الموضوع: مشكلة غريبة و عجيبة في كشافات n16

السلام عليكم و رحمة الله و بركاته

يسعدني و يشرفني إني أنضم لأكبر مركز للمعلومات عن الجبارة نيسان صني

أنا عندي مشكلة غريبة أوي دورت على النت و مش لاقي أي حد حصل معاه نفس الموضوع

من يومين كنت في إسكندرية ساعة البرق و الرعد و الأمطار و طبعاً إسكندرية كلها غرقت و العربيات كانت بتعوم في المياة في الشارع زي المراكب أكتر ما بتمشي على الأسفلت و بعد ما رجعت من السفر و روحت نزلت تاني يوم لقيت الحارس بتاع العمارة غاسل العربية غسلة حلوة كدة و لقيت النور العالي بتاع الزينون شغال
فتحت العربية قلت ممكن أكون نسيت الكشاف شغال و لا حاجة لقيت كل حاجة مقفولة و مفيش غير النور بتاع الكشاف هو الشغال رغم إن الذراع مقفول
و لا بيعمل نور واطي و لا بيعمل رعاش هو شغال على العالي بس حتى و أنا شايل المفتاح
رحت لكهربائي سيارات فصل الكابلات بتاعة الزينون و قالي لما تنشف تعالالي و أنا اركبهالك تاني
بس أنا مش مقتنع بالعمله علشان لو هي فعلاً قفلة بسبب المياة كانت الكشافات هتكون شغالة لكن لمبة الكشاف في التابلوه هتكون مطفية و أنا عندي اللمبة بتاعة الكشاف العالي في الطابلوه شغالة على طول حتى بعد ما فصل الزينون

ياترا في حد حصل معاه الموضوع دا قبل كدة

العربية نيسان صني 2011 الشكل القديم سوبر صالون