الموضوع: ايه انواع الفتيس الموجوده ؟؟؟ والفرق بينهم

المشاركة الأصلية كتبت بواسطة kemoelord

شكرا جدا طبعااااااا للشرح الوافي والمفصل من الاستاذ borio1704 مجهود رائع الحقيقة , بس عندي سؤال بخصوص فتيس الـdsg الموجود في الفولكس فاجن , هل نوعية الفتيس دي امنه بمعنى حضرتك قولت ان عمر مجموعة الدبرياج فيها قصير وتغييرها مكلف جدااا فهل يفضل الابتعاد عن شراء السيارات الي فيها نوعية الفتيس ده والي طبعا منها الفولكس فاجن؟؟؟

الحقيقة فتيس الـdsg في الفولكسفاجن يعتبر مثال حي وواقعي لكل مشاكل الفتيس ده.. وحضرتك تقدر تدخل على قسم فولكسفاجن في المنتدى وتعرف قد إيه اللي اشتروا عربيات فيها الفتيس ده أخدوا مقلب محترم لما لقوا إنهم مضطرين يدفعوا 20-40 ألف جنيه لصيانة الفتيس خلال 3 سنين من شرائها.

الفتيس يعتبر ما زال في بداياته وقطع غياره ما زالت تعتبر حكر على شركات معينة... وبمجرد نزول فتايس مشابهة من شركات أخرى وتثبت عملانية واعتمادية أعلى .. أكيد الكلام ده هينزل أسعار الصيانة في المستقبل.

أنا شخصيا لا أفضل المنتجات الأوروبية والألمانية بسبب مشاكل الصيانة وتكلفتها العالية جدا... من الآخر المنتجات الأوروبية عايزة استخدام راقي... وده غير متوفر برة القارة الأوروبية.

المشاركة الأصلية كتبت بواسطة kemoelord

السؤال الثاني معلش , دور دواسة الدبرياج في الفتيس المانيوال هو نقل حركة المحرك الى الفتيس عن طريق محول العزم ,انا كدا فاهم صح ؟ ولو كدا لما اجي احطه ع n او المور هل كدا بفصل محول العزم عن تروس الفتس صح ؟؟

معلش أنا محتاج حضرتك توضحلي...

حضرتك بتسأل على الفتيس المانيوال ولا الفتيس الأوتوماتيك؟


...

المشاركة الأصلية كتبت بواسطة kemoelord

السؤال الثاني معلش , دور دواسة الدبرياج في الفتيس المانيوال هو نقل حركة المحرك الى الفتيس عن طريق محول العزم ,انا كدا فاهم صح ؟ ولو كدا لما اجي احطه ع n او المور هل كدا بفصل محول العزم عن تروس الفتس صح ؟؟

المشاركة الأصلية كتبت بواسطة kemoelord

انا بسال عن دور دواسه او بدال الدبرياج في العربيات المانيوال ( الفتيس المانيوال) سؤالي تعليمي مش اكتر , يعني ما هي وظيفته ؟ هل زي ما انا كاتب كدا ولا ؟

لا يا فندم...

محول العزم مش موجود إلا في الفتيس الأوتوماتك وفتيس الـCVT بس.. إنما بقية الفتايس فيها إما اسطوانة دبرياج عادية أو مزدوجة أو مجموعة قوابض (Clutch Pack)

إنما اسطوانة الدبرياج (ببساطة) هي مجرد اسطوانتين .. واحدة خشنة من مادة خاصة .. والتانية معدنية ناعمة... وبيمسكوا في بعض بقوة عن طريق الضغط .. فساعتها العمود اللي جاي من الموتور بيلفف العمود اللي رايح للفتيس.

يعني نقل الحركة بيتم بالاحتكاك... علشان كده اسطوانة الدبرياج بتبقى معمولة من نفس مادة تيل الفرامل.. وبتتآكل مع كل مرة بيحصل تلامس بين الاسطوانتين... خصوصا في بداية التعشيق أو الفصل.

لما حضرتك بتدوس دبرياج فاللي بيحصل إن واحدة من الاسطوانتين بتبعد عن التانية.. فالفتيس كده حركته اتفصلت,


الفيديو ده فيه شرح واضح عن كيفية عمل اسطوانة الدبرياج

https://www.youtube.com/watch?v=pqF-aBtTBnY



محول العزم بقى ما بيفصلش خالص...

تخيل محول العزم عبارة عن حاجة شبه الخلاط بتاع العصير... المروحة اللي تحت بتلفف السائل بسرعة... ولو حاولنا نحط مروحة تانية فوق من ناحية الغطا هتلاقيها بتلف بنفس سرعة دوران السائل تقريبا.

أمال إحنا لما بنجيب N في الفتيس إزاي العربية بتقف؟؟؟

زي ما شرحنا في الموضوع الأصلي... كل سرعة من سرعات الفتيس عليها دبرياج لوحدها .. بس مش دبرياج زي اللي شرحناه من شوية.. إنما هي نوع تاني بيشتغل بالاحتكاك بردو إسمها "مجموعات القوابض Clutch Packs" ... وبردو شرحناها في الموضوع الأصلي..

محولات العزم الحديثة بقى فيها اسطوانة دبرياج خارجية علشان تزود كفاءة نقل الحركة... ودي بتتعشق أوتوماتيك بدون تدخل من السائق.. يعني ما تعتبرش اسطوانة الدبرياج دي هي نفسها اسطوانة الدبرياج بتاعت الفتيس المانيوال... دي حاجة ودي حاجة تانية.


الفيديو ده فيه شرح واضح عن كيفية عمل محول العزم.

https://www.youtube.com/watch?v=z5G2zQ_3xTc



...