عمرك حسيت بالفشل لما تقارن نفسك بزمايلك اللي بشهادتهم انت عندك قدرات اعلي منهم او تعادلهم علي الاقل و تلاقيهم مثلا سافروا اوروبا و اتعلموا و اشتغلوا هناك و عايشين عيشه نضيفه و انت قاعد هنا في بلدنا الجميله
في واحد كنت اعرفه ايام الدراسه و دلوقت هو بقاله 10 سنين في اوروبا بدء بسويسرا و انتهي و عايش حاليا في بلجيكا
من حوالي 6 سنين نزل و خطب و اتجوز و خد مراته معاه و حاليا هو راجل مشهور علي الفيس و في ناس كتير متبعاه قرب ال 100 الف
الشاب ده كل ما اشوفه علي الفيس بوك بفوق و بحس انا خسرت قد ايه بقعدتي في مصر كل حاجه فيه اختلفت شكله اسلوبه لبسه بقي حاجه تشرف بجد
بينما انا علي المقابل قرفان من شكلي و من اسلوبي اللي اتفرق عليا علشان اعرف اعيش في بلدنا
ساعات بحس اني عمري ضاع رغم اني عندي 34 سنه بس محققتش اي حاجه افتخر بيها قدام نفسي و لا قدام اي حد حتي شغلي رغم اني شاطر فيه بس يعني مفيش حاجه exceptional في وضعي فيه
بحس كده ان اللي سافر بره و عاش بره رغم الصعاب و القرف اللي بتواجهه بيعيش بني ادم حتي لو درجه تانيه
انا سافرت بره كذا مره زيارات قصيره مع شغلي بس القاسم المشترك اني مكنتش عايز ارجع
يمكن الانبهار الاولي راح و بقيت شايف عيوب الحياه بره
مطحنه شغل بس في نفس الوقت الحياه سهله و كل حاجه تقدر تعملها من غير اي صعوبه
مواصلات سهله اماكن خضرا كتير تقدر بالليل تنزل تركب العجله بتاعتك و تعمل شويه رياضه من غير اي مضايقات
الزحمه تكاد لا تظهر رغم وجودها بس طبعا حنا اسوء بكتير
بس برضه مش كل ده اللي بيزعل الواحد
اللي بيزعله ان فعلا كان ممك يعيش حياه افضل بظروف احسن لكن جري ورا العيشه هنا و الشغل في شركه تعتبر كويسه بمرتب كويس
و دلوقت بعد قرب اكت رمن 10 سنين من التخرج للأسف مش راضي عن حاجه في حياتي
ساعات اواسي نفسي و اقول اديني قعدت جنب والدي و والدتي و راعيتهم بس من جوايا عارف ان زمايلي برضه اللي سافروا اوروبا و عاشوا هناك منسوش اهلهم
هلاقي ناس كتير هتقولي العيشه بره صعبه و الحياه زفت و اقسي من مصر هقول عارف بس عيشه نضيفه
يكفي انك انسان عايش في دنيا افضل بكتير من اللي احنا فيها
كان زمان في كاتب قال ان اوروبا جنه في الارض علشان اهلها هيدخلوا النار و البلاد العربيه نار في الارض علشان اهلها هيدخلوا الجنه
في رأيي اننا هندخل النار في الاخره زي ما دخلناها في الدنيا