الموضوع: رد للناس اللى بتسال امتى العربيات هترخص و هترخص حقيقى و لا لأ و ليه؟

الناس اللى بتسال امتى العربيات هترخص و هترخص حقيقى و لا لأ و ليه؟
التاثير مش قبل 6 شهور لان طبعا مصر تاثرت بالازمة المالية العالمية بس مش بنفس قوة التاثير اللى حصل بره و التجار و التوكيلات عندهم العربيات مش عارفين يصرفوها زى الاول فالدورة لسه مبداتش
الفكرة ان اسباب انخفاض اسعار العربيات:
1-انخفاض تكلفة الشحن لان البترول نزل ل اقل من 50 دولار للبرميل بعد ماكان معدى ال120
2-انخفاض قيمة اليورو بشكل كبير جدا من 8.40 ل 6.95 و دا يفرق كتير اوى فى سعر اى عربية اوروبية مثال خلينا فى الاوبل الفكتر لو التوكيل بياخدها ب 10000 يورو من المانيا و يدفع جمركها حوالى 55% و يضيف مكسبه (كل الارقام دى مش دقيقة , دا مثال شبه حقيقى )
فمثلا 10000*8.4*1.55=130200 + مكسبه 30000 جنيه = 160000 (دا تمن العربية المانيوال)
اما بعد سعر اليورو الجديد 10000*6.95*1.55=107725 يعنى فرق على الاقل 22000 جنيه ( و فى الحقيقة مفروض يكون اكتر) + مكسبه الى هما برده 30000 جنيه=137725
دا مثال فعلا بس الفرق مش مفروض يقل فى الحقيقة عن 20000 جنيه بالعكس ممكن يزيد
3-انخفاض اسعار مكونات العربية زى الحديد و كدا و كمان البترول اللى بيشغل المصانع بره فبالتاكيد سعر العربية هيقل بره و نفترض العربية قلت 1000 يورو و بقت ب 9000 يورو 9000*6.95*1.55=96952 (دا نفس المثال) بتاع الفكترا تخيل العربية سعرها يبقى كام بعد مكسب الوكيل ميعديش 125000 (دا مثال شبه حقيقى).
4-الكساد و الركود فى جميع الاسواق العالمية ممكن يخلى الشركات المصنعة تقلل تمن العربية علشان يعرفوا يبيعوا!!
5-مصر هتضرب بقوة من الناحية الاقتصادية لان بره فى بطالة و فى تسريح لناس كتييير اوى من الشغل فبالتالى السياح مش هيقدروا يجوا مصر فى اجازات و بالتالى قطاع السياحة اتضرب , العقارات صحيح الاسعار مقلتش بس فى كساد و ركود و عدم بيع و ناس كتير فلوسهم فى العقارات فبالتالى ناس كتير هياثروا , التجار و المستوردين استوردوا سلع باسعار غالية محدش راضى يشترى فحصل ركود و بالتالى اتاثروا جامد و كل المجالات مرتبطة ببعض و المصانع اللى بتصدر بره مصر مش هتصدر لان فى كساد فى الاسواق العالمية يبقى اتوقف حالها و الشركات هتقلل الانفاق فى مجالات الدعاية فبالتالى المجال هيضرب و البورصة واقعة و الناس خسرت اكتر من نص فلوسهم فيها فبالتالى فى مشكلة كبيرة للمتاعملين فى البورصة و دا كله هياثر بقوة على القوة الشرائية فى مصر و الناس مش هيبقى معاها سيولة تشترى عربيات فحيصل ركود كبير عند التوكيلات فلازم غصب عنها مهما كابرت ترضى بتقليل هامش الربح بتاعها!!!!
6-المصريين اللى بيشتغلوا فى امريكا و اوروبا ممكن يسرحوهم(شوية منهم طبعا مش كلهم) و يرجعوا مصر و ممكن اللى شغالين فى الخليج حسب الازمة هتستمر قد ايه و هتاثر اد ايه علشان فى ناس مش فاهمة قوة الازمة و فى ناس فاكرة ان الخليج اغنياء و متاثروش بالازمة لأ بالعكس الخليج اتاثروا بشكل رهيييييييييب من الازمة لاسباب كتير اوى اهمها ان كل استثماراتهم فى امريكا و اوروبا , ممكن تشبه الازمة بان العالم كله بيفلس (دا مجرد تشبيه مش سليم علشان الناس تستوعب الصورة) فبالتالى التحويلات اللى بيبعتوها مش هتيجى فمحدش هيشترى عربيات طبعا

تخيلوا كل العوامل دى تجتمع مع بعض مرة واحدة , تفتكروا اسعار العربيات تنزل قد ايه؟
اكيد هتنزل الارض مش 6000-7000 زى ماناس فاكرة و لا حتى 10000 لأ اكتر بكتييير اوى.
الناس اللى بتسال الكلام دا هيحصل امتى
فى رايى مش قبل سنة و ممكن البداية بعد 6 شهور, ليه؟
لان الدورة محتاجة وقت , اولا الناس لسه مش كلها حاسس جامد اوى بالمشكلة الاقتصادية فى مصر و فى ناس لسه معاها سيولة , لما كل الناس تتاثر بدل المبيعات متقل 40% هتقل 90% فبالتالى مفيش مفر ان التوكيل يقلل ربحه (دا لو مشالش الربح فى سبيل انه ميخسر فلوس زى المرتبات و الكلام دا) , تانى حاجة لسه اليورو نازل مكملش شهر و العربية بيتعاقد عليها التوكيلات قبلها بفترة و لسه توكيلات كتير مباعتش موديلات 2008 زى الاوبل و بالتالى لازم يخلصوا من الكمية القدية قبل مبيستوردوا بالسعر الجديد و نفس الكلام بالنسبة لاسعار الشحن الجديدة , ثالثا لسه التوكيلات بره مشترتش بالسعر الجديد المكونات بتاعت الانتاج فبالتالى لسه اسعار العربيات مقلتش .

حاجة كمان مش كل ما التوكيلات تنزل السعر 5000 و لا 10000 كل الناس تجرى تشترى , لأ لان المرة دى التوكيل مش هيقدر يعمل الى بيعمله كل مرة و يزود السعر لأ , التوكيل فى مصيبة و العالم فى مصيبة معديتش عليه قبل كدا غير من 70 سنة فبالتالى سياسة الفهلوة المصرية بتاعت التوكيلات مش هتنفع المرة دى لان الزمة اقوى منهم بكتير و هما هيبقى عندهم مصايب!!

فلااازم الناس تتاكد ان التخفيض لسه محصلش و مش هيصل قبل 6 شهور على الاقل(قول سنة)!!!! مستحيل قبل كدا و لو حصل اى تخفيض قبل كدا يبقى مجرد تخفيض فى هامش ربح التوكيل حاجة بسيطة علشان يبيع اللى فى المخازن فالناس مش لازم تتخدع وتجرى تشترى.

التحفيض قادم قادم لا محالة ان شاء الله!!!
محدش يسمع الكلام اللى بيقول كله فى جيب التجار , بيحاولوا يفهموا الناس كدا علشان يخلصوا من اللى عندهم
الفكرة بس هى نسبة التخفيض دا قد ايه و امتى و اعتقد الكلام دا وضحته
معاك 125000 و نفسك فى اوبل فكترا؟ و الله ممكن بس كل اللى مطلوب من الناس محدش يشترى نهائيا لحد ما التوكيل يبقى مجبر يسعرها بالسعر دا و شرحتلك ازاى ممكن يعمل كدا فوق و ممكن اقل كمان من 125000 تخيل انت بقا!!!
الكلام اللى انا كاتبه فوق دا رايى الشخصى و دا ممكن اى شخص يحسبه بالعقل و المنطق معتقدش ممكن يطلع غلط بس الله اعلم طبعا
عايزين نعمل موضوع فى القسم الاجتماعى و نعمل استطلاع للراى نشوف الناس اتاثرت بالازمة لحد دلوقتى جامد و لا لأ و اتاثرت قد ايه