حصل معايا موقف ومتضايق شوية !!!

**HRH_Sameh** · 20-11-2008 12:05 PM

من حوالي اسبوعين كنت ماشي في الشارع الرئيسي عندنا في البلد وهوه شارع مقسوم من النص بالبتاع اللي عامل زي المطبات بس عالي شوية المهم ان الطريق يادوب بيعدي عربيتين جنب بعض .
المهم وانا مشي طبعا على مهلي لمحت عربية بوكس راكنه بس بزاوية شوية زانقة الطريق سنة المهم لمحتها بتتحرك لورا وانا داخل نحيتها المهم كلاكسات ونور ووقفت الاقي العربية راجعة برضه وراحت خابطة فيّ ووقفت

طبعا انا متضايق ومذهول ليه الافندي اللي جوا ماوقفش! الاقي (الباشا العسكري) جاي ع العربية وبيفتح الباب بالمفتاح وهايركب انا كنت نزلت وبزعق وبكلمه وهو بمنتهى البرود ركب البوكس وفر ومشفتوش
الطريق كان مطلع شوية والبيه سايب العربية من غير تعشيق ولا هاند بريك

طبعا الباب الوراني يمين اتحك من اوله لأخره وبعمق كبير ورحت تاني يوم رديته ع البارد مع انه قاللي عايز حموات المهم كنت مستعجل عشان كنت مسافر

مش ده المهم المهم بقى انا متضايق جدا من الاهمال واللا مبالاه بتاعة عربيات الشرطة وهل احنا بنضيع حقنا لما نسيبهم يعملوا فينا كده يعني ايه اللي الواحد ممكن يعمله معاهم في موقف زي ده
والا اكتم في نفسي واسكت واقول كويس انها جات على اد كده :K15:

كنت عايز اسمع منكم عشان الصراحة مخنوق ومش عارف ايه المفروض كان يتعمل؟؟!! :k41:

**madoo** · 20-11-2008 12:12 PM

اكيد كنت لازم تاخد رقمه وتعمل محضر بده

**ahmedfouad** · 20-11-2008 12:25 PM

قدر الله و ما شاء فعل

الحذر ميمنعش قدر وربنا ليه فى اللى حصل حكمة لا يعلمها الا هو عز و جل

وخلى بالك ان ربنا بيقدر وبيلطف

مش ممكن كان فى حاجة تانية مستنياك فى الطريق وربنا لطف بيك بالموقف اللى حصل ده؟؟

لا الزعل ولا الخنقة هتغير اللى حصل

لو فكرت بالطريقة اللى بقولك عليه دى والله هتهدا وترتاح

ولازم تحمد ربنا حماك من حاجة اكبر

**Amrrr** · 20-11-2008 12:29 PM

انا لو مكانك كنت هحاول اوقفه لحد ماعمل محضر مش عشان يصلح ولا تاخد منه فلوس، دا معفن اصلا ورد فعله معاك خنقني انا شخصيا ، كنت هعمله محضر أكدره او اوقفة او اعطله شوية وطبعا حسب الموقف والمكان ومعاه حد ولا لأ وانا مظبوط ولا مثلا في رخصة خلصانة وكدة ولوحدي ولا معايا ناس يعني حسب الموقف هو اللي بيحكم عليك متزعلشي
وعموماً احسن حاجة تعلمها ( والكاظمين الغيظ ) &(حسبي الله ونعم الوكيل )
هو آذاك ومهما كان حجم الأذية هي عند ربنا أذية (ضرر)

**ahmed76** · 20-11-2008 12:42 PM

قدر الله وماشاء فعل
كلنا معرضين لنفس الموقف وممكن اسوء

صدقنى اللامبالاه مش فى عربيات الشرطة بس
الشعب كله بقى ماشى يكره بعض ويخبط فى بعض ويكسر على بعض
ده سواق العربيه النقل او الميكروباص تحس انه عايز يموتك على الطريق الدائرى

ده غضب ربنا علينا

ولا تضايق نفسك

**beshir_lucky** · 20-11-2008 12:56 PM

طبعاً مش هقدر أقولك متضايقش ولا أي كلام تاني من أي نوع ، اللي حصل دا واللي بيحصل أكتر منه لا عذر له وغير مقبول علي اللإطلاق. ولكن اللي حصل حصل ومش هتقدر تغيره فعوضك علي الله من اللي حصل دا وعلي فكره أنا تقريباً عارف اللي حصل دا فين ،في شارع البحر ولعلمك أنا بكره أنزل أجازات علشان اللي بشوفه هناك من سلوكيات المرور بجد علي الرغم من إنها بلدي بس كرهتها جداً بسبب المرور والناس.

**HRH_Sameh** · 20-11-2008 12:57 PM

شكرا يا جماعة على ردودكم وكلامكم الجميل
وبالنسبة للمحضر يعني هشتكي الشرطة في بعضيها
يعني انا مثلا كان معايا الاسرة ولسه ورايا مشاوير
هاعطلهم واعطل نفسي وممكن الامور تتطور
والسؤال ايه المقابل؟؟؟
ياريت حد يقولي

**HRH_Sameh** · 20-11-2008 01:01 PM

beshir_lucky فعلا في شارع البحر قبل مستشفى الزهراء على طول
ومعاك حق ان البلد بقت زجمة وخنقة . . تاكسات . . سرافيس . . موتسيكلات صيني . . عجل . . بشر
انا بقيت بعتل هم مشاوير جوا البلد

**beshir_lucky** · 20-11-2008 01:17 PM

بص مشاوير جوه البلد دي ملهاش غير ثلاث حلول:
1. تركن العربية في أحد الشوارع الرئيسية مثل عبد السلام عارف وتقضي مشاوريك مشي دا في حاله لو مش معاك حد أو مش معاك شيل تقيلة ودا غالباً نادر.
2.حل إقتصادي وسهل ومريح ورياضي كمان :) وهوا العجلة ودا غالباً صعب شوية علي بعض الناس.
3.الموتوسيكل ودا حل لذيذ وظريف لأنه بيخترق أي زحام مروري ببراعه (هيخرجك من الزحمه زي الشعره من العجين) مفيش أي مشاكل في الركنه، أنا عن نفسي بستخدمه أوقات كتييرة لما بنزل بس حاليأ ضاع من التصريح المؤقت ومش عارف أعمل إيه بعد كده.

طبعاً الحلول الثلاثة صعبا شويه إنها تكون حل قاطع ممكن تقول حل مؤقت لظرف معين
فالحل اللي أنا شايفه لمشكلة البلد دي إن المرور يشغل دماغه حبتين ويوضع حلول للمشكلة دي لأني شايف لو إتسابت علي كده وده اللي هيحصل مش هنعرف نمشي في البلد دي بأي طريقة مستقبلياً.
علي فكره المرور بيوضع حلول وبيخطط الطرق والمطبات والإشارات بطريقة توصف بأنها بعيدة عن العقل تماماً.