تقرير عن تسقيط موتور فليشيا كامل

**Amrorshwan** · 08-10-2015 05:10 PM

اولا : المشاكل اللى قابليتنى وخلتينى اقرر ان أسقط موتور
1- غيرت طقم شمبر عشان العربية كانت بتاكل زيت - وفشل فشل زريع بعد ما صرفت 1200 ج ده غير العطلة وشراء الحاجات للبيه الميكانيكى - ورجعت تاكل زيت تانى بعد شهرين بالتمام والكمال .
2- العربية بيركب لها 2 جوان وش سلندر - قوم ايه البيه الميكانيكى ركب جوان وش السلندر مقلوب (شكله كان ضارب بنجو ) مما أدى إلى سد ثقب الزيت اللى بيغذى التكيهات والعربية اتخنقت وبقت زفت وطبعا لما اكتشفت العيب كان عند واحد ميكانيكى تانى - وبالتالى غرمت 500 ج على تغيير 2 جوان وش السلندر .
3- الموتور كان زى الزفت واستخسرت اعمل فيه حاجة وكان امامى حلين
- أما انى اعمل عمرة هتدخل فى مبلغ 3500 ج
- او اسقط موتور كامل بتكلفة 4000 ج
ثانيا : رحلة البحث عن موتور استيراد ابن حلال وبسعر كويس
- نزلت الحرفيين عند واحد اسمه فاروق اسكودا - بشارع مرسيدس (شارع مشهور هناك) بعد كلام واستفسار هياخد 4000 ج فى الموتور الكامل و 3000 ج فى الشورت بلوك دا غير 100 ج ورق
- قولت اروح عزبة شلبى اشوف الدنيا فيها ايه وهل حالة المواتير هناك احسن وارخص ولا ايه - ضربت 5000 فى جيبى وتوكلت على الله يوم السبت أجازتى وطلعت على عزبة شلبى - طبعا ولا ميكانيكى ولا يحزنون كلهم بيفتوا وعاملين فيها ناصحين .
- قلبت هناك فى المواتير عند 3 تجار بيبعوا مواتير إستيراد - الملحوظات اللى جمعتها فى الاول
- الاسعار كلها تقريبا واحدة اى كانت حالة الموتور وهى من 3000 ل 3200 ج
- المواتير الكربراتير تعبانة ومزيتة وقديمة وخسارة فيها الفلوس
- المواتير الإنجكشن حالتها كويسة بس ملعوب فيها شوية - (ممكن يحط المارش والدينمو بيبروقوا وبحالة كويسة للفت انتباهك انه موتور بحالته لسة ) مع انى الموتور ده اللى كان بيقنعنى بيه - مغيير جوان وش سلندر وواضح جدا - من الجوان كارتون اسود وظاهر من وش السلندر
- الملحوظة الهامة بقى هنا - لاحظت ان الموتور اللى بحلته لايمكن ترى جوان وش السلندر ابدا لانه معدن ومش بيبان من وش السلندر - المسامير اللانكيه بيبان عليها اذا كانت محلولة قبل كدة ولا لاء .
- المهم قعدت اقلب فى المواتير حوالى ساعة ونص وبعدين هوا قالى شوف الماتور اللى بيعجبك وانا هاجيبلك ميكانيكى قريب من هنا يسقطهولك ب 300 ج بس ويختاروا معاك كمان - قولت له ماشى اتصل بالميكانيكى - جه الراجل فى 10 دقايق - قولت له استحلفك بالله تختار بما يرضى الله معايا موتور نسقطه وبدون مجاملة لقريبك ده - وانا اخترت 3 مواتير كويسين تختار منهم واحد - قعد يقلب والراجل كان مدينى مفتاح كبير ادور بيه الموتور قال ايه عشان اشوف كبس الموتور - طلع اونطة - الميكانيكى قالى احنا بنلف بيه الموتور عشان نتأكد ان مافيش حاجة داقرة جوه انما الكبس ده لا يمكن حد يعرفه الا لما الموتور يتركب ويدور جوه العربية . المهم تم اختيار احسن موتور كنت مختاره فى ال 3 مواتير
- نيجى بقى للدفع بعد الفصال الموتور كامل عمل 3000 ج بالعافية والميكانيكى هيسقطه ب 450 ج مش 300ج تحت بند فك اى حاجة من الموتور وتغيرها من محل الاستيراد - وهابيع الموتور البلوك القديم مع الفتيس ب 200 للراجل لانى كنت مستعجل ومش عندى استعداد الف بيه او اخده البيت
ثالثاً : رحلة تسقيط الموتور (رحلة العذاب )
- اول يوم - الميكانيكى : الساعة 3.30 عصرا - قالى حضرتك انا عندى شغل وبكرة ان شاء الله تيجى تلاقى الموتور متسقط فى العربية عشان عاوز ابص على طقم الدبرياج كويس ولا هنغيره
- ثانى يوم : الميكانيكى : الساعة 5 مساءً : أنا - ايه يا أسطى مش سقطت الموتور ليه ؟؟ هو دا اللى احنا متفقين عليه ؟؟ الميكانيكى : يا باشمهندس انت مش جيت لقيتنى شغال فيه لابلا بلا لابلا بلا . طيب قعدت معاه لحد الساعة 9 مساءً لحد ما نزل الموتور القديم - قالى بكرة ان شاء الله هتيجى تلاقيها دايرة
- تالت يوم : الساعة 5 مساءً : شغال فيها بس لسة مش دارت وقعد يضبط فى التقسيمة بتاعة الاسبراتير حوالى ساعة ونص وعصاية الفتيس روحت غيرتها عشان قصيرة ودا فتيس موديل سنة 1998 محتاج عصاية اطول وركبها اى كلام والعربية مش كانت عاوزة تجيب مارشيدير وبعد مناوشات وخلافات ضبطها وبقت شغالة بس حاسس انه فى حاجة مش تمام فى الفتيس والموتور صوته خروشة عالية (طقم كاتينة - جايلك فى الكلام) المهم - الساعة بقت 11 مساءً والميكانيكى كان ناقص يطردنى من المحل مع انى انا اللى هاديله فلوس مش هو اللى هايدينى .
رابعاً : رحلة اكتشاف الموتور الجديد - قصدى الاستيراد
وانا مروح من عند الميكانيكى
- العربية بطلت مش رديت تدور الا بالزق - ( الدينامو مش بيشحن )
- نقالات الفتيس - تيجى تجب الاول العربية تطلع على التانى او التالت - تجيب التانى يجيب الرابع - الوحيد اللى كان مظبوط الثالت والمرشيدير فقط - المهم روحت بعون الله وفضله
رابعاً : استكمال تظبيط الموتور والفتيس
رحت للميكانيكى بتاعى عشان نشوف القصة ايه - ماهو لا يمكن ارجع للميكانيكى الحلاق اللى كان هاين عليه يطردنى من المحل - المهم لقيته مقموص وبيقولى ما قولتليش ليه كنت جيت معاك وانا باعرف اسقط مواتير باردو وليه تروح برة (البيه كان قايلى تسقيط الموتور 1000 ج ) - المهم راضيته بكلمتين وقولت له انا كنت عاوز واحد جنب الراجل اللى اشتريت منه عشان نقدر نبدل اى حاجة بسرعة وهو شغال
- ظبط عصاية الفتيس كانت عاوزة يتوسع لها الثقب فى الطرف عشان تدخل مسمار 13مم وتربطه فى ذراع الفتيس من تحت عملها كويس وغيرنا اولسيه الفتيس وخد 120 ج
- روحت له تانى يوم وجبنا طقم كاتينة وطرمبة مياه والريداتير كان مخروم - غيرته - بتكلفة اجمالية 800 ج
خامساً : النتيجة والتكلفة النهائية
الموتور - بسم الله ماشاء الله صوته ناعم جدا وسحب العربية بقى ممتاز
الفتيس - جميع النقالات ممتازة ومافيش بوش زى الفتيس القديم
التكلفة النهائية :
موتور كامل 3000 ج
مصنعية تسقيط 450 ج
طرمبة بنزين يابانى 150 ج
جوانات وأولسيهات 100 ج
طقم كاتية بالتروس 200 ج
طرمبة مياه فيكا 175 ج
ريدياتير صينى 210 ج
مصنعية كهربائى 120 ج (إصلاح الدينامو - وتوصيلات طرمبة البنزين الكهربائية )
مصنعية ميكانيكى 320 ج (الميكانيكى الاضافى اللى ظبط الدنيا شوية )
مصروفات أخرى 150 ج (حاجات صغيرة مش فاكرها بصراحة )
زيت موتور وفلتر 100 ج
المجموع 4975 جنيه بالتمام والكمال قول 5000 ج
هتقولى طب فين 200 ج اللى بعت بيهم البلوك القديم والفتيس - هاقولك راحوا فى الورق بتاع الموتور هههههههه
طب ليه استعجلت وبيعته ب 200 ج بس لانى مش فاضى وكنت مسافر مصيف ومش عندى استعداد الف بيه عشان ابيعة بزيادة بالكتير 100 او 150 ج بس
طب اسم المحل اللى اشتريت منه : اسمه الصعيدى - ناس كويسين ومحترمين - سلمنى الورق بعد 3 اسابيع بالضبط بس فاضل رقم الصادر هاخده منه بالتليفون
أى سؤال من الاعضاء انا تحت امركم - انا حبيت اكتب لكم تقرير عشان لو حد اتحط فى المواقف دى يعرف يتصرف ويعرف يقرر هل عمرة احسن ولا تسقيط موتور احسن
اسف على اللت والعجن اللى فى التقرير بس حبيت اشركم فى كل كبيرة وصغيرة

**sakr_skoda** · 08-10-2015 10:21 PM

انا قريت موضوعط جرف حرف وفعلا حزين جدا على لالمأساه اللى انتا مريت بيها وياريتك كنت تسال قبل ما تعمل اى حاجة وعريب جدا جدا انك تبيع الماتور بتاعك ب200 مع ان الفتيس لوحدى بيتباع ب750 غير المارش والدينمو يعنى انتا كان ممكن تركب الفتيس بتاعك على المكنة الجديدة كان ممكن اتركب الدينمو بتاعك على الموتور الاستيراد المارش يفضل عندك اسبير انا كدا بصراحة زعلتنى وعلى فكرة فك وتسقيط الموتور احنا بنعمله بنفسنا فى البيت بدون اى مساعدة الموضوع سهل جدا وياريت تنضم لينا فى الجروب دا حنعلمك ازاى تصلح عربيتك بنفسك ومتخليش حد يلعب بدماغك تانى***

https://www.facebook.com/groups/Felicia.Vaforit/

**Amrorshwan** · 11-10-2015 12:08 PM

المشاركة الأصلية كتبت بواسطة sakr_skoda

انا قريت موضوعط جرف حرف وفعلا حزين جدا على لالمأساه اللى انتا مريت بيها وياريتك كنت تسال قبل ما تعمل اى حاجة وعريب جدا جدا انك تبيع الماتور بتاعك ب200 مع ان الفتيس لوحدى بيتباع ب750 غير المارش والدينمو يعنى انتا كان ممكن تركب الفتيس بتاعك على المكنة الجديدة كان ممكن اتركب الدينمو بتاعك على الموتور الاستيراد المارش يفضل عندك اسبير انا كدا بصراحة زعلتنى وعلى فكرة فك وتسقيط الموتور احنا بنعمله بنفسنا فى البيت بدون اى مساعدة الموضوع سهل جدا وياريت تنضم لينا فى الجروب دا حنعلمك ازاى تصلح عربيتك بنفسك ومتخليش حد يلعب بدماغك تانى***

https://www.facebook.com/groups/felicia.vaforit/

شكراً على الرد يا أستاذ صبحى انا فعلا متابع كل مواضيعك عن دورس تعليم تصليح الفليشيا واستفدت منها كتير واحيانا كتيرة بعمل حاجات بنفسى فى العربية بس الحاجة الوحيدة اللى انا متأكد منها انى مش هاعرف اسقط موتور بنفسى واخاف اخوض تجربة زى دى - انا خوفت اصلا اغير جوان وش السلندر بنفسى يبقى هاسقط موتور ؟ هههههههههه
بالنسبة للفتيس القديم+البلوك انا كنت مضطر ابيعه لانى كنت مسافر مصيف وما كنش ينفع احطه فى البيت حتى عند بواب العمارة - مين هيرضى يشيل ويزيت ويبهدل نفسه - دا بالاضافة انى سمعت قبل كدة ان احسن سعر فى الموتور الخلع 350 ج - فانا اخدتها من قصيرها وقلت مش مهم 150 ج الزيادة دى عشان البهدلة وبيعته وخلصت - اما بالنسبة للمارش انا نسيت اذكر فى الموضوع انه معايا اسبير - والدينمو رجعت له بتاعه مقابل انى خصمت 75 ج بصراحة هو الراجل عرض عليا انى اخد واحد غيره بس انا رفضت لانى كنت خايف اخد واحد بايظ تانى خصوصا ان الميكانيكى غير الدينمو مرتين من عنده ومافيش فايدة - اما 120 ج اللى انا صرفتها كهرباء دى كان من ضمنها اصلاح الدينمو بتاعى كان محتاج يتغير له الطمبورة للسير المشرشر بدل السير العادى وكمان بدلت كتاوت الدينمو مع دينامو الموتور الاستيراد عشان كدة سيبته له ب 75 ج بس .
انا بالفعل انضميت للجروب واتشرف انى اكون عضوا فى الجروب معاكوا

**Amrorshwan** · 11-10-2015 12:14 PM

المشاركة الأصلية كتبت بواسطة alphacharlie

هي تكلفة مش عالية جدا. بس المشكلة في العطلة والبهدلة..
معلش. بس انا لو مكانك كنت ركبت موتور الاكتافيا. بس يلا مبروك

الله يبارك فيك - بس انا اول مرة اسمع ان الموتور الاكتافيا يركب فى الفليشيا - ممكن حضرتك تقصد موتور فليشيا وش اوكتافيا - على العموم الموتور اللى ركبته انجيكشن يعنى تقدر تقول انه موديل سنة 1999 او 2000 يعنى قريب جدا من موتور وش الاوكتافيا او ممكن يكون هو فعلا

**Waled hassan** · 17-10-2015 06:39 PM

انا سألت علي موتور فيليشيا كربراتير عاده يعني يركب عندى علي طول عند البهي في طنطا كامل من غير الفتيس قالى 4000 ج كده غالي ولا ايه والشورت بلوك ب2500 ج بدون اي ادوات تغذيه نهائي الكلام ده صح ولا ايه انا عربيتي فيليشيا 97

**Magdi Hafez** · 13-03-2018 09:04 AM

عفوا - أكون شاكر لحضرتك لو تخبرنا بالميكانيكي اللي قام بضبط الموتور النهائي

**kamal_adly** · 28-06-2018 03:41 PM

انا عندي تجربة حبيت اشاركها فى البوست دا و هي اني كنت شاري العربية مو95 بموتور مو2000 طلمبة بنزين كهربا و و عانيت من مشاكل فيها كتير لغاية ما منت بغير الطلمبة دي كل شهرين لمدة 6 ست شهور رحت بعدها لميكانيكي اسكودا بس في السيدة و عملت تعديل في الموتور عند الخراط و ركب طلمبة ميكانيكا عادية على الكامة اتاري طلع الموتور اصلا فيه طبه ممكن تتفتح و تركب عليه الطلمبة القديمة و من ساعتها الدنيا ظبطت معايا في حكاية الطلمبة