السلام عليكم ورحمه الله وبركاته
موقف غريب جدا جدا
كنت راجع امبارح من بورسعيد على الطريق الدولى الساحلى كنت ماشى حوالى 140 وطبعا الطريق مافيش عليه ولا لمبه واحده و ضلمه جدا فكان قدامى عربية ماشية بنفس السرعة تقريبا
فجأة لاقيته بيفادى حاجه فى نص الطريق فاديت انا كمان الحاجه دى طبعا انا معدى جنبها بسرعة 140 و بفاديها يدوب لمحت انها جثة بس سكت من الصدمة وانى مش متخيل انها جثة بعدها بحوالى 10 ثوانى صمت صاحبى اللى معايا قالى مش دى جثة قلتله ايوا أنا مش مصدق من ساعتها و طبعا اعصابنا باظت شاورت للراجل اللى قدامى طبعا هدى السرعة و قلتله مش دى جثه برضه قالى اه طب نعمل ايه نروح القسم او نكلم البوليس قال لأ احنا كده حنلبسه فقررنا ان احنا نمشى طبعا طول الطريق شدة اعصاب مش عارف هل اللى عملته صح ولا غلط انا كان ليا تجربتين قبل كده مع موضوع الحوادث ومكنتش غلطان فى المرتين مرة عربيتى القديمة ميكروباص ركب فوقها و هى راكنه تحت البيت تلعربية راحت المرور و اتحجزت و لفيت كتير براءه ذمة واخلص ورق علشان اطلعها و مرة برضه خبطت واحد بموتوسيكل وكان هو اللى غلطان و الموضوع اتعمل قضية وانا اللى كسبتها و كان معايا شاهد شاف الواقعة انا كنت بلف ملف وتقريبا واقف ومدى اشارة والموتوسيكل جه بيفادى العربية اللى ورايا لاقانى فى وشه ومع كده هو راح المستشفى وانا دخلت الحجز و اتكلبشت واتعرضت على النيابة والعربية اتحجزت حوالى 3 ايام ده اللينك بتاع الموضوع
http://www.nilemotors.net/Nile/419387-a.html
تخيلو بقى لو كلمت البوليس وقلتلهم فى جثه اعتقد كان حيتعمل محضر ليا وللشخص التانى كشهود و العربيات تتحجز واحنا نتحجز لتانى يوم علشان ندلى بأقولنا فى النيابة ده لو متوجهش اصلا لينا تهمه .
الغريب اكتر لما فكرت النهاردة فى الموضوع الطريق الدولى اصلا صحرا فالراجل ده كان بيعدى الطريق ليه المفروض مفيش حاجه على الناحيتين فكرت انه ممكن يكون مقتول مثلا ومرمى فى نص الشارع
هل اللى عملته ده صح وهل انا سلبى.