الموضوع: تجربة شراء فلوانس 2016 فتحة سقف مع التقييم

شكراً لذوقك وربنا يديلك اللى أحسن من الفلوانس :)

ألف مبروك وربنا يباركلك فيها ويكفيك شرها بإذن الله..

أنا بفكر حاليا في إني أشتريها، اي تجربتك ليها لحد دلوقتي سواء مميزات أو عيوب؟
وهل الفئة الأوتو e3 الفول أوبنش بيكون موجود فيها النواكل الخارجية والداخلية، ولا دي بتبقا موجودة في آخر فئتين بس؟

هو اه الكروز كنترول ده يا باشا وهل بيكون فى الفئة التالتة بس

والله انت راجل عسل ...انا قرات الموضوع من اسبوعين وقراته تاني مرة اليوم ...وفي كل مرة يزيد تصميمي علي شراء الجميلة فلوانس ...بس ادعوا لي ربنا يوقعني في حته تكون 2014/2015 كسر زيرو في حدود 120000ج

أستاذ khaled Idres للتأخير فى الرد .
بعد أربع شهور أقدر أقولك أن العربية جميلة جداً و أهم مميزاتها إنها متعة فى سواقتها وبرده الفرامل كويسة جداً ولو إنه ميزة وعيب فهى بتلحقك بس من قوتها ممكن تخبط فى اللى وراك فعايزة إستخدام حريص شوية ورجلك تبقى حساسة وده بيجى بالتعود. وبالنسبة لسحبها فبعد فترة بتاخد على سواقتها وبتعرف تجرى وتسحب بيها علشان الفتيس ليه طريقة سواقة معينة علشان تسحب معاك (ده رداً على البعض اللى بيقول عليها بطيئة فالعربية مش بطيئة لكن طلعتها بطيئة). برده من مميزاتها الفخامة فتحس إنك قاعد جواها باشا. وكمان اقتصادية فى البنزين على الرغم من كبر حجمها. أما العيوب فقطع أسعارها غالية الى حد ما وأسعار التوكيل مبالغ فيها ولكن بعد إنتشار العربية مؤخراً بدأ يظهر لها قطع غيار فى السوق بأسعار معقولة، وإرتفاع الأسعار فى التوكيل بيخلى الواحد خايف من الخبطات لأن المراية مثلا ب 4200 فى التوكيل لكن نزلها دلوقتى فى السوق تقليد ب550. نصيحة أتوكل على الله وأشتريها بس أهم حاجة تأمن عليها.

أما أستاذ Ahmed abdelmon فالكروز كنترول هو نظام بيسمحلك تحدد على الكمبيوتر سرعة معينة تمشى عليها والعربية تمشى لوحدها من غير ما تحتاج تدوس بنزين ولما تفرمل الكروز يقف ولازم تدوس زرار فى الطارة علشان ترجعه تانى وكمان لو عايز وأنت شغال عليه تزود السرعة فممكن تدوس بنزين فتزود السرعة ولما تشيل رجلك بترجع تانى لوحدها للسرعة اللى انت كنت محددها. وده طبعا بيريحك فى حالة السفر.

أستاذ أبو صالح شكراً لذوقك ربنا يرزقك باللى نفسك فيه وباللى أحسن منها وأتوكل على الله العربية جميلة ويكفى إنها بموتور نيسان قيشقاى يعنى إعتمادية رهيبة وفتيس محترم.