الذهاب الى الامارات سياحه والبحث عن عمل

**ganash** · 18-10-2013 03:47 PM

ايه رأيكم فى الموضوع ده واحد صاحبى بيقولى عليه مش لاقى هنا عمل مناسب وعاوز يروح وبيقولى عليها علشان لو عاوز اروح معاه انا خريج نطم معلومات اداريه معادل بكالوريوس تجاره وهو خريج تجاره برده هل فيه فرصه هناك فعلا ؟

**saddam** · 18-10-2013 08:28 PM

صديقي المواطن
عن تجارب وسفريات كثير وإقامة في اﻹمارات مبدئيا لو ملكش معارف هناك متروحش
ثانيا لو لم يكن معاك مصاريف تعيشك 3 أشهر إياك تروح الحياة هناك غالية وطبعا لو مش حتقعد مع شباب وتتقاسموا إيجار الغرف فإنت حتحتاج ما لا يقل عن 5 أو 6 آلاف جنيه شهريا واللغة اﻹنجليزية مطلوبة
ملحوظة أول شغلانة لو مرتبها قليل معلش إقبلها ومن هناك نوسع علاقاتك وتثبت أمانتك ونبني عليها
وبالتوفيق وإلى اﻷمام ومن نصر إلى نصر
ودمتم للنضال

**walidzakzok** · 18-10-2013 09:26 PM

هاتبهدل نفسك يا ابن الحلال
محتاج على الاقل 15 الف جنيه مصاريف
هاتدور ومش هتلاقي حاجة كويسة
المرتبات هنا فى التعبان مقارنة مع المصاريف العالية
هاتعيش عيشة حيوانات علشان تقدر تحوش
تخصصك مرتباته مش عالية
دي الخلاصة من واحد اتغرب قبل كدة

عايز تسافر تبقى تطلع على عرض مقبول وانت فى مصر

**mk3** · 18-10-2013 10:53 PM

توفيق ربنا ورزقه
ثم اللغه ثم اللغه ثم اللغه
مش معنى كده انى بقولك الشغل هيجرى عليك لو معاك لغه
لكن اللغه اساس هناك وربنا معاك

**eng wael** · 18-10-2013 11:01 PM

من بعد ثورة يناير وهما قافلين الشغل على المصريين بشكل بشع لا انصح بالسفر الا لو عندك فعلا عقد
وربنا يوفقك للصالح

**أحمد كمال** · 19-10-2013 12:11 AM

السياحة اخرها شهرين مفيش سياحة 3 شهور .... بتبقى شهر و تتمد شهر تاني بس

لو لقيت شغل و انت على سياحة لازم تخرج و تخش تاني بتاشيرة العمل ما ينفعش تحول وضعك جوة البلد

المصاريف غالية مووووووووز .... تذكرة مش هتقل عن 2500 مصري ..... فيزا شهرين مش هتقل عن 2000 كمان ..... مصاريفك في شهرين اكل و شرب و بيات و مواصلات (بما انك هتبقى بتلف كتير عشان بتدور) و غسيل و مكوة هدوم (مش هتروح انترفيو مبهدل و لا بتي شيرت) الخ الخ الخ مش هتقل عن 150 درهم في اليوم يعني الشهرين ب 9000 درهم يعني 17 الف ..... اجمع عليهم ال 4500 تذكرة و فيز يبقى دخلت في 21-22 الف ..... خلي بالك انا متحفظ جدا في الارقام اللي باقولهالك دي ...... 4500 درهم في الشهر اكل و شرب و لبس و سكن و لف بالمواصلات يادوبك .....

لو عندك حد تقعد عنده الموضوع هيختلف جذريا ....... بس غير كده الموضوع مكلف جدا ..... و ممكن جدا في الاخر ما يصيبش معاك و يخيب و تبقى صرفت دم قلبك ....

موضوع التضييق عالمصريين في الشغل مش صحيح ..... فيه تضييق في تاشيرات العمل احيانا بس مفيش تضييق في الشغل

**ganash** · 19-10-2013 11:32 AM

والله انا قولت الكلام ده كله هو فى حد هناك فعلا بس أكيد الاكل والشرب والمصاريف دى على حسابنا غير اللف والبهدله هناك ولو ملقتش شغلانه مناسبه هتضطر تشتغل اى حاجه علشان مينفعش ترجع بعد المصاريف دى بس انا فعلا عاوز اشوف عقد من هنا علشان اطلع عارف راسى من رجلى بدل ما انا مش عارف هشتغل ولا لا الشغل رزق بس مش مستاهله مغامره والامارات مصاريفها غاليه زى ما انتو قايلين كده مكنتش متوقع المصاريف دى كلها انا مش حابب اروح الامارات اصلا علشان كده الراتب قليل والى هتجيبه هتصرفه اكل وشرب وسكن انا الحمد لله الانجليزى بتاعى كويس طيب يا أستاذ Terrible_DaRsH صاحبك خريج ايه ولقى هناك شغل بسهوله ؟