انا هتجنن من التفاوت الغريب بين اسعار الميجان المستعمل على المواقع

**asaeed** · 05-10-2015 05:23 PM

انا فعلا مبقتش عارف العربية دي تعمل كام من كتر ما بسمع اسعاار متفاوتة على مواقع البيع زي دوبيزل وكونتكت
يعني ساعات الاقي عربية صاحبها طالب ٥٥٠٠٠ موديل ٢٠٠٦ فئة ثانية ونفس العربية بس فيئة اولى الاقي واحد طالب ٦٥٠٠٠ جنيه واوقات بيطلبو ٧٠٠٠٠ جنيه
لدرجة اني شفت عربية وعجباني ولكن من كثرة تفاوت السعر خايف اخدها لحسن يكون انضحك عليا فيها
عموما انا هقول المواصفات وانتم لكم الحكم في السعر
العربية اصدار اواخر ٢٠٠٦ اتوماتك اول فئة اللى نزلت بمثبت سرعة ومحدد سرعة
فبريكة برة وجوة ولم ترش نهائيا بها رعشة بالموتور عند التشغيل وصوت الموتور عالى مع الرعشة دي وغالبا هي قاعدة الفتيس او قاعدة موتور والفيتيس والموتور على كلام صاحبها انه تمام ولو فيه حاجة هيتأدب بتمن الكشف تمام وحالة عامة كويسة استخدام اول يد من الزيرو
المرايات شغالين كهرباء ولكن البنز المتحكم في ضم المرايات شكله مكسور وهيتغير
الكاوتش حالته معقولة
القماش الخاص بالسقف ساقط وعايز يتلزق عند سروجي كويس
السؤال بقى اسعار العربية دي لو حالة كويسة تعمل كام ولو حالة وسط تعمل كام
السؤال الثاني والاهم هل فيه مركز كويس في مدينة نصر يفحصها فحص كمبيوتر وكشف على الحساسات وابكهرباء والكنترول وعفشة وموتور وبودي شااااااامل ويديني تقرير بكل حاجة فيها ويكون مضمون؟؟؟
ارجو الرد ضروري وجزاكم الله خيرا

**medo 2015** · 05-10-2015 07:59 PM

بص يا باشا العربيه دى لو حاله كويسه 65000 وقليل عليها والله ولو محتاجه مصاريف من 58000 الى 60000 لان قطع الغيار مش غاليه
اطلع اكشف عليها فى صقر وريح دماغك

**asaeed** · 05-10-2015 09:17 PM

يعني افهم من كده انه لازم مركز متخصص في الرينوه يفحصها... وهل مينفعش افحصها في مراكز فحص السياران على الرغم من ان فحصهم كمبيوتر؟؟؟

**medo 2015** · 05-10-2015 09:37 PM

لازم حد يكون بيفهم ومتخصص رينو والا هيقعد يفتيلك وخلاص

**asaeed** · 05-10-2015 10:32 PM

المشاركة الأصلية كتبت بواسطة medo 2015

لازم حد يكون بيفهم ومتخصص رينو والا هيقعد يفتيلك وخلاص

جزاك الله خيرا اخي الكريم على النصيحة...
والله من كتر ما خوفوني من الرينو ميجان بالذات وانا حاطط ايدي على قلبي.. ربنا يستر

**aYaBooY** · 06-10-2015 11:54 AM

سيدي الفاضل موضوع الكشف ده مهم جدا يكون في مكان متخصص في العربية علشان يكون عارف خباياها كويس و الكلام على كل السيارات الأوروبية
موضوع الكشف بتاع البنزينة بالكمبيوتر و معرفش جهاز ايه و الكلام ده كله ينفع مع العربيات الكوري و الصيني لانهم كصناع مش بيعدوا يتفننوا في البرمجيات بتاعتها زي العربيات الأوروبية
غير كدة انت محتاج متخصص علشان يكون عارف يقيم حالة الموتور كويس يعني انا معايا فورد لما الموتور يكون مفوت و بيطلع دخان بيقري 75% على جهاز الكبس و لما بكلم ميكانيكي فاهم يؤكد الكلام ده و يحدد انه بيعرف حالة الموتور عن طريق صوت بعض اجزائة زي التكيهات و الكستبان.