الموضوع: مجموعة اسئلة غريبة عجيبة من واحد لسة بيتعلم ارجو الرد العلمى عليها

المشاركة الأصلية كتبت بواسطة menu

اولا ال rpm بياخد القراية بتاعتو منين من الموتور ولا من العجل طب لو من الموتور لية وانا بنقل مثلا من التانى لتالت الاقى ال rpm بينزل معايا وبعدين يرجع يعلى تانى انا بقول بقى بذكائى دا بياخد منن العجل عشان وانا بنقل بفصل الحركة لفات العجل بتقل فبيقل معايا ال rpm ولما ادى الغيار بعد كدة بيعلى معايا بس ان امش مقتنع بدة بصراحة انا مش عارف حاجة ياريت حد يقولى القصة دى ماشية ازاى

العداد بتاع الRPM بيقرا عدد النبضات اللى طالعة من البوبينة و بيترجمها للفات فى الدقيقة و بالتالى اجابة سؤالك حتبقى ان العداد بيقراء من الموتور و ملوش علاقة بالفتيس او العجل

الRPM بيوطى لما بتنقل لان انت بتعشق ترس اصغر و بتغير نسبة التخفيض بين لفات الموتور و لفات العجل و هى دى اساسا فكرة الفتيس

ثانيا عاوز اعرف سبب فرق العزم بين عربية وعربية واية الى بيعمل الفرق دة وايى هوا العزم اساسا وبيجى منين وازاى

العزم هو القوة المؤثرة على جسم و تؤدى الى دورانة حول نفسة... و فى بعض الاحيان بيبقى اسمة عزم التدوير او الدوران... و العزم دة هو اللى بيفرق فى تسارع العربية (السحب)

العزم مرتبط ارتباط وثيق بسعة المحرك اللترية... كل ما السعة تزيد العزم بيزيد... و كمان فيه فرق مهم بين العربيات فى موضوع العزم و هو عدد اللفات اللى بيطلع عندها العزم... كل ما كانت اللفات اقل كل ما كانت العربية سواقتها اسهل داخل المدينة لانك مش حتحتاج تحرق عشان تحصل على تسارع

ثالثا عاوز اعرف لية الموتور صوتو بيعلى لو منقلتش طب لية النقل اساسا اية النظرية العلمية فى كدة بصراحة انا نفسى فى شرح للحكاية بالضبض الملخبطة دى

النقل اتعمل عشان تخفيض لفات الموتور... تخيل كدة لو الموتور متصل بشكل مباشر بالعجل... و الموتور فى اقل عدد لفاتة بيلف 800 لفة فى الدقيقة... ازاى و انت واقف مكانك حتنتقل العجلات فجاءة من صفر الى 800 لفة فى الدفيقة؟؟

محدش اساسا حيعرف يطلع بالعربية بالشكل دة لان دة بيقابل محاولة الطلوع من ثبات على الترس الرابع... لازم يحصل تخفيض لعدد لفات الموتور من خلال الفتيس لضمان الانتقال السلس من وضعية الثبات و التسارع

رابعا عاوز اعرف لية لو فضلت ماشى على الأول وبدوس بنزين على الأخر العربية هتولع منى لية الموتور بيسخن لية مهى ماشية
لو فرضنا أن مفيش غير غيار واحد وندوس بنزين وخلاص لحد منجيب اخر العربية اية المشكلة
لية وجع دماغ الغيارات دة كل شوية تانى وتالت ورابع وموتور يسخن ويولع وحجات تانية كتير

عشان نفس فكرة التخفيض... لو مشيت على الاول طول الوقت حيبقى الموتور عند 5000 او 6000 لفة و دة اجهاد علية و مع سرعة السير البطيئة دى ممكن سريان الهواء من خلال الرادياتير يبقى قليل و الميه متبردش بسرعة كافية فى حين ان الموتور ماشى بكامل طاقتة او اقل حاجة بسيطة فا حيسخن... دا غير استهلاك الوقود الفظيع

خامسا خامسا لو انا ماشى على الرابع ونزلت على التانى عدل فيها اية اية المشكلة فى دى

لازم تبقى سرعة العربية مناسبة للترس التانى... يعنى متبقاش ماشى 100 على الرابع و تحط تانى... العربية حتكلبش و تفرمل فى الارض و ممكن فى بعض الاحيان تجبر الموتور على انه يلف عدد لفات اكتر من المسموح بيه و تكسر شواكيش الصبابات

MMamdouh