إحباط رهيب من دراسة الألماني والبحث عن بديل !؟

**Mahmoud Naguib** · 14-12-2015 07:05 PM

أنا دورت كتير عن فرصة للهجرة لأوروبا أو أمريكا (( وبالأخص أمريكا طبعا ))
طبعا لقيت السكك كلها شبه مقفولة ف وشي ماعدا سكة واحدة وهي الدراسة في ألمانيا
بالرغم من اني مش حابب ألمانيا كدولة أعيش فيها إلا إني قلت هي هتبقى كوبري أو معبر كويس لأي دولة تانية
وسبب اني مش حابب أعيش ف ألمانيا إنها دولة روتينية بزيادة زي غالبية أوروبا (( ماعدا إسبانيا وإيطاليا طبعا وشوية فرنسا ))
فبدأت أدرس ألماني ولكن مقابلاني مشكلة كبيرة هي إني مش عارف أذاكره !!
بالرغم من انها لغة صعبة ومعقدة إلا اني حتى ماليش نفس أذاكرها خالص حتى بعد ما فضيت وقت أكبر لنفسي علشانها !
مش عارف ليه مش متشجع ليها وحاسس انها كل شوية بتتعقد والكورس ماشي زي العربية وانا ماشي على رجلي ومش قادر ألحقه !!

المهم أنا فكرت أسيب الألماني خالص وأشوف أي بديل تاني أقدر من خلاله أسافر أي دولة أوروبية مثلا أو أمريكا رأسا لأنها الحلم بالنسبالي !

في ناس اتكلمت عن كندا واستراليا كتير بس مش عارف برضه مستصعب الموضوع !
ياريت اللي يعرف يدلني على طريق ويعرفني أبدأ ازاي وإي الصعوبات اللي هواجهها
أنا سني 23 سنة بالمناسبة

وياريت ميكونش من ضمن البدائل دي السفر لأي دولة عربية وبالأخص الخليج !
أنا عندي مصر برقبة اي دولة تانية عربية

**رحالة** · 14-12-2015 07:56 PM

يا ام بدوي بلاااااش :-)

**Fawzy.Abdelnour** · 14-12-2015 08:28 PM

سؤال سريع يمكن اقدر افيدك.
حضرتك خريج ايه و بتشتغل ايه؟؟

**Bassem Youssef** · 14-12-2015 10:07 PM

لو الانجليزي بتاعك كويس هتلاقي ان الالماني سهل و بعدين انت مش متحمس للالماني بسبب عدم حبك لالمانيا و بعدين هو حد لاقي فرصه يروح بلد نضيفه و يرفضها

جرب الايطالي او الاسباني لانهم اسهل من الالماني و اهه كله اتحاد اوروبي في الاخر

**samyyousef** · 15-12-2015 12:37 AM

الحل هو انك تغير مكان الكورس...روح معهد جوته
او اتعلم مع متخصص بريفيت...حايكون ممل لكن منجز
سنك لسة صغير لا تياس
يقال ان الهجرة للنرويج افضل من المانيا و الله اعلم

**Ahmed Eraqy** · 15-12-2015 09:43 AM

خد ايلتس و جيب 6.5 و قدم على دراسات عليا بالانجليزي فى المانيا و ابقى اتعلم الماني هناك براحتك اكتر من صديق مهندس في الشغل عملوا كده بس لو ناوي تستقر هناك بعد الماستر لازم يبقى معاك الماني

**Mahmoud Naguib** · 15-12-2015 10:27 AM

Mankind انا خريج بكاليريوس علوم زراعية وشغال بروكر ف العقارات

باسم يوسف ... الالماني مالهوش اي علاقة بالانجليزي ... لا يربطهم اي شئ الا كلمات بسيطة ... وانا بالنسبالي حابب جدا الانجليزي ويبقى أفضل كنير لو آخد آيليتس

سامي يوسف ... للأسف جوته غالي جدا وقدامي 5 شهور مثلا على ما يفضالي مكان
انا فكرت ف موضوع البرايفت ده بس لازم الاول احاول ادرس مستقل فيديوهات وكدة ولو لقيت نفسي حبيتها كلغة هبدأ برايفت
ياريت لو عندك اي معلومات عن الهجرة للنرويج تقولنا عليها

احمد عراقي .... شكلي هعمل كدة فعلا خصوصا ان الانجليزي انا حابه جدا ومستوايا فيه حلو جدا برضه

انا نفسي ف الهجرة لأمريكا ... هل في اي مدخل ليها من اي سكة ؟!!

**Bassem Youssef** · 15-12-2015 06:48 PM

المشاركة الأصلية كتبت بواسطة mahmoud naguib

mankind
باسم يوسف ... الالماني مالهوش اي علاقة بالانجليزي ... لا يربطهم اي شئ الا كلمات بسيطة ... وانا بالنسبالي حابب جدا الانجليزي ويبقى أفضل كنير لو آخد آيليتس

انا نفسي ف الهجرة لأمريكا ... هل في اي مدخل ليها من اي سكة ؟!!

عارف ان مفيش علاقه بين الانجليزي و الالماني ... اقصد انك طالما كويس في الانجليزي ... يبقي عندك استعداد كويس لتعلم لغه اجنبيه ... ده قصدي

امريكا حاليا ... يا استثمار برقم محترم ... يا دراسه ... يا تتجوز واحده امريكيه ... مش برشح سكه الجواز دي لحد

**melouk1** · 15-12-2015 10:41 AM

انت عمرك ما سافرت بره مصر ألمانيا اجمل بلد في العالم في وجهة نظري
اللي عاش بره و لف كتير عارف كده
انت بتفكر بدون خبرة
معلوماتك عن المانيا من الكورة بس
كمل الماني و اذا روحت هناك في يوم هتعيط على كل لحظة فضلت تضيع فيه وقت في الكتابه هنا