أرجو مساعدة الخبراء في اختيار السياره المناسبة و سرعة الرد

**Ahmed684** · 04-10-2015 08:14 PM

كنت محتاج أعرف أرائكم القيمه في العربية المناسبة (أول عربية أجيبها ) لي وفقا للمعايير التاليه:

1- اني عندي 19 سنه و بالتالي محتاج عربيه شبابيه مش عجايزي و في نفس الوقت العربيه مش لي لوحدي (العائله) و بالتالي مش عاوزها تكون صغيره.

2- تكون ماكسيمام ب150000 .

3- تكون مضمونه من حيث توافر قطع الغيار بأسعار مناسبه , جودة التوكيل , الأعتماديه , ضمان سعر مناسب في حالة اعادة البيع , القيمه مقابل المال , الكاماليات , عوامل الأمان , جودة التصنيع و خاماته.

بعد بحث دام ما يقرب من شهر أريأفضلهم :
1- ميتسوبيشي لانسر شارك 2016( الفئه الثانيه ب147000 " abs و وساده هوائيه واحدة " )

2- بيجو 301 2016(هاي لاين ب 137000 " abs ebd 2 وساده هوائيه و فوانيس ضباب أمامي و خلفي و بارك سينسور و تقريبا جميع الكامليات " )

رأيي بيجو أفضل و لكن ماعنديش خبره في العربيات عشان كده محتاج أعرف أرائكم و لو حد شايف عربيه ثانيه أفضل يقولها و أرجو من الجميع ابداء سبب أرائهم.

و شكرا مقدما و أرجو سرعة الرد لأنه سأحجز السياره المختاره يوم الأربعاء ان شاء الله.

**moha sasa** · 04-10-2015 11:37 PM

**Ahmed684** · 05-10-2015 12:42 AM

شكرا علي الرد بس عاوز أعرف سبب تفضيلك لالشارك رغم خلوها من الأوبشن و الكماليات علي البيجو الفول أوبشن

**مصطفى عصام** · 05-10-2015 12:50 AM

بيجو 301 طبعا

عوامل امان وكماليات وعربية شيك جدا عن الشارك ،
وواسعة كتير عن الشارك

**Ahmed684** · 05-10-2015 01:22 AM

المشاركة الأصلية كتبت بواسطة مصطفى عصام

بيجو 301 طبعا

عوامل امان وكماليات وعربية شيك جدا عن الشارك ،
وواسعة كتير عن الشارك

و بالنسبه لاعادة البيع و ايه أخبار توكيل بيجو؟

و شكرا علي الرد

**د.مروان راغب** · 05-10-2015 02:37 AM

بص حضرتك انا كنت محتار بين الاثنين و كان اختيار صعب لحد ما عملت استخارة اكتر من مرة و ربنا وفقنى فى البيجو.
و برده حقولك المقارنة:
اللانسر:
مزايا:(عن البيجو)
1-شكل شبابى اكتر.
2-ما فيهاش مشاكل بعد ان اتجربت فى السوق كذا سنة(البيجو بقالها حوالى 3 سنين و نسبيا برده مافيش مشاكل عامة)
3-سعر اعادة بيع افضل.
4-الكراسى الامامية اوسع.

عيوب:(مزايا فى البيجو)
1-الشنطة صغيرة.(البيجو اكبر بكتير)
2-صوت الموتور عالى و العزل اقل من البيجو.
3-قطع الغيار اغلى شوية من البيجو و لما نزلت عند تجار قطع الغيار قالوا لى حاجة البيجو متوفرة اكتر.
4-السعر الاساسى للسيارة بنفس الكماليات اغلى.

**pepo2011** · 05-10-2015 10:32 AM

البيجو واتوكل علي الله

**Ahmed684** · 06-10-2015 01:15 AM

المشاركة الأصلية كتبت بواسطة د.مروان راغب

بص حضرتك انا كنت محتار بين الاثنين و كان اختيار صعب لحد ما عملت استخارة اكتر من مرة و ربنا وفقنى فى البيجو.
و برده حقولك المقارنة:
اللانسر:
مزايا:(عن البيجو)
1-شكل شبابى اكتر.
2-ما فيهاش مشاكل بعد ان اتجربت فى السوق كذا سنة(البيجو بقالها حوالى 3 سنين و نسبيا برده مافيش مشاكل عامة)
3-سعر اعادة بيع افضل.
4-الكراسى الامامية اوسع.

عيوب:(مزايا فى البيجو)
1-الشنطة صغيرة.(البيجو اكبر بكتير)
2-صوت الموتور عالى و العزل اقل من البيجو.
3-قطع الغيار اغلى شوية من البيجو و لما نزلت عند تجار قطع الغيار قالوا لى حاجة البيجو متوفرة اكتر.
4-السعر الاساسى للسيارة بنفس الكماليات اغلى.

متشكر لرد حضرتك الوافي

بس كنت عاوز أعرف رأيك في البيجو و ماشي بيها كام كيلو

**د.مروان راغب** · 06-10-2015 02:28 AM

حتى الان اكتر من 4000 كم بشوية.
رأيى عربية رااااااائعة.
استهلاك بنزين معقول جدا،ثبات جيد جدا،فرامل تمام،الحاجة الوحيدة اللى ملاحظها ضعف التسارع يعنى من الاول للتانى العربية تقيلة شوية و بعد كدة بتفتح فى السرعة(انا بتكلم على الاوتوماتيك).
و اماكن (جيوب) التخزين قليلة.

**Unendlich** · 06-10-2015 11:26 PM

احنا للأسف عندنا 2 لانسر الفئة التالتة (abs و 2 ايرباج و شبورة و جنط و سبويلر)
و بقولك بالفم المليان البيجو طبعا
عفشة و فرامل البيجو لا يعلي عليهم
و أسعار قطع غيار الشارك مهزلة, ولا لو كانت bmw (استيراد و جديد أصلي)