الموضوع: عن نقص الزيت

لا يوجد ما يسمى "بخر" الزيت داخل الموتور.. لإن الزيت علشان يتبخر لازم يسخن لدرجة حرارة عالية جدا فوق ال200 درجة على الأقل.. وده ما بيحصلش ( ارتفاع درجة الحرارة) في الأماكن اللي الزيت بيوصلها.

إنما اللي بيحصل فعلا اسمه "استهلاك" الزيت... وده شيء طبيعي جدا في أي موتور احتراق داخلي...

والموتور لو سليم 100% والزيت بينقص يبقى غالبا الموضوع له علاقة بطريقة السواقة..


عموما.. الموضوع ده فيه تفاصيل أكتر

http://www.nilemotors.net/Nile/418186-a.html


...

المشاركة الأصلية كتبت بواسطة أحمدكونت

شكراً جداً لاهتمام حضرتك و الموضوع المفيد .. لكن دلوقتى انا مش عارف النقص الموجود عندى ده طبيعى ولا لا بسبب ان اخر مره الميكانيكى قالى ناقص نص كيلو هو نص كيلو زيت معناها ناقص نص لتر من 4 لتر ولا كام ... ثانياً فى الاخر قالى مافيش حاجه بس المقاس عندى مش مضبوط وراح عاملى علامه على مقاس الزيت قالى هيا دى الماكس بتاع الزيت مشيت دلوقتى 2000 كيلو من زيت 5000 ونقص عن العلامه السؤال هل فى طريقه تانيه نعرف بيها الزيت نقص جامد ولا الطبيعى لما اغير زيت علشان الميكانيكى مش واثق فى كلامه ؟؟ اسف على الاطاله وشكراً لاهتمامك جداً

أيوه... نص كيلو يعني نص لتر... (مش نص الجالون الـ4 لتر)

علشان تعرف مستوى الزيت كويس ولا لأ.. المستوى الطبيعي للزيت لازم يكون بين علامتين الـMin والـMax اللي في عصاية مقاس الزيت.

على فكرة... مش شرط إن الزيت يكون عند علامة الـMax... المهم إنه ما ينزلش تحت علامة الـMin.. وساعتها لازم لازم تزود زيت..

في أغلب الأحوال.. الفرق بين علامة الـMin والـMax بيكون حوالي 1 لتر... فلو لقيت الزيت في النص بين العلامتين يبقى تزود نص لتر.


عموما.. معدل نقص الزيت في السواقة الطبيعية بيبقى حوالي من ربع إلى نص لتر كل 5000 كم... وفي حالات السواقة الرياضية أو التحميل الأقصى المعدل ده بيزيد جدا.. وممكن يوصل لحد 1 لتر كل 1000 كيلومتر.

المشاركة الأصلية كتبت بواسطة أحمدكونت

عندى ايضاً سؤال اخر :: هل اغير الزيت بعد مدته وخلاص 4000 حتى لو كان فى نقص الطبيعى اللى حضرتك قولت عليه طالما مافيش ضوء احمر ولا لازم ازود الناقص مع العلم انى مش عارف ازود زيت ابداً للعربيه لان مافيش حاجه تبين ده فابضطر اروح للميكانيكى ؟؟

مدة تغيير الزيت حسب الكتالوج (بالمسافة أو المدة الزمنية).. وغالبا بتكون 5000 كيلومتر أو 6 شهور مع الزيوت المعدنية... أيهما أسبق.


وأكيد ما تستناش لحد ما لمبة الزيت تنور... لإنها لو نورت ده معناه إن الموتور مفيهوش زيت!!!!

الموضوع هنا مش زي لمبة البنزين...


على فكرة... خد بالك من ألوان لمبات التحذير اللي في التابلوه....

اللمبة الصفرا معناها إن فيه حاجة ممكن تأثر على أداء العربية
اللمبة الحمرا معناها إن فيه حاجة "خطر" ممكن تؤذيك أو تؤذي العربية.

وزي ما قلتلك... طول ما الزيت بين العلامتين.. مش هتبقى محتاج تزود أكتر من 1 لتر.


والمهم كمان إنك تتابع مستوى الزيت كل أسبوع.. ده حتى الكلام ده مكتوب في الكتالوج..


رأيي ترجع للموضوع ده بردو:
http://www.nilemotors.net/Nile/434256-a.html


...