامش الربح مبيقربش حتى من 10-15%..
في أمثلة كتير على مستثمرين بيصدروا و بيشتغلوا بره مصر و بالأخص في منطقة شمال أفريقيا زي ليبيا و الجزائر, و دول الشرق المتوسط زي العراق,,
في مستثمرين مصريين نطاقهم الجغرافي وصل لأبعد من أفريقيا و الدول العربية و وصل للغرب زي أوربا و أستراليا..
خلينا نتفق في نقطه طول ما في عجز في الانتاج ( الكميه ) لازم هيبقى في هبوط في الجودة
في وفره فى الانتاج ( مفيش عجز + فائض ) ====> يؤدي الى زيادة المنافسه (لتعدد الخيارات امام المستهلك) ====> تؤدي الى زيادة الجودة وهبوط سعر المنتج
مثال التاكسي انا مقدرتش اوصل لحضرتك الفكرة كويس
المستثمر لو زود انتاجه هيقلل العجز في السوق وبكده هتزيد المنافسه وهيبقى مضطر انه يزود جودته ( جهد أكبر ) وكمان يقلل سعر المنتج
المحصله النهائيه هتكون جهد أكبر ونفس الربحيه
بيحسبها يقولك ( انا اوجع دماغي ليه ) انا احافظ على النظام زي ما انا بنفس الانتاج وهامش الربح وباقي وقتي وجهدي استثمره فى الدخول لمجال تاني وتالت
نيجي للنقط الل حضرتك اتلكلمت عنها :
اولا : انا بعتذر عن خطئي بذكر تحديد هامش الربح في جمله او اتنين سهوا هيا " تحديد حد اقصى لهامش الربح "
بمعني انك حضرتك كمنتج (صانع) ميتعداش هامش ربحك 40% مثلا ده السقف
عايز تبيع ب10% بيع تبيع ب30% برحتك تبيع ب 20% ليك مطلق الحريه طالما لم تتعدى السقف
لانه طبقا للقانون الحالي : لا يجوز لأية جهة إدارية التدخل في تسعير منتجات الشركات أو تحديد ربحها، وبخلاف ذلك وفقاً لقانون حماية المنافسة وفي ظروف استثنائية تتعلق بالمصلحة العامة، يجوز بقرار من مجلس الوزراء تحديد سعر بيع منتج أساسي أو أكثر ولكن لفترة زمنية محددة وبعد أخذ رأي الجهاز
ثانيا المستثمرين : انا مكنتش أقصد المصريين على وجه التحديد انا كنت أقصد المستثمرين بشكل عام سواء مصريين او عرب أو اجانب
لكن لو حضرتك عايز تعرف اسماء المصرين المستثمرين بالخارج اذكر لحضرتك بعضهم :
طبعا عائلة ساويرس ( اللي طلع نجيب ساويرس من كام يوم على محطات اجنبيه يقول انا استثماراتي الحديثه فى مصر صفر ) - ابو العنين بتاع السيراميك - خميس بتاع السجاد - نصير بتاع السلاح - شفيق جبر بتاع شركات ارتوك - رشيد محمد رشيد اللي كان وزير الصناعه وغيرهم كتيير
قانون منع الاحتكار برة محدش محتاج يطبقه لان بره في منافسة حقيقة مش زي هنا
هنا لو حد حب ينافس بجد بيقعدوا معاه فى الغرفه التجاريه ويعقلوه لو مكنش كده بيعرفوا ازاي يتجمعو عليه ويلجموه بوسائلهم الخاصه
وابسط مثال من كام اسبوع لما احد الوكلاء حب ينزل عربيه لادا بسعر منافس ايه اللي حصل ؟
في نقطه تانيه قانون الممارسات الاحتكاريه صعب تنفيذة لانك عشان تنفذه يبقى فى نوع من الردع (عقوبة) وعشان يبقى فيه عقوبه يبقى في ممارسه احتكاريه ( القانون لا يجرم الاحتكار ولكن يجرم الممارسه الاحتكاريه ) يبقى لازم فيه اتفاق بين المنتجين على الممارسه وده هتقدر تسجله ازاي عشان تصدر العقوبه ؟
على افتراض اننا رصدنا الممارسه والاتفاق وحولناهم للمحاكمه ومكنش في اي ثغره قانونيه ينفذ منها محاميهم وده طبعا لن يصل الي 1% من الممارسات الاحتكاريه عارف العقوبه ايه ؟
القانون محدد غرامة من 1 الي 12 %
هو اساسا كسبان 100 - 200%
انا مش عايز اعلق علق انت
ثالثا العماله والانتاج والماكينه : الماكينه ثابته احنا بنتكلم على زيادة الانتاج(كعنصر متغير) يافندم
بمعني لو انا عايز ازود انتاجي بدل ما كنت بشغل المصنع ورديه واحده هشغله تلات ورديات يعني ضاعفت العماله 3 مرات فى المصنع (المباشرة) وبالتالي العماله الغير مباشرة هتضاعف برضو ( زي الموزعين والبياعين وكمان اللي باخد منهم الخامات و ....الخ)
وبالتالي لو قلت البطالة هتتحسن ظروف وراتب العمال بعد ما كنت بتجيب العامل تشغله بدون تأمينات او اي التزامات وبراتب صغير لانه مش لاقي عمل
لكن لو أصبح فيه زيادة طلب على العمال هيبقى في عروض افضل ورواتب اعلي ( عرض وطلب - فائض وعجز)
رابعا : انا رجعت لكلام حضرتك ان ذكر فى الجرايد ان هيتقفل المحطات وهيتوقع عليهم غرامات ده يا فندم اختصاص الحكومه مش الصحفيين ولا الجمعيات وهناك محدش يقدر يظيت زي هنا ويطلع يقول اي كلام لانه هناك لو كلامه مش قانوني كان اترفع عليه قضايا تعويض خربت بيته واتقفله الصحيفه دي
هناك النزين فعلا فيه تفاوت فى الاسعار داخل المدينه أغلى من الاطراف بفرق واضح لان هناك البترول بالسعره غير مدعم زي هنا
خامسا : انا دورت لحضرتك بسرعه ولقيت فيديو صغير اتكلم فيه عن الحد الاقصى لهامش الربح وضرب مثالين لتطبيقه فى امريكا وفرنسا
https://www.youtube.com/watch?v=-2wmCmlfQSs
اختلافنا فى بعض الخبرات ... و كما ذكرت لحضرتك فى وجهات العمل ....
و فيه اختلاف تانى بسيط .... حضرتك بتثبت كل العوامل ... و بتسمح بتغيير عاملين فقط ... مثلا زى ما حضرتك ذكرت .. زيادة الانتاج و الجودة ..... زيادة الانتاج و زيادة مرتبات العمال
الجملة الى حضرتك ذكرتها مش دائما صح ....هى فى اغلبيتها صح .... و لكن انا مش حعممها ... بمعنى ...
وجود نقص فى المعروض فى السوق من سلعة معينة ... مش شرط خالص على عدم جودتها ... و العكس صحيح ....
و لكن .. دعنا نتفق فى هذه النقطة علشان منفتحش مواضيع جانبية كتير
المحصلة النهائية من رفع الجودة .... جهد اكبر و نفس الربحية ... انا معترض قليلا على هذه النقطة .... مينفعش تبذل جهد اكبر و تحصل على نفس الربحية فقط .... ممكن نفس الربحية مع فتح اسواق جديدة ... نفس الربحية مع اكتساب خبرة معينة و هكذا ....
و انا متفق مع حضرتك تماما ان الناس مش بتحب توجع دماغها و تتعب نفسها ... و دى احد الحاجات الى موصلانا للى احنا فيه
اولا ...تحديد سقف لهامش الربح ... انا مش معترض عليه بنفس الدرجة الى منت معترض بيها على تحديد هامش الربح .... و لكن ... لازلت عندى بعض نقاط الرفض .... منها .... ازاى حضرتك حتحسب هامش ربحى .... علشان تحطلى سقف لا اتخطاه ؟؟!! ده سؤال استفهامى ... مش استنكارى :)
ثانيا ... انا مش حعلق طبعا على القانون الغريب بتاع الممارسة الاحتكارية .... و لنا فى احمد عز خير دليل و برهان و حكايته مع حديد التسليح
ثالثا .... اتمنى من كل قلبى ان المصانع كلها تشتغل 3 ورديات ... 24 ساعة ... و لكن مش كل المصانع حتقدر تعمل كدة
و بالطبع اتفق مع حضرتك فى رسم مستقبل العمال و زيادة عددهم و مع زيادة الانتاج و المحافظة عليه زيادة مرتباتهم و هكذا ... و علشان ده يتحقق لازم يكون عندنا مصانع تستوعب كم العمالة الموجودة ... اتمنى هذا فى يوم من الايام
رابعا .... للأسف ... انا كنت محتفظ باعداد من الجرائد الى كانت فى الفترة دى ... كنت صورتها لحضرتك ....
الكلام الى حضرتك بتقوله ده مش مظبوط .... و انا اؤكد لحضرتك ما قلته ..... ما تم نشره من اتهامات و تهديدات لأصحاب المحطات ... كان من بعض الجمعيات الاهلية ... و رأى بعض الصحفيين فقط ... و لم تتم محاسبة اى من اصحاب محطات البنزين ... و الكلام ده انا واثق منه
و شركة موبل ... هى الشركة الوحيدة الى بعتت رسالة لكل مالكى المحطات المتعاقدين معاها ببيع البنزين بنفس السعر ... مع وعدهم بامدادهم المستمر بالبنزين .. و ده موضوع تانى ممكن نتكلم فيه لاحقا
خامسا ... اشكر حضرتك على الفيديو ده ... الى اتفرجت عليه على 3 مرات !!!! لضعف الانترنت
هو ده د صلاح جودة الى كنت اقصده ... مش صلاح جودة الملط الى ذكرته ....
الراجل ده اول واحد اشوفه بيتكلم ببساطة و سلاسة و بالفعل كلامه على قدر كبير من الاتزان ....
و لكن اعتب عليه فى الاتى .....
اول ما ظهر ... كتبوا انه مندوب اومستشار او ليه علاقة مباشرة بالاتحاد الاوربى ... مش متذكر بالظبط ... و بعدين الاتحاد الاوربى نفى تماما
احيانا بيفرض فروض مش صحيحة .. و يكمل عليها استنتاجه ... و يصل لنتيجة صحيحة بالنسبة للفرضية الخاطئة ... فبالتالى النتيجة تكون خاطئة
بالنسبة لحديثه عن فرض امريكا لسقف للاسعار ....
الكلام ده كان سنة 1974 !!!! و انا دورت على النت على الموضوع ده و لكن لم اصل لآى شيئ بخصوص هذا الموضوع ... كل النتائج كانت على فضيحة ووترجيت .... اثار حرب فيتنام ... فصل الدولار عن الذهب .. التقدم الاقتصادى اليابانى ..
ياريت لو حضرتك عندك نتائج بحث .. اكون شاكر جدا لحضرتك لو اطلعتنى عليها
اما عن فرنسا ... سياستهم غريبة جدا .... لسة من اسبوعين تقريبا .. الفلاحين الفرنسيين كانوا عاملين مظاهرة بالجرارات الزراعية فى باريس ... علشان عاوزين الحكومة الفرنسية تفرض رسوم على الواردات الزراعية زى ما عملوا فى فترة سابقة !!!!
مستمتع بالحديث مع حضرتك
متابع معاك
كل سنة و حضرتك طيب ...
الحمد لله النت اتصلح اليومين الى فاتوا دول ... و بدأت فى عملية البحث مرة اخرى و وجدت الاتى ....
Nixon's Biggest Gamble, 40 Years Ago Today | Stan Collender's Capital Gains and Games
مقال ظريف بيتكلم بالعموم ايه الى عملوا نيكسون ... و بيصف الى عملوا ده بأكثر عمل متطرف فى تاريخ الاقتصاد الامريكى ... Richard Nixon implemented the most radical economic program in American history
متطرف هى الترجمة الحرفية لكلمة radical
راجع حضرتك المقال الصغير ده .... و ذكر فيه ان سياسة الاجور و التحكم فى الاسعار تفككت ( انتهت ) فى عام 1974
Nixon Imposes Wage and Price Controls
ده مقال لكلمة نيكسون نفسه .... و ذكر ف اخره سبب ارتفاع اسعار المحاصيل الزراعية ....
Richard Nixon: Address to the Nation Announcing Price Control Measures.
و ده مقال تانى .. يذكر بعض التفاصيل ... و ان دى اول مرة الحكومة تفرض قيود على الاسعار فى غير اوقات الحرب
Nixon Ends Convertibility of U.S. Dollars to Gold and Announces Wage/Price Controls - A detailed essay on an important event in the history of the Federal Reserve.
و ده مقال بيتكلم اكتر عن فترات الحروب و ما تبعها من تضخم و اتجاه حكومة امريكا لتحديد الاسعار
و دى حاجة من الويكيبديا ... بتدى امثلة على التحكم فى الاسعار ..... و تذكر هذه الجملة فى نهاية الفقرة المتعلقة بامريكا
Since that time, the U.S. government has not imposed maximum prices on consumer items or labor
https://en.wikipedia.org/wiki/Incomes_policy
و ده مقال تانى من الويكيبديا
https://en.wikipedia.org/wiki/Nixon_Shock
و ده مقال فى السريع كدة
Remembering Nixon's Wage and Price Controls | Cato Institute
المختصر .....
امريكا كان عندها تضخم .. و فى بعض المقالات ذكر احد اسبابه و هو منافسة المنتجات اليابانية و الالمانية لمثيلتها الامريكية
ذكر المقال ان الحكومة فرضت تحكم فى الاسعار فى الحروب ... العالمية 1 ... العاالمية 2 ... فيتنام .. كوريا
خطة نيكسون عملت نجاح فى بدايتها ... و فشلت بعد كدة .. و فيه بعض المقالات ذكرت هذا ببعض التفصيل
يعنى كلام الدكتور صلاح ... ان التجار عملوا كارتلة احتكار موجود للقصة دى و زودا اسعار السلع الغذائية و هامش الربح وصل 82 % ... و امريكا حددت هامش الربح 20% !!!!!! مش مظبوط .. على حسب ما توصلت اليه من معلومات
و اتمنى من الاخوة ان يبحثوا فى هذا الامر ... فانا لم اجد ان هذا الكلام مظبوط .. و لم اجد النسب المئوية دى مذكورة ... الى يجدها يا ريت يوضحلنا .. و انا اكون شاكر جدا لزيادة معلوماتى
متابع معاك
اولا كل سنه وحضرتك طيب
وثانيا مبروك لرجوع النت
حضرتك احنا بنتكلم عن حاجه وكل المقالات بتتكلم عن حاجه تانيه
وبرغم طولهم المفرط مفيش مقاله او رابط واحد انا فتحته بيتكلم عن هامش الربح
كلها بيتكلم عن انظمه وسياسات اقتصاديه مفيش حد فيهم جاب سيرة الواقعه اللي بنتكلم عنها بشكل خاص ولا حتى هامش الربح بشكل عام
كمثال بسيط : حضرتك واخد كوبي من مقال بيتكلم عن سياسات اقتصادية واجراءات عملها نيكسون ملهاش دعوه خالص باللي حصل في هامش الربح
Richard Nixon implemented the most radical economic program in American history
طيب ليه مخدش السطر كله اللي بدايته On August 15, 1971,
يا فندم ده كلام عن حاجه واحنا بنتكلم عن حاجه تانيه ومفيش اى اشارة من قريب او بعيد لهامش الربح
حاجة تانيه
حضرتك ركزت على جمله تانيه :
Since that time, the U.S. government has not imposed maximum prices on consumer items or labor
احنا يا فندم بنتكلم عن "تحديد حد اقصى لهامش الربح" مش "تحديد اجباري للاسعار السلع"
من سنتين بس أو اقل ( ايام جودة وزير التموين ) كان كتير عايزين يطبقوا التسعير الاجباري ( او الحد الاقصى لاسعار السلع ) انا عن نفسي شايف انه أجراء دكتاتوري او متطرف
في حين ان تطبيق حد أقصى لهامش الربح اجراء عادل لا هيظلم المنتج او التاجر ولا هيظلم المستهلك
القاعده العامه بتقول : " البينه على من ادعى والدليل على من أنكر "
موضوع تدخل امريكا فى هامش الربح حضرتك استنكرت ان امريكا تدخل في هامش الربح لاقيت فيديو للراجل جايب الواقعه بتفاصيلها السنه والارقام بالتفصيل
حضرتك بعدها جبت وقائع تانيه خالص ( متطرفه ) وبنيت عليها كلامك
ونفيت بناءا عليها الواقعه اللي بنتكلم عنها من اساسها
يبقى ده كلام برضو ؟ :F_eyeb1[1]:
انا لا اعرف صلاح جودة معرفه شخصيه ولا تربطني بيه أي صله من أي نوع - وبرغم اختلافي فى جزء صغير من أرائه - الا اني شايفه اكتر اقتصادي محترم وبيحاول انه يساعد ويقدم حلول (جزء صغير اوي منها اتطبق زي سندات قناة السويس بدل الاكتتاب في البورصه كأسهم ) وبينتقد مش بيهمه اي حد وبيقدم حلول
وعلى فكره انا اتكلمت عن هامش الربح هنا فى المنتدى من اربع سنين تقريبا لتخفيض اسعار السيارات ( قبل صلاح جوده ما يظهر ) والغريب اني لاقيت مهاجمه ورفض برضوا من بعض اعضاء المنتدى
اخيرا انا بعتذر عن تأخر الرد على مشاركة حضرتك 65 لانها مشاركه داسمه جدا وعشان ارد عليها هتاخد مني جهد شويه خصوصا اني بعيد قرائة المشاركه أربع او خمس مرات عشان أحاول افهم الفكرة اللي حضرتك عايز توصلها واحاول افهم طريقة تفكير حضرتك للوصول لحقيقه ثابته وعوامل مؤثرة نقدر نوصل او نتفق من خلالها لحلول
تحياتي لحضرتك وكل سنه وانت طيب
حضرتك لم تاخذ بالك من الى انا كنت برد عليه تحديدا .....
كنت بدور على موضوع سنة 1974 و ايه الى حصل فيها ..... و بعدين دورت على 20 % و بعدين على 82 % .....
انا كنت برد تحديدا على الفيديو بتاع د صلاح جودة ..... الكلام الى ذكره .. لم يحدث ..... نيكسون كان عمل خطة فيها حاجات كتير .... منها حاجة قريبة ما ذكره دكتور صلاح .. و هو التحكم بالاسعار .. و الموضوع لم يتطرق لأكثر من هذا
فكلام الدكتور صلاح مش مظبوط خالص .... و مش صح
نظام نيكسون كان فيه حاجات كتير .... منها موضوع تحديد الاسعار ده ..... و لا يزال طلبى قائما .... لو حضرتك وجدت اى مقال بيتكلم عن قيام نيكسون سنة 1974 بتحديد هامش ربح .. او اى شيئ من الى قالوا دكتور صلاح ... اكون شاكر جدا لحضرتك
خطة نيكسون كانت من سنة 1971 لغاية سنة 1974 ... و هو مشى سنة 1974 ...
يا فندم مين الراجل الى جاب الواقعة الى بالارقام ده ؟؟؟!!! د صلاح ؟؟!!! طييب انا فى المقالات الى جبتها بتقول ... ان الفيديو و الارقام دى مش مظبوطة ... مش صحيحة .. الراجل ده جاب الكلام ده من فين ؟؟!!!
ياريت لو حضرتك عندك ادلة اخرى على كلام الدكتور صلاح توضحها ان كلامه مظبوط
متابع معاك
انا هرد على النقطه دي بس لوحدها فى الاول
حضرتك بتقول ان المقالات الي حضرتك جبتها بتقول ان الفيديو والارقام مش مظبوطه .. مش صحيحة ؟
ازاي وحضرتك جايب مقالات لا تمت للواقعه بصلة ؟
يعني لا اتكلمت عنها من قريب او بعيد ولا اتكلمت اصلا هامش الربح اساسا
هاتلى كلمه هامش الربح فى مقاله واحده من المقالات الي حضرتك جبتها
بص يا فندم مش معنى اني حاولت ادور على حاجه حصلت من اربعين سنه ومعرفتش اجيب ذكر ليها سواء بأثباتها او نفيها
اني انفي الواقعه من اساسها .... مينفعش
دي بعض الوقائع لبعض الدول العربيه لتحديد حد اقصى هامش الربح ( اللي حضرتك بتسنكره او تنفيه )
تونس سنة 2015 ( السنادي)
وزارة التجارة : تحديد هامش الربح الأقصى عند البيع بالتفصيل في قطاع الأسماك
الجزائر 2009
الحكومة تدرس مشروعا لوقف المضاربة في أسعار الإسمنت
بخصوص امريكا وتحديد حد هامش الربح
ياريت حضرتك تقرأ الدراسة دي (من موقع جامعه مش اي كلام في اى موقع) وفيه أدق التفاصيل :
السلعه - سرعة دوران راس المال - التكاليف - اسعار البيع والشراء - الدعم - هامش الربح للجملة والقطاعي
Food price policies and nutrition in Latin America
لو حضرتك داخل نقاش او حوار عشان تفيد او تستفيد او تحاول توصل او تكون وجهة نظر قد تتفق أو تختلف مع وجهة نظرك السابقه فده وضع
لكن ان حضرتك تدخل نقاش او حوار وانت معندكش اى نيه لتقبل اى رأي أخر غير رأيك وتتهم المعارض او صاحب وجهة النظر الاخرى بالكذب او الاختلاق فده وضع تاني خالص
مينفعش اني اطرح فكرة
- فحضرتك ترفضها او تستنكرها وتطلب دليل
أقدم لحضرتك دليل
- فحضرتك تنكرة لعدم قدرتك على التحقق منه وتقدم كلام لايمت للحوار بصلة
احاول افهم حضرتك انك جايب كلام بعيد عن الفكرة بشكل عام وعن واقعة الدليل بشكل خاص
- فحضرتك تكذب الراجل وتقول ان كلام ده محصلش وتطلب دليل على الدليل
ارجع انا أدور واقدم دليل على الدليل
ده كتير اوي
انا لا عندي الطاقه ولا الجهد ولا الوقت لكل ده
اشكرك دكتور هلال على مساعدتى فى ترجمة هامش الربح ... انا بحب دائما حد يشيك عليا علشان لو انا غلطان ينبهنى .....
و الى عملته انا هو بحث عام .... و قرأت حاجات كتير عن نيكسون .. و بعدين بدأت اغير كلمات البحث .. و اقرأ كمان .. و اغير كلمات البحث تانى و هكذا .... واحد فاضى تقول ايه :36_1_37[1]:
و تحديدا ..... Nixon 1974 .... قريت منهم ما يقرب من 10 موضوعات .... و لم اجد تفاصيل كثيرة عن موضوع الخطة الاقتصادية ... اغلب الموضوعات كان بيتكلم على اقالته
Nixon 20 % مفيش جديد .... زى الفات .. و تقريبا 5 موضوعات
Nixon 82 % ... شرحه
فى احد المواضيع وجدتهم بيذكروا ... wage and price control
اشطة ... نجرب دى كمان Nixon wage and price control ... و من هنا بدأت الدنيا تنور
طيب ليه wage متخليها price control على طول
جربت Nixon and price control .. و حصلت على موضوعات كتير .. اخترت منهم 10 فقط ... و وجدت اكثرهم متكرر .. فعرضت الى عجبنى و ذكرت الجملة الى شدت انتباهى ....
فيه مبدأ صغير خالص فى البحث .... و هو ... الخاص بيكون جزء من العام ... و ليس العكس ...
يعنى .... المواضيع الى بتتكلم عن price control فى الغالب لازم تحتوى على مواضيع بتتكلم عن profit margin .... و مع ذلك .... انا جربت البحث ب Nixon profit margin .... و لم احصل على شيئ مفيد
و لو عند حضرتك ياريت تحاول تبحث عن الحاجات دى ... و لو وجدت شيئ مفيد يا ريت تبلغنى
و لو فاضى و مش وراك حاجة زى نوبة حالاتى .... حط اضافاتك فى البحث كمان ... يلا ... اجازة عيد
تقبل اجترامى
أخي العزيز الباشمهندس أحمد
الحقيقة أن معلوماتك الاقتصادية أدهشتني
لأنها كلها تعبر عن حقائق نادرا ما يعرفها سوى أهل الاختصاص
ومصطلح هامش الربح رغم أنه شائع في مجال المحاسبة إلا أنه غير شائع الاستخدام في مجال الاقتصاد بشكل مباشر ، وإذا عرفنا أن الربح ما هو إلا سعر البيع مطروحا منه التكلفة ، سنفهم تلقائيا أن السيطرة على الاسعار برغم ارتفاع التكلفة تعني في الحقيقة السيطرة على هامش الربح دونما حاجة الى توضيح
أوبمعنى آخر ، إذا أردنا أن نبحث في علم الاقتصاد لابد أن نلتزم بالمصطلحات المستخدمة في هذا العلم أما مصطلح هامش الربح ، فهو غير شائع الاستخدام سوى في مجال المحاسبة
تقبل تحياتي وإعجابي بالمناقشة
امال د صلاح جابها من فين ؟؟!! .... انا كنت عاوز اوصل للمصدر الى هو جابها منه
مين الى قال لحضرتك انى بنفى موضوع هامش الربح ده ؟؟؟!!!!!
يا فندم لو سمحت راجع قراءة ما كتبته ..... انا كتبت انى انفى نفى مبدأى ان يكون هذا حدث فى الولايات الامريكية .... كلامى واضح جدا جدا .... و قلت تحديدا فى المشاركة 62 ... انا كتبت ... اعتراضى ليس بالكثير على موضوع تحديد حد اقصى لهامش الربح
و ده معناه انا متفق مع حضرتك بشكل اكبر على موضوع هامش الربح .... و لكن عندى بعض الاعتراض نتيجة تخوفى ... ان انا مشفتش الموضوع ده اتطبق فى مصر قبل كدة !!!!
ببساطة ... انا موافق على موضوع تحديد هامش الربح ده بنسبة 80 % ... استنكره ليه ؟؟!! و انفيه من مين ؟؟!!
اهلا و سهلا بتونس ... الجزائر اخواتنا و حبايبنا ..... ايه الى دخل دول فى امريكا ؟؟!!!!
و بعدين الدراسة الى حضرتك حطيت اللينك بتاعها .... على عينى و راسى و قريتها .... فى تريندات ؟؟!!! ايه علاقة تريندات بامريكا ؟؟؟!!! هما بيخشوا امريكا من غير فيزا صحيح ... و الامريكان مبلطجين عليهم شويا صحيح .... بس ايه علاقة تريندات بامريكا ؟؟!!!
لو معنديش نية لتقبل الرأى الاخر .... ليه قلت لحضرتك انك تعمل search و تساعدنى .... مش احتمال ان حضرتك تلاقى حاجة تثبت فيها ان امريكا طبقت هامش ربح على المنتجات ؟؟!!
هل انا لم اذكر انى متفق مع حضرتك فى عدة نقاط ؟؟؟
و ده الى حضرتك مش واخد بالك منه .... حضرتك بالفعل قدمت دليل .... و انا طعنت فى صحته نتيجة انه دليل مش مستند لوقائع و لا احداث .... الدليل ده شهادة واحد طلع اتكلم فى التليفزيون .... مصادره ايه ؟؟؟ طاب جاب الكلام ده من فين ؟
انا حاولت اروح ابحث فى المكان الى اغلب الناس بتدور فيها ... و لم اجد شيئ ... فحمت حكم مبدئى ان دليل حضرتك ( الفيديو ) مش صحيح
حضرتك كان ممكن تحل المشكلة دى ببساطة جدا ... و تدور على النت شوية صغيرين .. و اكيد كنت حتلاقى اجابة اول دليل اخر مثلا يقوى الدليل الاول .. بس خلاص .. ببساطة جدا
و ده مش كتير و لا حاجة .....
موحشتكش ايام الكلية و التدوير على المعلومات و الابحاث و الكلام الظريف ده ؟!
تفضل طول الليل تدور على معلومة قالها واحد فى صفحة من كتاب من ضمن 5 او 6 كتب امامك ؟؟!
ان مكنتش وحشتك .... فهى وحشتنى انا ... و بحاول ادور و ابحث فى اى حاجة اقدر ادور فيها
عارف حضرتك انا قريت كام مقالة فى الموضوع ده ؟؟ كتير .. و مش حقول العدد كام بالظبط علشان متقلش انى بتمنظر او ببالغ
و على فكرة ... انا خلفيتى هندسية ... و التدوير فى الاقتصاد و التجارة و الحاجات دى بيكون ساعات كتيرة عقيم جدا بالنسبة لى ... و بفضل اقرأ فى الحاجة اكتر من مرة و مع هذا ... كنت مستمتع جدا بالبحث و التدوير و تعلم حاجة جديدة
و بالمناسبة ... انا لم اتهم صاحب وجهة النظر الاخرى ... و هو حضرتك ... بالكذب و الاختلاق ...
انا كتبت ان كلام صلاح جودة مش مظبوط و مش صح ... و مرضتش اكتب انه كذاب .. علشان كلمة قاسية شوية و علشان حضرتك متزعلش ..... لحسن يطلع قريبك و لا حاجة ...انما طالما مطلعش قريبك ....فهو كذاب و افاق و بيخترع حاجات كتير مش صحيحة ....
سيبك من كل الكلام الى فوق ده .......
انا ميخلصنيش انك تزعل .... يا عم صلاح جودة ده احسن ناس .. و كلامه على العين و الراس
انا مش حسمح لاختلافنا فى الرأى يخليك تزعل او تاخد على خاطرك او انك تضيع وقتك و طاقتك فى الكلام الفارغ الى احنا بنتكلم فيه ده
تقبل اعتزارى و تحياتى
اخى العزيز الدكتور هلال .... بلاش باشمهندس دى .. بحس ان فيها منظرة ... خليها ابو حميد .. احمد كدة حاف
يا فندم ربنا يكرمك .... الموضوع بسيط و انا معنديش معلومات اقتصادية كتير و لا حاجة .... الواحد لسة بيتعلم
الكلام الى حضرتك بتقوله ده كان الخطوة الثانية فى تطبيق موضوع هامش الربح ده ... الى هو الربح
طيب ده مش بيفكرك بالنظام الاشتراكى فى الاقتصاد ؟؟!!! .. انا معنديش مشكلة مع النظام اشتراكى ... بس نعمله كله للاخر ... لو ماشيين على النظام الرأسمالى .... نعمله كله للاخر برضو
تقبل احترامى لحضرتك .. و تحياتى لاسلوب حضرتك الراقى
متابع مع اى حد يحب يتكلم فى الموضوع .... و اكون سعيد جدا لو يفيدنا بخبرته
الله يسامحه صلاح جودة اللى قلب الدنيا كده :) و ده فى رأيى هو عيبه الرئيسى..... هو ممكن يكون علامة فى مجال تخصصه الا ان عيبه الرئيسى من وجهة نظرى..... هو عشوائيته فى طرح المعلومات رغبة فى التبسيط مما يقود لنتيجة عكسية هى البلبلة..... و ده اللى حاصل فى الموضوع ده فى اخر كام مشاركة بين الاخين الفاضلين اللى دارت بينهم معظم المشاركات الاخيرة فى هذا الموضوع..... و بناء عليه و رغبة من العبد لله فى فض الاشتباك..... ندلى بدلونا فى هذا الموضوع..... لعل ذلك يزيل بعض من البلبلة التى سببها كلام صلاح جودة
اول ملاحظة على ما دار من نقاش هو انه حصل خلط غير مقصود بس شائع..... و هو المقارنة فى غير محلها..... يعنى زى ما بنقول مقارنة البرتقال بالتفاح...... ازاى.... فى موضوع دورة التجزئة و مبيعات السلع و الخدمات مينفعش اصلا مقارنة بين مصر و بين غيرها من الدول المتقدمة زى امريكا و اوروبا و البلاد دى..... لان البلاد دى منتجة و انتاجها غزير بيكفى احتياجات شعوبها و بيتصدر كمان بغزارة للاسواق العالمية..... فى حين مصر بلد مستورد لكل شئ تقريبا..... يعنى احنا تقريبا معندناش دورة انتاج و تصنيع كاملة من الالف للياء لسلعة تتم محليا..... و حتى لو تمت فبيبقى سعرها مش منافس للمنتج المستورد فى النهاية لارتفاع اسعار كل مدخلات الانتاج اللى كتير منها اصلا مستورد برضه...... و بالتالى التضخم اللى بيحصل بسبب اننا غير منتجين هيفضل شر لابد من حدوثه طالما ظللنا غير منتجين...... فى حين البلاد التانية سواء امريكا و لا اوروبا و لا اليابان..... بتعانى من عكس اللى احنا بنعانى منه تماما..... بتعانى من انكماش الاسعار او ال disinflation !!!!! و بعضها الاخر زى اوروبا بتعانى من deflation رسمى...... ليه..... لانها مجتمعات منتجة و مصدرة..... و كمان عملاتها قوية بتعطى لمواطنيها قدرة شرائية عالية حتى فى مواجهة البضائع المستوردة..... من هنا بنشوف المركزى الامريكى بيكافح عشان يرفع التضخم!!!!! و نفسه يوصله ل 2% !!!!!! من المستوى الحالى اللى يقاس ببعض الكسور العشرية..... و زيه بيعمل المركزى الاوروبى و البريطانى...... اما اليابانيين دول بقى فحكاية تانى تماما..... اليابانيين مبهدلين الاقتصاد بتاعهم و مدخلينه فى ركود مستمر بسبب انهم مش بيشتروا كفاية !!!!!! يادوبك بيشتروا اللى محتاجينه على القد و بيحوشوا جامد جدا..... و النتيجة؟ اهه:
Japan: First ketchup price rise in 25 years
Japan: First ketchup price rise in 25 years
يا للهول..... سعر الكاتشب بيزيد لاول مرة من 25 سنة!!!!!!!!!!!!!!
ثانيا..... ايه اللى احنا بنشتكى منه عندنا هنا...... بنشتكى من ان التجار بيبيعوا السلع اللى اغلبها مستورد بالاسعار اللى تعجبهم و بأرباح خيالية..... طيب ده حله ايه...... هنا بقى الدنيا دخلت فى بعض برضه بسبب عشوائية صلاح جودة فى الكلام و عرض المعلومات..... و هنا نأتى للعرض السليم للمعلومات التى تسببت فى هذا الخلط......
بداية بس موضوع تحديد حد اقصى لهامش الربح..... ده فعلا ممكن يكون مفيد فى حالة مجتمع مستورد و عالة على البشرية زى حالاتنا..... و مش صعب يتعمل لو فى ارادة لتطبيقه..... لانه معمول فعلا فى صناعة مهمة و خطيرة و حيوية فى مصر و هى صناعة الدواء...... وزارة الصحة مبترحمش و مطلعة عين الشركات اللى ريقها بينشف لتحريك اسعار منتجاتها و لازم تقدم مبررات كافية لكده و الا مش هتتحرك الاسعار..... ده تقريبا النموذج الوحيد فى مصر اللى فيه رقابة صارمة على دورة التصنيع و الانتاج الكاملة انتهاء بالسعر اللى بيشوفه المستهلك على عبوة الدواء و حتى الدواء المستورد كمان ..... اذن الموضوع قابل للتنفيذ بس بشرط وجود الارادة و المنظومة لتنفيذه...... و مع كل الخنقة اللى فارضاها وزارة الصحة الا ان شركات الادوية العالمية مش بتطفش من السوق المصرى بل بالعكس...... ليه..... ببساطة لانه سوق حجمه 100 مليون مستهلك و بالتالى الشركات بتعرف تعمل ارباح جيدة فى النهاية..... حسب قوانين العرض و الطلب و المنافسة الطبيعية و برضه بتكسب جامد..... نرجع لحالتنا...... ايه الحل الطبيعى..... ان احنا نبقى زى اليابانيين كده..... طب هل هنعمل كده..... طبعا لأ..... طيب الحل الحكومى..... البنك المركزى هو اللى شايل ليلة محاربة التضخم لوحده بأجراءاته من رفع سعر الفائدة لتحجيم حجم النقد المتداول..... و احنا قاعدين نتفرج بدون ما نغير من سلوكياتنا الاستهلاكية..... عشان كدة اجراءات البنك المركزى عاجزة بدون مساعدتنا كشعب بتغيير السلوكيات الاستهلاكية
طيب ايه بقى اللخبطة اللى حصلت بسبب كلام صلاح جودة و قصة نيكسون و مش نيكسون؟
موضوع التحكم فى الاسعار ده بيلجأوا له برة فقط و غالبا فى حالات الازمات..... عشان يمنعوا استغلالها من المتربحين..... و ده لانهم هم اللى اخترعوا الرأسمالية اللى اساسها موضوع العرض و الطلب..... طب السيد نيكسون عمل ايه فى 1971...... عمل price control..... اللى هو تحديد سعر ادنى و سعر اقصى للسلع يتراوح بينهم "السعر العادل" للسلع..... و ده بيتعمل زى ما قلنا بفحص الدورة الانتاجية كلها و تحديد الاسعار الاسترشادية..... و ده كمان بيفيد فى جوانب اخرى..... منها مثلا تحديد الحد الادنى لساعة العمل.... اللى بيتراوح حول 8 دولارات فى حده الادنى..... و بيفيد كمان فى اعانات البطالة و قيمتها..... و معاشات العجز و قيمتها و هكذا..... و كل الارقام دى مش بتبقى جاية من فراغ انما من دراسات كاملة للدورات الانتاجية و التصنيعية للسلع و الخدمات..... كل ده بييجى ازاى..... بييجى لانها مجتمعات منتجة بل غزيرة الانتاج و مصدرة و كمان فيها انظمة قوية للرقابة و المتابعة بتجمع معلومات حقيقية عن الاقتصاد بكل جوانبه...... و ادى قصة ال price control كلها فى اللينك ده و فيها حكاية نيكسون كلها:
https://en.wikipedia.org/wiki/Price_controls
اللينك ده كمان له علاقة بالموضوع من ناحية الدخل و كمان بيكمل الشرح بالامثلة من فرنسا و امريكا و برضه فيه جزء تانى من حكاية نيكسون..... :
https://en.wikipedia.org/wiki/Incomes_policy
ملاحظة اخيرة..... ان موضوع تحديد حد ادنى و اقصى للسلع ده غالبا بيعتبروه ضرورى فى حالات الازمات..... و ده لتجريم ممارسات التربح من الازمات profiteering او المغالاة فى التسعير price gouging فى الازمات..... و غالبية القوانين بتتعامل مع حالات الازمات بالتحديد..... رغم انه مثلا ولاية كاليفورنيا بتتحكم فى اسعار الكهرباء..... و مانعة اى زيادات فى سعر اى سلعة بما يزيد عن 10% فى المرة الواحدة خلال الازمات ..... او اللى بيسموه price cap.....
طيب يعنى هل الموضوع مستحيل التحكم فيه عندنا..... لأ مش مستحيل بس عاوز معلومات و دراسات جامدة جدا و تذليل لكثير من المعوقات زى موضوع الاقتصاد الغير رسمى و ده بلوة مسيحة فى حد ذاته ان دولة يوجد بها اقتصاد موازى يتجاوز حجمه حجم اقتصادها الحقيقى و يتخطاه بكثير..... يعنى من الاخر احنا عندنا هم ما يتلم بيصعب الموضوع بس برضه الموضوع مش مستحيل و ممكن تحقيقه...... و ادى جزء من دراسة كده لاقيتها على السريع من البنك المركزى الاسترالى عن موضوع التجزئة و مدخلاتها و مخرجاتها و تكاليفها و ايضا هوامشها كلها:
http://www.rba.gov.au/publications/b.../bu-0612-2.pdf
اتمنى اكون ساعدت
طبعا هييجى حبيبنا الاخ احمد دلوقت بديباجته المعتادة فى اول سطر من كل تعليقاته على مشاركات الاخرين ..... بما يفيد بأتفاقه مع اغلب ما قيل لكن بالطبع بأختلافه فى بعض التفاصيل.... مستنيك يا غالى :))))))
هاهاهاهاهاهاهاها
اضحكك الله كما اضحكتنى ....
مشاركات حضرتك تسعدنى ... و على فكرة انت اتاخرت شوية علينا .. و لو كنت تكبت الموضع ده من بدرى ... كنت وفرت عليا البحث و التدوير ده
و انا مش حعترض يا عم المرة دى .... بس مش حينفع لا اضيف حاجة فى نفسى ...
موضوع الدواء انا متفق مع حضرتك فيه تماما .... بس فيه مشكلة صغيرة ... شركات الادوية بتعمل حركة قرعة اوى ... الدواء الى عاوزينه يغلى ... بيقللوه فى السوق ... يعنى بيعطشوه ...
لما بروح اصرف روشتة دواء .... لازم اجد احد الادوية الناقصة ... طاب ناقص ليه يا عم الصيدلى ؟ مش عارف ... هو بقالوا فترة ناقص ... طب منعوه .. لأ ... لغاية ما فيه دكتور صيدلى بلغنى مرة بالقصة دى ... و بالفعل .. وجدت الدواء الى كان ناقص .. رجع السوق مرة اخرى .. و غلى شوية
بالنسبة للسيد نيكسون ... انا لم انكر انه عمل price control و تحكم فى الاسعار ... اللينكات الى حضرتك وضعتها ( بلاش الى انا وضعتها ) بتقول كدة .... بس علقت ان بعض المقالات ذكرت ان الموضوع ده متكررش تانى ... و فيه كاتب مقال وصف الخطة دى بالمتطرفة ... يعنى وحشة :waaaht:
كل الموضوع ده علشان اوضح ... ان حكاية صلاح جودة ... مش موثقة ... فيها معلومات انا مش عارف اجيبها ... و طالما انا العبد الفقير الى الله مش عارف اجيبها .... اذن فهى بالنسبة لى ... مش موجودة ..
لغاية لما ييجى واحد اشطر منى ... و دور و تعب اكتر منى ... و يورينى انه وجد الادلة الى انا معرفتش الاقيها ....
ارفعله القبعة احتراما .. و اصدق كلامه ... و اغير وجهة نظرى
المفروض .... و خلاص اصبح من الطبيعى ... لما تذكر موضوع و خاصة لما تذكر واقعة من التاريخ ... تجيب مصادر الخبر ده ... رأيك انت حر فيه ... استنتجاتك دى بتاعتك انت ... لكن بتذكر حاجة من التاريخ و بتكتب بالارقام ... لازم توضح حضرتك جبت الارقام و الواقعة دى من فين
مش حينفع نمشى و راء اى حد يقول اى كلام و لا نتأكد من مصادر هذا الكلام
السيد صلاح جودة من الناس القليلة جدا الى ممكن اعد اسمع هو بيقول ايه .. و اكمل كلامه للاخر .. اسلوبة بيعجبنى فى اغلب الوقت .. و لى بعض التحفظ عليه
و بالطبع موضوع مش حخليه يعدى بالساهل كدة ....
ايه موضوع الاقتصاد الموازى ده ؟؟
كويس جدا انى كنت سبب فى انك ضحكت.....
انا اتأخرت بسبب ضيق الوقت من جهة ..... و من جهة اخرى ان انا اساسا لا احب المشاركة فى مثل هذه المواضيع التى ارى ضررها اكثر من نفعها ..... خاصة فى مجتمع لا يقرأ بل ثقافته كلها سماعية و تقوم على الشائعات...... مع كل الاحترام لصاحبه و كل المشاركين فيه..... لكن اللى غالبا لازم اخلق له وقت..... هو فض الاشتباكات..... لانى لا احبها..... و لا احب ان تسود او ان توجد امامى عامة..... و احاول التدخل قدر استطاعتى ان كان فى استطاعتى ان اساهم فى زوالها.....
الحكاية اللى قلهالك الصيدلى مش دقيقة حتى ان صدف انها تحققت...... انا قصة الدواء دى هارسها بحكم الخبرة لانى عائليا محاط بالدكاترة و الصيادلة فعارف كتير اوى من اسرارها لان دى محاور الكلام غالبا فى معظم القعدات العائلية ..... عدم دقة القصة فى ايه..... فى انه لو صنف نقص..... فيوجد له فعليا عشرات البدائل...... و نادر جدا فى السوق المصرى تلاقى دواء محلى الصنع ملوش عشرات البدائل..... يمكن المستورد هو اللى وارد اكتر فيه الحركات القرعة من الشركات لكن المحلى لأ..... اما السبب الفعلى لوجود نواقص ادوية كتير فى اخر 4 سنين هو موضوع استيراد المواد الخام..... بس زى ما قلتلك..... البدائل كتييييير جدا و من عشرات الشركات فغالبا فى النهاية هتلاقى اللى انت عايزه..... مع استثناء الدواء المستورد احيانا....
الاراء اللى حضرتك ذكرتها بتهاجم ما فعله نيكسون...... هتلاقيها من الاقتصاديين عامة المؤمنين بالسوق الحر اللى بيعملوله تمثال عجوة و عايزين ينفخوا فيه الروح..... يعنى مش عايزين حد يلمسه..... دول اللى بيسموهم دهاقنة الرأسمالية (و المصطلح ل د. مصطفى محمود الله يرحمه)..... نظريا اه السوق لازم يكون حر بس من الناحية العملية الدول لازم تمارس دورها فى المتابعة و الرقابة و المساءلة و الا سيظهر الوجه القبيح للرأسمالية...... الوجه المتوحش..... و عشان كده فى امريكا نفسها معقل الرأسمالية يوجد دور رقابى للاجهزة التشريعية يتمثل فيما يعرف بال congressional hearings او جلسات الاستماع اللى بيجيبوا فيها اتخن رؤساء شركات فى امريكا بل و العالم و يعصروهم تحقيق فى ممارسات شركاتهم خاصة اللى فيها شبهات احتكار او price fixing و خلافه..... و لو ثبتت عليهم الممارسات الخاطئة بيطلعوا عينهم غرامات بالمليارات
صلاح جودة انا شخصيا بلاقى كلامه كويس بس دائما اعيب عليه التباسط الزائد فى الشرح و عرض المعلومة مما يتسبب احيانا كثيرة فى التباس و بلبلة كما حدث هنا......
الاقتصاد الموازى هو الفلوس اللى مش ماشية فى القنوات الرسمية للدولة...... من اقتصاد بير سلم لسلع مجهولة المصدر و مهربة...... لخدمات لا تحصل مقابلها على فواتير و بالتالى لا يتم تحصيل ضرائب عنها...... و هكذا...... و ده حجمه الفعلى يتجاوز حجم الناتج المحلى لمصر سنويا
ربنا يقدرك على فعل الخير و يجزيك عنها
مشكلتى الشخصية ان مش كل بدائل الادوية بتنفعنى ... فيه بدائل زى قلتها معايا ... يلا .. ربنا يكرمنا من عنده
و احب اطمأن حضرتك ..... الثقافة العامة ماشية فى طريق زيادة الاستهلاك ... و زيادة الطلب على الرفاهية بيزيد
و انا عن نفسى معنديش اى امل ان الثقافة دى تتغير ... و ان الناس تكون مقتنعة بالكلام ده مش نتيجة ضيق ذات اليد
من موضوع نيكسون ده ... بالفعل انا مشفتش حد بيشكر فيه ... الناس بتتكلم من بداية ان النظام ده تم الاعداد له فى ليلة واحدة ... لغاية الذكرى الغير سعيدة لفترة حكمه
الممارسات الاحتكارية ليها قوانين و رقابة زى ما حضرتك ذكرت .... و من فترة ليست بالبعيدة ... شرشحوا بيل جيتس يا عينى علشان مايكروسوفت بدأت تسيطر على السوق و ميكونش فيه شركة غيرها ... طاب هو ماله ؟؟!
ال ايه .... شركته بنجاحها خلت بقية الشركات تقفل و بكدة اصبحت هى الوحيدة فى السوق ... و ده ضد قانون الاحتكار ... ساعات كتير فيه حاجات اجدها منطقية بالرغم من انها مش عجبانى و مش مقتنع بيها
كتاب الدكتور زكى نجيب محمود .. مجتمع جديد او الكارثة جيد على غير المتوقع ... هو اسلوبه قديم شوية ... بس ماشى الحال .. و بيعكس طبعا علمه .. انا لازلت اقرأه
الكتاب الى بيتكلم عن الصين مش لاقيه