السلام عليكم


انا نصاب.. اه والله نصاب. بس غصب عني. وعارف كل كلمه هتتقال منكم وانا عارف اني استحق الي انا فيه وعارف اني غلطان وربنا بيعقبني في الدنيا دا غير عقابي في الاخره بس للاسف مش عارف اخلص نفسي من الدوامه الي انا فيها

انا كنت بني ادم عادي خالص قمه الهذار قمه الجدعنه قمه الحاله النفسيه السعيده. شغال في شركه مرتبها ضعيف جدا بس عادي باكل وبشرب وداخل جمعيه كمان. اه الدنيا مزنقه جدا في الفلوس بس مهو اغلب الشباب كدا فين وفين وفين لما اشحن موبايل ولا اجيب هدوم جديده بس برده عايش احلي حياه.. لحد محياتي اتقلبت لما بقا جزء من اختصاصات شغلي اني اشتري منتجات معينه الشركه بتحتجها بشكل مستمر..

بقيت بنزل اجيب الحاجه بسرعه. مش كدا وبس لا دنا بفاصل علشان اجيبها بي اققل سعر علشان اوفر للشركه.. وفات فتره في شغلي وقررت ارتبط ظروفي الماليه صعبت اكتر والتزماتي كترت. هديه للعرسه لاء دي عايزه طقم جديد شويه مصاريف خطوبه. من جهه تانيه مقدرش استلف من اهلي الي قاعدين متبهدلين في تجهيز شقه الجواز...
وفي يوم انقلبت حياتي. لما حد من الي بتردد عنده علشان اشتري منتجات للشركه بتعتي قلي يابني انتا بتيجي تشتري كتير. لازم تطلعلك مصلحه ( انا كنت طيب لدرجه معرفش يعني ايه مصلحه) بقله يعنى ايه قلي يعني كل متشتري من عندي هظبتلك الحاجه بفتورتين واحده للشركه سعرها اغلي وواحده بالسعر الاصلي.. طيعا رفضدت

روحت من هنا والشيطان اتمكن مني واستغل اني محتاج فلوس وفي اول مره بعدها نزلت اجيب منه عملت الموضوع دا وفعلا طلعلي تقريبا 30 جنيه يوميها. وكنت مدايق اوي ومرعوب وخايف ليعرفو في الشركه
ومره مع مره بقيت بشتري منه او من غيره اعمل نفس الفكره والمبلغ ذاد مع كل وقت احتاج فيه حاجه.. يعني مثلا نفسي في طقم لبس جديد غالي اطلع مصلحه علي قد تمن الطقم لحد مبقيت محترف في ضرب الفواتير واستغليت ضعف الرقابه في الشركه وابرر لنفسي واقول مصاحب الشركه بيدي رشاوي قد كدا لبتوع الضرايب كل شهر يبقا حلال الي بعمله فيه
وطبعا بعدت عن ربنا بعد مكنت بصلي بقيت لما اروح اصلي اقول لنفسي يعني لسه ناصب واروح اصلي.. مش بس كدا دنا بقيت بعد مكنت مرعوب وخايف. اقول لنفسي بعد كل مصلحه اعملها. الله عليا دنا طلعت بمصلحه جامده النهرده واقعد اشجع نفسي

الشخص الي عمره مكان يصدق انه يبقا كدا. بقا فعلا كدا... عدت الايام والسنين وانا ع الحال دا واتجوزت وخلفت ولدين وكالعاده المصاريف بتزيد اكتر والمرتب سئ جدا زي مهو ومقدرش اسيب الشغل واشوف مكان مرتبه اعلي لان وظيفتي مرتبها وحش في اي شركه اصلا ومع ذياده المصاريف فالمصلحه الي بعملها بتبقي اكبر بس كنت بتجنب علي قد مقدر ان يجي بفلوسها اكل. يعني اصرفها في لبس . كروت شحن. موصلات الخ
.
اخيرااااا بعد كل الوقت دا فوقت عارف اني فوقت متاخر اوووووي بس مصاعب الحياه هيا السبب والله العظيم انا من قله الفلوس والمواقف الي كانت بتحصلي كنت بعيط تخيل زوجتك تقلك العيال بقا لبسها مقطع ولا تقلك انا مجبتش اي هدوم ليا بقالي سنه ولا ولا ولا. حاااااجات كتير

انا عارف اني طولت عليكم بس أقسم بالله انا بقيت انسان ميت. انا كنت قولتلكم شخصيتي كانت حالتها ازاي انا دلوقتي عباره عن انسان نادرا ما يبتسم او يتكلم بعد مكنت نكته العايله. علي طول سرحان في غضب ربنا عليا وعقابه. اكتئاب مستمر تفكير احيانا في الانتحار.. مبكلمش ولادي الاتنين. مدمر نفسيا. مبقاش فيه صلاه غير يوم الجمعه ورمضان بس وطبعا صحتي اتاثرت علي طول الام في المفاصل والعيون والبطن وياما كشفت ولا في اي تحسن وطبعا معروف جدا ان دا عقاب ربنا ليا في الدنيا

بالعربي انا مييييييت. نفسي ارجع صغير تاني قبل معمل الي عملته. نفسي اروح لصحاب المحل الي طلع الفكره في دماغي اقله منك لله يا شطان دمرتني ودمرت حياتي

نويت الحمد لله وقررت من اسبوع اني خلاص مش هطلع من اي عمليه شراء اي مصلحه تاني.. وطلبت من اهلي اطلع عمره انا وولادي ومراطي علي حسبهم لاني مش هقدر اتكفل بمصاريف العمره من المرتب واطلب من ربنا يسمحني

.. هل ربنا ممكن يسمحني ويعفو عني البلاءات النفسيه والمرضيه الي بقيت فيها وارجع تاني زي الاول بعد العمره .. هل هيتقبلها مني اصلا.. طب ازاي وانا طالع وعليا فلووس كتيير اوي للشركه مطلعها من عمليات الشراء
ومقدرش ارد ولو حتي جزء منها بغض النظر ان ان المبلغ كله الي طلعلي من عمليات الشراء دي اققل من 10000 جنيه هردهم منين والمرتب مكفي بالعافيه وكتير بستلف من اهلي علشان اكمل الشهر. هستلف منهم كمان اسدد للشركه. طب هقلهم بسددهم ليه واقول لمراطي ايه واصلا هدخلهم خزنه الشركه بمسمي ايه. رد سلفه نصب واحتيال

شوفتي الي انا فيه وبقا حالي عامل ازاي انا كائن حي ميت

انا كاتب الموضوع والله معارف ليه. انا اسف علي الاطاله. دي اول مره اتكلم فيه مع حد وكاتم في نفس طول ال سنين دي

قوليلي اعمل ايه انا بموت في اليوم من التفكير ميت مره والي حواليا من الاكتئاب والصمت والحزن الي انا فيه كرهوني او علي الاققل بعدو عني

عايز اقول كلمه اخيره.. شكرا يا حسني يا مبارك علي تدميرك للبلد و للتعليم الي طلعني انا ونص شباب البلد مرتبنا ميجبش حق جزمه من جزم حكومتك زمان

لو كنت في بلد فيها عدل اكيد مكنتش وصلت للي انا فيه انا واغلب الشباب

شكرا لكل حكومات مصر الي فاتت والحاليه والي جايه كل كل هما الوزير والقاضي والظابط يسكنو فين ويتفسح ازاي ويركبو عربيات ايه. والشباب. لتسرق زي حالاتي لتهاجر لتنتحر. شكرا يا بلد