الموضوع: ال Abs و البالية المائى !!

المشاركة الأصلية كتبت بواسطة Ahmed Hassan

اللي حصل معاك ده هوه بالضبط اللي الـ abs المفروض يعمله و كده هوه شغال و سليم. المفروض بقى اللي حضرتك تعمله في حاله زي دي انك و انت دايس على الفرامل على الآخر تحاول توجه العربيه بعيد عن العائق اللي امامك لأن -و على عكس العربيات الغير مزوده بالنظام ده- العربيه هتستجيب للتوجيه.

حمدا لله على سلامتك

فعلا؟.. انا بصراحة اول مرة اتعامل مع الفرامل دى يا أحمد او اتحط في موقف يخلينى استخدمها.. فا عشان كده افتكرته عيب مش ميزة لانى حقيقى معرفش الهدف الحقيقى من نوعيه الفرامل دى.

هوا الحمدلله ربنا ستر بس انت فعلا نبهتنى لاهمية توجيه العربيه .. انا فاكر انى كنت حاسس انها مازالت في متناول سيطرتى فعلا..

شكرا ليك يا صديقى.

الِABS لا يعمل على توقيف السياره فى مسافه أقل من العربيات اللى مافيهاش و لكن مسافه الفرامل هى هى و لكن الفرق انك لن تفقد السيطره على العربيه أو تلف منك حتى لو كبست فرامل على الآخر و انت على سرعه 180 كم/ساعه مثلا. وطاره الدركسيون لن تفقد وظيفتها فى توجيه السياره أثناء الفرمله و ممكن تفادى حاجه أثناء الفرامل استحاله أى فرامل ممكن كانت توقفك قبلها عكس الفرامل العاديه اللى ممكن تكون هى نفسها سبب عومان و انقلاب السياره لا قدر الله لو استخدمت بعنف على سرعه عاليه أو سرعه متوسطه فى وجود أرض زلقه. ونظريه عملها ببساطه انها لن تسمح للعجل بالتوقف إلا لما تكون العربيه نفسها و قفت بالفعل وانتهى قصورها الذاتى عكس الفرامل العاديه اللى العجل فيها بيقفش و العربيه برده ماشيه و الكاوتش عمال يشيط فى الأرض و مفيش كنترول على العربيه و ربنا يستر و هى و ناصيبها بقه. ويعمل الABS على تصحيح قوه الضغط على تيل الفرامل لحظه بلحظه أثناء عمله عندما يشعر بأن العجله هتقفش منك وانت بتفرمل و بيخلى قوه الضغط على تيل الفرامل هى أقصى قوه فرمله ممكنه لكل عجله بس بشرط ما تقفشش و التعديل ده بيحسبه الكمبيوتر و بيتحكم فيه مجموعه من الصمامات و ترمبه لضغط الباكم و بتعمل الموضوع ده بسرعه جدا لدرجه انك بتحسه Vibration فى رجلك و صوت خبط و تكتكه عاليه فى العربيه و ده طبيعى.

المشاركة الأصلية كتبت بواسطة MoToRiZeR

هي كدة كدة العربية هتتزحلق يا أحمد لأنك مفرمل من سرعة بس الفرق إنها هتقف في خط مستقيم .. موضوع الرمل ده و إنت عالفرامل العادية هتشوف باليه مائي علي حق فعلاًَ .

دا الى عرفته بعد كده يا حودة فعلا ..
انا عمرى ماتحطيت في موقف مع السيريون مثلا خلانى استخدم الفرامل دى .. بس الحمدلله.

المشاركة الأصلية كتبت بواسطة tutankhamoun

تصحيح بسيط
ABS هي فرامل مانعة للإنغلاق و ليس الإنزلاق

يعني متخليش العجل يقف حتى لو فرملت جامد قوي و منها ظهر اسم مانعة للإنزلاق
لأن الإنزلاق بيتم بسبب أن العجل بيتوقف عن الحركة في الفرامل العادية الغير مزودة بهذا النظام
و بالتالي تساعد هذه الفرامل على عدم غلق العجل و تساعد على دورانه حتى لا تنغلق العجلة بسبب الفرملة و تبدأ السيارة في العومان منك

و مش معنى كدا أن الفرامل دي سحرية
و مش هاتخلي العربية تزحف في الرمل أو الزلط
اللي هايحصل أنها هاتزحف بس تحكمك في العربية هايكون عالي زي ما الأستاذ أحمد حسن وضح قبلي


---------

بس أنا لي توضيح
أنا عارف الحتة اللي هناك دي
و بصراحة أنت غلطان ما يتمشيش فيها على 120 نهائي و كمان ورا مقطورة و على يمينك مقطورة !!!
كدا أنت بتحط حياتك في خطر و حياة أي حد تاني وراك أو قدام المقطورة ناوي تعمل غرزة علشان تطلع من بين المقطورتين

و الحمد لله على سلامتك و أرجوا أن ده يكون درس تتعلم منه أن حيتك غالية و مش سهل تتعوض
و السرعة ملهاش لزمة حتى لو وراك أمتحان
كان الأولى تخرج من البيت بدري أكتر علشان تلحق أمتحانك و أنت مرتاح في الوقت

ربنا معاك و ينجحك في الأمتحانات إن شاء الله تعالى و يهدينا جميعا و يهدينا في السواقة يارب

و السلام عليكم

نصيحة غالية من انسان بستفيد من اراءه ومعلوماته الرائعه عن العربيات..
انا مش حد متهور ابدا في السواقة, بس هيا ظروف بتضطر الواحد لكده.

شكرا ليك يا استاذ توت على المعلومات الرائعه. :)