الموضوع: تجربة شراء فلوانس 2016 فتحة سقف مع التقييم

حبيت احكي تجربتي مع الجميلة فلوانس كرد جميل للموقع و الاعضاء و يشرفني الانضمام لكم
دلوقتي لما تيجي تشتري عربية جديدة تحس انك داخل مصارعة ما بين انواع العربيات من ناحية و المعارض من ناحية تانية و معظم التوكيلات اللي سايبة المعارض تعمل اللي هي عايزاة من اوفر برايس و استغلال ليس لة مبرر غير انة شغل تجار
اجمل عربيات حاسيت لما قعدت فيهم بالفخامة و جودة التقفيل الفلوانس و سوزوكي سياز و سكودا رابيد
و ايضا من حيث الكفاءة و الاعتمادية كانت الانسر شارك و الكورولا و انا بتكلم في فئة سعرية متقاربة
بصراحة الفلوانس حسمت المقارنة بماتور النيسان و الفتيس cvt اللي تقريبا بدون اي مشاكل حتي الان و عن تجربة هو رهيب في استهلاك البنزين
كل لتر بنزين بيعمل 16 كيلو علي سرعة 120 ك و مقدرش احكم علي العربيات التانية
كما أن ثباتها رائع و سحبها علي السرعات العالية ممتاز كمثال كنت علي 120 و كانت RPM 2750 و علي M6. بصراحة العربية متعة و انت سايقها تحس انك مش عايز تنزل منها و اللون الموكا فعلا رائع فيها

لما جيت اشتريها اشتريتها من القصراوي جروب وهو موزع معتمد لرينو و كان محترم جدا و بصراحة فضلوا حاجزين العربية اسبوع من غير ما ادفع و لا مليم لحد ما كملت المبلغ و كل طلباتي كانو بيعملوها و كانوا ملتزمين لا قصي حد و كانوا ارخص من معارض كتير كبيرة جدا بالفين جنية (المصرية كانت عايزة اوفر برايس 4 الاف أما القصراوى فخد الفين) رغم أن المسئول قالي انة جالي ابيع عربيتك باغلي الفين بس انا التزمت معاك
علي العموم كانوا ناس محترمين و وجب الشكر ل أ/ احمد مسئول مدينة نصر

مشاكل ظهرت مع استلام الجميلة
العربية كانت بتحدف شمال و غطاء التانك كان عالي شوية و كلها اتحلت مع التوكيل
اول ما اشتريتها جالى احباط من سحبها في البداية الطلعة بس بعد الالف اتحسنت كتير اصبحت معقولة
اكبر مشكلة فعلا فيها يا جماعة سعر قطع الغيار اللي التوكيل عاملها و فعلا محتاج نصيحة الاعضاء فيها
كنت ماشي عادي في الشارع ورا تريلة و مرة واحدة الترلة وقفت فرحت وقفت وراة ب 2 متر عادي يعني
لقيت التباع نزل و عايز يركن التريللة علي جنب راح قالة ارجع ارجع اوب راح جرح الاكصدام و الفانوس
طبعا العربية مبقالهاش شهر و منظرها بقي صعب
كنت عايز اصلحها بنظافة و خلاص
روحت التوكيل قالي انت مامن قلتلة مامن طيب احنا هتتصلح تبع التأمين و هتاخد 25 يوم اصلاح قلت عادي
اتصل بيا المهندس بعديها باسبوع تخيلوا المقايسة بكام ؟12800 فى اكصدام امامى وفانوس امامى شمال كل اللى حصله كسر فى الباغة لكنه سليم وشغال بالاضافة الى استعدال فى الرفرف الامامى شمال يعنى ماغيرهوش بس استعدلوه. الاكصادم الامامى لوحده بحوالى 5500 والفانوس بقاعدته عامل حوالى 3700 والمصنعية حوالى 2500 والباقى 10% ضريبة
طبعا بعد ما صلحوا بصراحة العربية رجعت زيرو من الاول ما فيش فرق في اللون او اي حاجة رغم اللون بتاعي صعب جدا
المهم كنت ماشي عند شبرا لقيت محل تقريبا اسمة مشيل كان الاكصدام ب 1800 جنية زيرو الاصلي و الفانوس الاصلي ب 1600
رغم صدقوني الموضوع كلة كان ممكن يتلم عند حد بتاع فيبر و مشهيكلف كلة 500 جنية بالرش و 1600 فانوس او ممكن اعمل وش فانوس في التوفيقية
بس بصراحة الواحد قال يفرح بالعربية شوية و هي نضيفة
كنت عايز رايكم في اسعار قطع الغيار بالنسبة لاسعار التوكيل مقارنه باسعار التوكيلات العربيات التانية و المفروض كان التصرف ازاي في الموقف دة

شكرا لكل الاعضاء علي زوقكم و دة مش غريب علي الجروب و ربنا يديم المحبة ما بين اعضاء الجروب و كنت عايز اضيف ان اللي سالت عندة اسمة مشيل حليم (رينو هوم) و موبايلة 01206781942 و كان ماكدلي ان الحاجات دية الاصلية و ان لسة منزلش ليها حاجات تقليد و ممكن مع الوقت ينزل ليها انا حبيت اضيف ممكن يكون حد محتاجها
زي ما قلت العربية فعلا رائعة و بالزاد علي السفر رهيبة و مكلبشة علي الطريق و الكروز يحسسك بانك قاعد علي كافية مش بتسافر مثلا خمس ساعات فعلا يا جماعة اوبشن الكروز يستاهل
و صوت السماعات بتاعها رائع و مشمحتاج اي اضافات
شكرا ل Ali8moh &GasDealer & TAMERMEGAHED & Hany Saad & yasser100 & amrelsha3er عل زوقكم و اهتمامكم