الموضوع: شروخ كتير في الحوائط والنجارة .. عايز أعالجها .( صور ) .

المشاركة الأصلية كتبت بواسطة tarekzein

الشروخ دى مش طبيعيه

عندك شروخ فاصل بين الكمر والمبانى وده ممكن

باقى الشروخ عباره عن تمزيع فى الحوائط وترييحات فى كل اتجاه

البيت كام دور

نوع التربه المبنى عليها

نوع الاساس ( خرسانه / حوائط حامله (



عايزك كمان تجيب زلطه او طوبه وتمشيها على الحوائط قبل الشرخ وعليه وبعده ( وتسمع الصوت وتقولى أخباره إيه وفيه فرق فى الصوت الاماكن والا لأ )

المشاركة الأصلية كتبت بواسطة msobhy

كلام زميلنا سليم 100%
انا مش عايز اخوفك لكن الشروخ ديه مش طبيعيه نهائى
انت الخشب بيتمزع عندك - وده معناه والله اعلم ان حركة الحوائط عندك زايده اوى
مش متأكد من المعلومه - لو محرت وبدأت نقاشه على طول المعجون يطقطق لكن عمر ما الحيطه تشرخ ابدا
انت بيتك كام دور - نوع التربيه اللى مبنى عليها البيت ايه - اساسات البيت ومساحته وعدد العمدان
ان شاء الله يكون كل اللى فى بالى غلط - وان شاء الله تيقى بسيطه

البيئة اللي فيها البيت .. انا عارف ان لها دور هشرحه دلوقت
لكن رغم البيئه دي .. في بيوت وعمارات كتير حوالية مفهاش المشكلة اللي عندي
انا عارف سبب المشاكل اللي عندي وهم 3 مشاكل

1- الارض كانت زراعية وما زال في بعض الاراضي زراعية حوالية
وبما اني جنب الدائري وعلى شارع اسفلت واسع رئيسي .. وفيه اراضي كتير فاضيه في المنطقه
الشارع ده عبارة عن طريق لجميع انواع النقل الثقيل .
يعني عربيات نقل كبيرة راحه جايه محملة زلط او رمل او طوب او اسمنت او هدد بيوت وتراب
بما ان المنطقه جديده وناس بتبني وكده .. غير المقطورات والاوناش وكل انواع النقل بيدخل يجرج ويخرج 24 ساعة .
ديما كوباية الميه .. الميه فيها بتترعش وتتمرجح .. اي حاجة رقيقة زي سلك كهربا مثلا الاقي بيتمرج بشكل مستمر 24 ساعة .. وردة في فاظة بتترعش .

مابيعديش ساعة بدون ما انا شخصياً اتهز عالكرسي وسعات شاشة الكمبيوتر تتهز .. لما عربية تقيلة تعدي .. وسعات بيعدي بالاربع عربيات جنب بعض

البيت 3 بلكونات وارضي وسطح وانا الدور الاخير قبل السطح .. و عمر البيت 10 سنوات تقريباً
البيت معموله اساس كويس جداً عواميد وخرسانه وكمر مخفي في السقف وكمر ساقط .. ونظام مكعبات الخرسانة اللي في الارض تحت كل عمود دي .. والعمود كبير مش اي كلام والسقف والعواميد فيها حديد كتير .

2- اني وضبت وشطبت في الشتاء .. ودي سبب شروخ الخشب او المسافات اللي بين الخشب وبعضه .. لان في الشتاء كان الخشب منفوخ حجمه زايد .. وجه الصيف انكمش
وأحتمال نفس السبب في الحوائط .. لأن الشروخ حجمها بيقل في الشتا

3- الصنايعية شغلهم مش مظبوط

فأنا دلوقت عايز اصلح المشكلة دي .. علشان اعرف استقر في شقتي وافرشها .. ونفسيتي ترتاح

انا اتعودت على المراجيح اللي موجودة على طول .. لدرجة اني مابقتش افرق بين الزلزال والعربيات النقل اللي بتعدي .. لأني في حالة زلازل مستمرة .

وموضوع الاهتزاز ده رغم خطورته بس انا شايف انه اقل الاسباب .. في عمارات عالطريق عدل بقالها 25 سنة 8 ادوار و 9 ادوار .. ومعندهمش المشاكل اللي عندي دي .. واللي عنده بتبقى حجات بسيطة

لكن انا عندي كتير اوي اوي .. مفيش حيطة سليمة عندي .

حتى موضوع ان اكسر حوالين الشرخ وكده .. انا مستصعبه .. لأن الشرخ مش خط لوحده
ده متفرع منه خطوط تانيه وداخل معاه خطوط .. خرايط .

حاسس اني هشتغل نحات افضل احنتف في كل شرخ .. مع العدد ده كله في الشقه الموضوع مرهق اوي .. وكمان هحتاج ادهن الحيطة يعني الشقة كلها هتتعمل نقاشة يعتبر من جديد .

هل في حل غير التكسير على كل شرخ والمعجون وكده .

اعتقد ان الموضوع مش محارة سيئة فقط البنا كمان شغله مش تمام (الدليل الترييحات بين الجدران والكمر والعمدان)
فى الاماكن والحالات الي زي حضرتك يفضل الصبه تكون بعد بناء الجدران الخارجيه للشقه (الفيف الخارجي) لانها زي ما ليها عيب انك متقدرش تشيل جدار او تحركه لكن فى المقابل بتقلل من ظهور ترييحات الجدران ( الشقوق )

الحل : بلاش تعالج اى حاجه دلوقتي
اصبر سنه او اتنين كمان وبعدين ابدأ دور على الحل المناسب لميزانيتك ووقتك ساعتها