الموضوع: سعر الدولار المتوقع علي ديسمبر 2015 و يناير 2016

المشاركة الأصلية كتبت بواسطة eslamrace

تمام متفق معاك بس الحلزونه دى اللى حيكسرها هو احتياج التاجر للسيوله علشان يستغل فرص تجاريه تحققله ارباح اكتر من اللى حيعملها لو فضلت البضاعه جنبه
بمعنى ان التجار دلوقتى فى مجالات كتير حجم مبيعاتها بيغطى تكاليفها بالعافيه وبالتالى هو مفيش معاه سيوله يدخل بضاعه جديده وبالتالى المستورد مش لاقى حد يشيل من عنده البضاعه
وفى ظل فرصه زى انخفاض قيمه اليوان فأى مستورد عايز سيوله كبيره علشان على الاقل يحقق ربح اعلى والحاله الوحيده اللى تخللى المستورد مش فارق معاه انه يكون عنده كم دولار كسيوله تخليه يعرف يستفيد فى الحالتين ولكن ده مش بيحصل والحلزونه مبتتكسرش وزى مقولت حضرتك واضح انها مش حتتكسر

الفكره دلوقتى ان الحل الوحيد "غير سلوك المستهلك اللى غالبا تأثيره مش كبير" هو التدخل الحكومى ولكن ده مش حيحصل وبما ان مفيش حل تالت منطقى يبقى اى تغيير خارجى فى العملات سواء زياده او نقص حيكون بلا تأثير حقيقي علينا سوى للاسوأ
لو فى حل ثالث ممكن تقترحه اتمنى تشاركنا بيه لأن بصراحه الموضوع اقتصاديا واجتماعيا واضح انه ملهوش حل قابل للتنفيذ
تحياتى.

خلينا بس نوضح ايه المقصوحد بالركود التضخمى. . . الركود على مستوى الاقتصاد الكلى هو انخفاض مستمر فى الناتج القومى المحلى. . . يترجم لايه. . . يترجم الى انه فى تباطؤ فى الانتاج و الدورة الاقتصادية عموما. . . يعنى بطالة اعلى و اجور اقل . . . و ده اللى فى النهاية بيترجمه الشارع بأن الحال واقف. . .
اما التضخم فمعروف. . . فلوس كتير فى ايدين الناس بتتصارع على نفس العدد من السلع و الخدمات. . . و الفلوس عمالة تزيد و السلع و الخدمات هى هى. . . و النتيجة الحتمية ارتفاع الاسعار
طيب ايه اللى حصل فى اخر اربع سنين خلانا نوصل لكده. . . الركود ضرب معدلات النمو الاقتصادى و خلاها فى النازل بأستمرار بسبب عدم الاستقرار السياسى اللى خلى الاستثمار الاجنبى يقف و السياحة شرحه. . . بس طبعا الاستثمار الاجنبى المباشر اثره اكبر. . . اما التضخم فسببه ببساطة ان الفلوس كترت فى ايدين الناس لانه على مدار الاربع سنين اللى فاتوا يكفى اقولك ان بند الاجور فى الموازنة العامة زاد من 80 مليار الى 210 مليار. . . و النتيجة على ذلك بالتبعية. . . ان حجم النقد المتداول فى البلد زاد من 150 مليار جنيه الى 300 مليار. . . يعنى اتضاعف. . . طب الفلوس دى هتقعد ساكتة كدة. . . لأ طبعا . . . عايزة تشترى. . . فطبعا لازم اسعار السلع و الخدمات لازم يرتفع. . . و ده طبعا مش محتاج شرح لان كلنا عايشينه. . . طب و الحل. . . جه متأخر بس جزء منه اتعمل . . . اللى هو ايه. . . ان اصلا البلاعة المفتوحة على البحرى اللى اسمها الاستيراد لكل شئ و اى شئ لازم نحاول نحجمها. . . قبل ما ال inflation يقلب رسمى ل hyperinflation و ساعتها كلنا هنروح فى داهية. . . كان لازم ده يحصل لاننا مجتمع غير منتج. . . كان لازم ده يحصل لانه اذا كان الركود هو تباطؤ فى الانتاج. . . طيب هو اصلا احنا بننتج ايه اصلا. . . اما حنفية الفلوس المفتوحة على مصاريعها فى القطاع العام و الدولة ففى محاولات جادة لهيكلتها متمثلة فى قانون الخدمة المدنية اللى مش عاجب الناس المستفيدة من الحنفية اللى باظت من زمان و عايزة تتسد. . .
طيب النتائج الايجابية المباشرة ايه. . . اهمها تثبيت الوضع على ما هو عليه و منعه من التدهور اكثر. . . بالذات من ناحية ال money supply اللى على البحرى فى ايدين شعب استهلاكى زينا. . . طيب النتائج السلبية المباشرة. . . للاسف زيادة الركود و هو الحاصل حاليا و زيادة التفليسات مع الوقت من التجار الصغيرين و خروجهم من السوق فى حين الباشا المستورد الكبير عملهم من زمان على قفاهم بسبب انه مثبت الاسعار و مانعها تنزل و ده نظام الكارتلات فى كافة السلع و معاه اللى يكفيه عدة اعمار و مش محتاج السوق و لا الشغل اصلا و هو ده التاجر المصرى الاصيل. . . وقت الجد يخلع و يقولك انا عندى اللى يكفينى و لما السوق ينصلح حاله ابقى ارجع . . . و ده اللى ذكرته انت من ملاحظاتك فى شغلك. . . و برضه كان حد عامل قريب موضوع بيقولك ان العقارات فيها نفس الركود بل و اكبر و الدليل زيادة مدى التقسيط . . . طيب و على المدى المتوسط. . . لسه كام سنة عقبال ما البنك المركزى يعرف يلم الكاش المتداول الزيادة من السوق عن طريق رفع الفايدة. . . و على المدى الطويل لو متعلمناش النظام و الانضباط فى الاستهلاك من اليابانيين اللى الكاتشب عندهم لسه زايد تمنه اول مرة من خمسة و عشرين سنة. . . لو متعلمناش ده يبقى و لا حاجة هتتغير. . . و يبقى الوضع على ما هو عليه لانها دايرة جهنمية صنعناها بأيدينا جميعا بوعى او بغير وعى. . . و لا خروج منها الا بأيدينا ايضا. . . فاكر حملة خلوها تصدى و موديلها يعدى اللى معرفتش تنزل جنيه من تمن عربية. . . اهى بقت اجبارى على الكل تجار و مستهلكين . . . و نشوف مين اللى هيصوصو الاول. . . و عشان تفهم قصدى هديك مثل بسيط. . . الفترة اللى اليورو وقع فيها بسبب ازمة اليونان. . . تجار العربيات بتوعنا الناصحين عملوا ايه. . . اشتروا عربيات فى شهرين. . . قد اللى بيشتروه طول السنة. . . طبعا على امل انهم يبيعوا بنفس الاسعار بل و اعلى و يضربوا فرق سعر العملة فى كروشهم. . . هل حد شاف عربية اوروبى سعرها نزل جنيه. . . طبعا لأ. . . خليهم بقى يشبعوا بيها و يشوفوها قدامهم و هى بتصدى لغاية ما يبقوا مجبرين يعملوا تخفيضات حقيقية و الا مش هتتباع. . . مش بقولك التاجر المصرى اغلبه يستاهل الولعة و يستاهل اللى يجراله- الا من رحم ربى

المشاركة الأصلية كتبت بواسطة eslamrace

طيب ا/ماهر خلينى اوضح لحضرتك وضع فى السوق دلوقتى وعليه حسأل حضرتك سؤال محتاج اعرف اجابته من حضرتك ووجهه نظرك فيه
مبدأيا وضع السوق دلوقتى مع حاله الركود الموجوده الكل متوقع يحصل غربله للسوق بمعنى ان فى ناس كتير حتوقف نشاطها وخاصه اللى تكاليفه عاليه "ايجار وعماله وخلافه" وبالتالى حيكون فى بطاله اكتر ولكن الكل متوقع ان اللى حيقدر يكمل لان الطلب حيعلى ممكن حاله الركود تتغير ويحصل انتعاشه فى السوق
وطبعا القياده الحاليه للبلد بتاخد اجراءات بتحاول تقلل السيوله فى البلد لان السيوله فى مصر كلها بتتحول لاستهلاك دون ادخار ومفيش اى حاجه بتخللى الناس تدخر اكتر ولكن الموضوع لاننا داخل "الحلزونه" فيعمل اثار جانبيه احيانا بتكون صعبه جدا على الناس اللى دخلها تحت المتوسط لان الوضع بالنسبالهم بيسوء وده بيأثر على التجاره ويزود حاله الركود

السؤال اللى حابب اعرف وجهه نظر حضرتك فيه
تفتكر اجراءات الدوله "حتى لو كانت نظريا علاج للمشاكل الاقتصاديه" حتجيب نتيجه جيده فى المدى القصير والمتوسط؟؟
خاصه مع حاله الاسواق المتدهوره وانتعاش الاقتصاد الموازى فقط اللى ممكن دول تعتبره ميزه ولكنه عندنا بيأثر بالسلب على السوق الرسمى وعلى اجراءات الحكومه .

تحياتى .

على المدى المتوسط يعنى من 3-5 سنين ممكن يبقى فيه نتايج كويسة مع ملاحظة انها ممكن تتأزم اكتر الاول قبل ما تبتدى تبقى احسن بالذات لان الحرب مع حاجات عشوائية زى السوق السودا للعملة و الاقتصاد الموازى بتاخد سنين. . . يعنى اباطرة السوق السودا فى مصر مش هيسلموا بسهولة و عشان كده البلد بتخطط تصدر سندات دولية ب 10 مليار دولار فى السوق العالمى خلال ال 3 شهور الجايين و خليلهم هم دولاراتهم يشبعوا بيها. . . الاقتصاد الموازى عمره ما كان كويس فى اى مكان لانه ازاى يبقى فى قنوات موازية و بديلة تمشى فيها الفلوس غير القنوات الرسمية و يبقى ده حاجة مفيدة للبلد . . . الكلام ده بيحصل بس فى العالم الثالث و فى الصين عندهم ظاهرة اسمها shadow banking عاملة عندنا زى العشوائيات بتاعة السوق السودا للعملة و توظيف الاموال و الحاجات دى و الدولة هناك بتحاربها جامد جدا