الموضوع: اشتريت عربيه اسبيرنزا a516 متسقطلها ماتور مايفك 2400 سى سى فيه مشاكل

بسم الله الاول ويارب اعرف اوصل الموضوع
انا اشتريت عربيه اسبيرنزا a516 من اسبوعين موديل 2009 متسقطلها ماتور لانسر مايفيك 2000 سى سى (زى ما صاحبها قالى) اتوماتيك .وطبعا اول اما شفتها عجبتنى جدا عشان واسعه واوبشنز حلوه بالنسبه لسعرها وسحبها كان جبااااااار لدرجة انى لما كنت بدوس بنزين بحس ان العربيه هترفع حصان وهتعرفو ليه فى السطر الجاى ان شاء الله .ختها كشفت عليها فى بنزينه قالى حاله ممتازه وفبريكه والماتور حلوو تمام .صليت الاستخاره وسجلت وجبت العربيه تحت باطى وجيت,وبدأت المأساه
صحيت تانى يوم وقلت انزل اخد لفه بعربيتى الجديده ودورت العربيه ومشيت بالعربيه 20 متر وراحت مبطله ,سميت ودورت تانى 10 متر وراحت مبطله ,رحت متصل بالى اشتريت منه العربيه ,قالى انا نسيت اقولك دى حاجه بسيطه سيبها تسخن 5 دقائق بالظبط مش هتبطل ودا الى حصل بالظبط بس وانا ماشى على الدائرى قرب نفق السلام (يعنى مشيت بتاع 30-40 كيلو) وبدوس بنزين كأن مافيش دواسه ادوس على الاخر ولا اى حاجه هى طبعا فضلت ماشيه على السلانسيه بتاعها وانا اديت اشاره يمين وقاعدت 10 دقائق عقبال ما عرفت اركن واتشتمت شتيمه بعمرى وبطلت ودورت اشتغلت الدواسه تمام عملتها معاى 4 مرات
انا طبعا ما رجعتش على البيت,رجعت على كهربائى وكانت الطامه الكبرى انو قالى انا مش بشتغل فى النوع دا من المواتير لانو نادر,قلتلو نادر ايه دا لانسر 2000 سى سى راح ضاحك وقالى دا لانسر مايفيك 2400 سى سى ومش هتلاقى حد يشتغل فيه ولو لقيت مش هتلقي قطع غياره,المهم وصفلى واحد تانى قالى نفس البقين . بس دا شكلى صعبت عليه فسألنى ياترى اما تدورها وتسيبها ال rpm بيزيد وينزل لوحدو قلتلو بالظبط قالى كده ياما عيب بوابه او الفيشه الى راكبه فى حساس دواسة البنزين او الحساس نفسه فا لازم تتحط على جهاز ,بعتنى لواحد تانى فتح الكابوت ودور العربيه ,يلمس الفيشه بى ايدو يعلى صوت الماتور ,يسيبها يوطى صوت الماتور قالى الدنيا واضحه اهى كده الفيشه عايزه تتغير ,قلتله اجيبها منين قالى انزل الحرفين وربنا معاك
نزلت الحرفين ادور ادور ادور مافيش امل فا صعبت على واحد تانى سالنى فى ايه ,قلتله قالى طيب نحطها على الكبيوتر نشوف قلتله حطها المهم حطها وقالى فى ضعف فى البوابه قلتله ياريتك ماكنت حطيتها انا خلصت من الفيشه عشان تقولى بوابه
رجعت للراجل الى قالى فيشه قالى البوابه ملهاش دعوه وانا هسبتلك راح منضف الفيشه باسبراى وقالى جرب,مشيت بالعربيه 3 ايام زى الفل (اقصد دواسة البنزين بس برضه لازم اما ادورها اسيبها تسخن 5 دقائق ياما تبطل منى مرتين تلاته عقبال ما تسخن) وهب رجعت مشكلة الدواسه تانى فانا اتاكدت ان الدواسه مشكلتها فى الفيشه بس انها تبطل دى مش عارف من ايه والاهم مش عارف الاقى الفيشه فين بليييييييز حد يساعدنى
ماتور مايفك 2400 سى سى ,اتوماتيك,بوابه كهربه ,بستخدم بنزين 92 ,هحط صورته وصورة الفيشه
اسف للاطاله


تم تعديل العنوان ليتناسب مع المحتوى
م.ع 7