الحقووووووووووووووني الرينبو مبهدلاني

**megamoudy** · 22-11-2008 08:26 PM

السلام عليكم ورحمة الله وبركاته
انا محمود من الزقازيق

جبت عربية رينبو موديل 97 من سوق الجمعة

ومن ساعتها مورياني الويل انا مش عارف اعملها ايه

قلت اعرض مشكلتي امام حضراتكم وانا حسيت انكو ناس محترمة جدا ومش بتبخلو ع حد بالرد

المهم اول ماجبت العربية كانت ماشية حلوة شهر والتاني لغاية مالاقيت استهلاك البنزين عالي جدا لدرجة ان الصفيحة كانت بتعمل 100 كيلو او 90 كمان

قعدت فترة كبيرة ع كده لغاية مانزلت بالكاربيراتير لواحد في شبرى اسمه المهندس احمد (تقريبا مش فاكر الاسم بالظبط )

المهم راح لاغي الباب التاني ولقيت بعد كده الاستهلاك اتعدل لمده اسبوع بس ورجعت زي الاول رحت لواحد في المنصورة بتاع قطع غيار رينو وبيجو عند شارع مرسة الملك الكامل في المنصورة

رحت ورغيرت الكاربيراتير بواحد استيراد من عندهم وركبته عند ميكانيكي هناك وقالي الكاربيراتير حالته حلوه

ركبيته وروحت الزقازيق صراحة الاستهلاك زي الفل بس المشكلة ان الباب التاني برده بيعلق مع اللفات العالية بالنسبة لموتوري يعني

المهم كل شوية يعلق وانا طفشان بجد انا طول النهار في الكلية ومش لاقي وقت للتصليح

غير ان الموتور كل الميكانيكية اجمعو ان المكنة خفيفة بدليل العادم الاسود شديد السواد لما بعلي لفات الموتور شوية

مش عارف اعمل ايه ياجماعة

انا كرهت الكاربيراتير خالص ومش عاوز اكرر نفس التجربة بتاعت الاستيراد واظن مفيش كاربيراتير جديد

المهم جاتلي فكره في دماغي ونفسي حد يقولي تنفع ولا لأ

الفكره اني اغير موتوري التعبان ( مع العلم انه 1300 سي سي ) واسقطله موتور كليو جديد من التوكيل وبكده اكون خلصت من المكنة القديمة وهخلص من مشاكل الكاربيراتير

بس عاوز اسأل هل هيكون في تعديلات في ميكانيكية العربية عشان اعمل كده وهل هغير العفشة عشان تستوعب الموتور الجديد ؟

ياريت تفيدوني في اسرع وقت لأني بجد تعبان م العربية ومش عاوز ابيعها عشان مش اخسر

**Amr_Moh** · 22-11-2008 08:41 PM

صراحة معرف مدى قابلية إستخدام موتور كليو في عربية رينبو

أسأل بتاع قطع الغير الجبلك الكربرتر

**megamoudy** · 22-11-2008 08:53 PM

المشاركة الأصلية كتبت بواسطة Amr_Moh

صراحة معرف مدى قابلية إستخدام موتور كليو في عربية رينبو

أسأل بتاع قطع الغير الجبلك الكربرتر

شكرا يا استاذ عمر ردك واهتمامك

**megamoudy** · 22-11-2008 09:13 PM

ياريت يا جماعة تشاركو برأيكو

**ESO_POP** · 22-11-2008 09:22 PM

انا احب اسأل حضرتك هى ايه مواصفات عربيتك وجبتها بكام ده اولا
ثانيا فيه ناس متخصصين فى الرينو فى القاهره (فى صقر قريش) مجموعه ورش وهتلاقى عندهم كل اشكال الرينو جديد او قديم ولو محتاج اى حاجه قولى وان شاء الله هفيدك
على فكره انا معايا (رينو 19)اللى هى الفرنساوى بتاع الرينبو وكنت عايز ابيعها فكنت عايز اعرف السوق عامل ايه
(عربيتى فابريكه بره وجوه)

**limo** · 22-11-2008 09:41 PM

طب ما تبيعها وتجيب كليو اسهل من التسقيط ده على فرض انه ينفع يتسقط
اصلك هتدفع مبلغ محترم وفى وتكون فى الاخر رينبو
لو عربيتك تجيب 30 او 32 اخلص منها وهات كليو 2001 حاله جديده على 40 الف ولا حاجه بس بلاش تجبها من سوق العاشر لانى بشوف هناك عربيات لا تصلح للاستهلاك الادمى المفروض تتكهن

**megamoudy** · 23-11-2008 05:53 PM

شكرا يا جماعة ع ردكو

بس كنت محتاج فعلا حد مجرب يسقط الموتور ويقولي عمل الحكاية دي فين ؟

**Hassanelrafe** · 06-12-2008 01:24 AM

الأخ العزيز

أنا كان معايا رينبو من كام سنه بس كانت كويسه جدا - بخصوص تغيير الموتور فيه واحد في بورسعيد في بنك الآسكان اسمه محسن تليفونه 0101217420 متخصص رينو
ممكن تشوف عنده موتور رينبو - او موتور رينو 19 الفرنساوي
معتقدش موتور الكليو ممكن يركب عندك و الله اعلم
و كمان فيه في القاهره فرنش موتورز في جسر السويس ممكن تسأل عندهم

أخوك حسن الرافعي