الموضوع: تقرير صيانة الالف كيلو للجين 2 Facelift

مبروك يا اخى على العربية
و تمام انك خلصت التليين على خير و ربنا يكرمك فى العربية ان شاء الله و يجعلها قدم السعد عليك

المشاركة الأصلية كتبت بواسطة abn7amido

السلام عليكم و رحمة الله و بركاته
الحمد لله يوم الخميس بالليل خلصت أول ألف كيلو قلت مش حستنى للسبت و رحت لامير و جوزيف اللى فى مدينة نصر قبل صلاة الجمعة.
بصراحة العملية سريعة عندهم غيروا زيت و فلتر و ربطوا عفشة و قلتلهم على الصوت اللى فى العفشة قالولى حنربط عفشة لو راح خير و بركة لو مراحش عليك و على عز العرب.
المهم عملوا الكلام ده فى حوالى 45 دقيقة.
المهم مشيت و لسة صوت الطقة موجود فاتخنقت جدا و افتكرت ان العربية جابت مقص او مساعد.
المهم ده منعنيش انى اجرب سحب العربية فى الاوتوستراد و اول مرة اجيب 140 على الاوتوستراد و ملفات على 120 و كانت الحياة لذيذة.
عموما انا مش جايب العربية عشان اشد و اجرى جامد كدة بس حبيت اجرب امكانياتها.
المهم رحت السبت عز العرب اللى فى العجوزة مركز خدمة لذيذ و سريع و فاضى و خصوصا انا رحت بدرى كنت هناك تقريبا 8:45 دقيقة.
بس للاسف المهندس احمد المسؤل عن المركز ما كنش موجود و استلمنى هناك واحد اسمه عبدالغنى بهدلنى لحد ما جيت امشى.
بصراحة كل لما اكلمه كلمة بيحسسنى انى بتعامل مع واحد مش فاهم اى حاجة فى اى حاجة.
اول الكلام قلتله عندى صوت طقة فى العفشة
قالى مروحتش ابو رواش ليه
قولتله امال انتو مش عز العرب بردة و الا ايه
قام سكت
فا انا فهمت انه حيغلبنى طول النهار
المهم الريس ابراهيم جالى و جرب معايا العربية (الريس ابراهيم كبير الفنيين هناك و راجل فى قمة الزوق و الاحترام و كل حاجة كويسة)
المهم جرب معايا العربية و سمع الصوت و قالى حنرفع و نشوف.
رفع العربية و ربط عفشة و قالى تعالى نجرب
رحنا جربنا قعدت الفى بالعربية و اخد ملفات و اطلع مطبات جامد و اجرى و اقف بسرعة مفيش صوت خالص.
حمدت ربنا و شكرت الريس ابراهيم.
المهم خلاص الموضوع على كدة كنت نسيت اقول فى امر الشغل انى كنت عايز ابيت الكارتيرة بتاعت العجلة الشمال فى مكانها عشان كانت طالعة من مكانها سنة بسيطة.
فقلت لعبد الغنى بيه على الموضوع ده
هب فى و قالى مش تقول من الاول و الكلام ده حعمله على حساب مين و قعد يبرطم
انا كان معايا عديلى دخل فيه شمال و اتنرفز عليه و هزأه قدام الصنايعية.
المهم واحد صنايعى لما شاف الموضوع فيه زعيق راح جاى عامل الكرتيرة فى 10 ثوانى.
و الريس ابراهيم مكنش واخد باله لما سمع الزعيق و بعد ما الكرتيرة اتعملت و معرفش انها اتعملت جه من سكات و خد العربية و ساقها و قام رافعها و قالى أؤمر عايز تعمل ايه فى العربية.
قالتله جزاك الله خيرا كثيرا أخونا الصنايعى عمل الكرتيرة خلاص.
قالى متزعلش المهندس أحمد اصله مش هنا النهاردة و الراجل ده (قصده عبدالغنى) جاى عشان يعملنا مشاكل.
المهم الموضوع خلص على كدة و مشينا و الحمد لله الصوت راح خالص
و بعد كدة روحت اصلح المراية الى انا خبطتها من كام يوم

خلاصة صيانة الالف كيلو:
على قد متقدر متروحش لامير و جوزيف عشان قالو انهم ربطوا عفشة و مربطوهاش او ربطوها اى كلام و انا شوفت المسمار اللى اتربط و كان عامل الصوت المسمار كان بتاع المقص اليمين و كان فى الوش
لو اضطريت تروح العجوزة متتعاملش مع عبد الغنى ده خالص.
العربية الحمد لله بقت جميلة و سحبه خطير و الثبات و همى.
و الله المستعان
ءأمل انى أكون قدرت اوصلكم رأيى
و أسف على الاطالة و السلام عليكم

alf mabrook y basha 3o2bal syanet 100000...
kholset dh koloh...enoh 3ndak ay moshkela roo7 aburwash 3latool a7san:k41:

شكرا يا ابن حميدو على التقرير الجميل ده
وربنا يباركلك فى العربية ويبعد عنك عبد الغنى

الف مبروك على صيانه ال 1000 وعقبال صيانه المليون إن شاء الله

mabro0o0ok ya basha 3ala syanet el 1000 w 302bal el 100000 w tekon lesa mabsoot men el 3arabeya isa w thx ya man 3ala el taqrer el gamed da

الف مليون مليار بليون ترليون مبروك .....و ياريت يا استاذ ابن حميود تقولنا اجمالي المبلغ المدفوع في صيانة الالف كام بالضبط.