مشاركة معلومات للداتشا

**Shoman** · 07-01-2016 10:01 AM

السلام عليكم
تحية لأعضاء المنتدى على كل المعلومات الممتازة .
انا لسة شاري داتشا موديل 97 من كام يوم و حابب اني اشارك معاكم الي عملته فيها و اقولكم على الي انا عايز اعمله و مش عارف
المهم انا اشتريتها مخبوطة في الجنب اليمين و كانت محتاجة شوية مصاريف على العفشة الخلفية و تظبيط كهرباء الموتور . و الزجاج الامامي مكسور . و الخبطات الي في الجنب و بس .دا حسب كلام البائع...
الي محتاج يتغير فعلا هو كالتالي
المارش . المساعدين امامي و خلفي . البارة و التيش و بيض . و مساعدين الشنطة
الاسعار من عند د البساطي و دا راجل محترم جدا . ما عدا مساعدين الشنطة. و انا فضلت اتعامل معاه بسبب ان كتير من الاعضاء بيشكروا فيه . و هو يستحق ذلك
المارش ب 150 استيراد . البيض 150 (2) . تارة و التيش 4 قطع ب 240 . مساعد امامي و خلفي بسعر 850 جنية و لما رجعت الخلفي استرديت 300 . وش اشارة ب 15 الواحد و وش خلفي ب 35 للواحد و المساحة كاملة 25 للواحدة. المساعدين للشنطة 150 من عند الهواري ش التوفيقية . و تقريبا بتوع بلونيز بيركبوا عليها .
المهم اني رحت للسمكري و طلبت منه يرد ع البارد الخبطات الي في الجنب اليمين طلب مني 300 جنية مع العلم اني جايبله و اسطة علشان يخفض شوية و وصلت معاه من الاخر على 250 بالعافية . بس موثقتش فيه و دورت على واحد تاني المهم لقيت واحد رد الشغل على البارد على قد ما يقدر و مش معنى كدا انه وحش بس لأنه كان عايز يستخدم النار و انا رفضت لأني قبلها سألت واحد بتاع دوكو علشان يرش الحزام بدون كبوت او سقف او شنطة قالي 1200 جنيه . و كنت ها اعيط ساعتها
المهم السمكري طلب مني 40 جنية و انا كنت ها ازغرد و اديته 50 . و قررت الني ما ارشش الحزام و لا حاجة.
الزجاج الامامي لسة مغيرة امس من عند احمد سكر و دا ليه ورشه عند سلم ميت نما عند الدائري و الورشة التانية في ام بيومي قليوبية غيرته ب 185 جنيه و انا كنت عرفت من المنتدى ان السعر بيتراوح من 160 الى 180 بس قلت مش مشكلة و الزجاج عليه لزقة بتاعة الدكتور جاويش و دا طبعا مش عارف معناه ايه . بس هو قالي ان الزجاج دا بقاله عنده سنين 8 او 9 سنين و بيشكر في الخامة . بس بصراحة مش عارف دا بردو ميزة و لا عيب .
و غيرت علبة زيت الباكم ب 25 من عند البساطي
و طاسات رينو مقاس 13 تركي جبتهم ب 100 من البساطي ايضا,

الي محتاج اظبطه و مدايقني
الكربيراتير لأني مبدورش العربية الا لما بحط شوية بنزين عليه
دواسة الدبرياج عالية جدا جدا بكون رافع رجلي و انا دايس عليها و كمان ناشفة قوي و رخمة من الاخر و انا شفتها في عربية تانية لقيتها ممتازة و انا لما سألت الميكانيكي قالي السلك مش بتاعها و قلتله انا شاري سلك دبرياج بتاعها لسة و هو نفس الي راكب فيها
بس الي كان راكب في التانية ليه وصلة سلك حديد مش عارف.

انا كمان جبت ماكينتين كهرباء تويوتا ترس علشان الزجاج الامامي و دا حسب ما قرأت في المنتدى ل م حازم بس عايز اعرف ها اركبهم ازاي .
مستني نصائحكم

**nosa11** · 09-01-2016 10:22 AM

يا باشا اولا الف مبروك على العربيه
واضح من كلامك انك عايز تظبط كل حاجه فى العربيه من الالف للياء زى مابيقولو

ربنا يوفقك وتكملها على خير ان شاء الله وتشوفها احسن عربيه
وكمان مشكور على توضيح كل شيئ عملته لتفيد زملائك

**hazemawad** · 13-01-2016 09:39 PM

الف مبروك على العربيه.....
انت بقى منين؟
والعربيه اشتريتها منين وبكام؟
لو انت قريب من قليوب تعالى ليا وانا افرجك على سر العربيه اللى معاك

**mohsen128** · 14-01-2016 03:11 PM

الف مبروك على العربية ،، بص انا لسه جايب البيض بسعر 80جنية جديد واستيراد عند الدكتور في عزبه شلبي 80 من بقه واكيد ينزلو شويه الجداد العفشجي نزل جبهم بنفسه ، وش الفانوس الخلفي سعرة 25 جنية في الاهرام للبلاستيك في التوفيقه ودوخوني على الوش الامامي وفي الاخر جبته من مجري العيون مش من عند ارزاق من محل تاني مش فاكر اسمه حالياً وتقريبا 35 جنية ،بخصوص سلك الدبرياش المصري 50 تقريبا ونوع تاني مش متاكد فرنساوي ولا ايطالي 80 في التوفيقه من عند محسن ومدحت وديع بخصوص دواسه الدبرياج انت عندك فتيس الداتشا ولا رينو 9 ، زجاج الباب الامامي انا جبته من سنه من عند محل الحاجه الي في الجياره وعملو عموله لانه مكنش موجود فكان غالي شويتين الزجاج الخلفي لسه مغيره الاصلي بتاعها بالسلك بتاعه وتكلف 375 جنية ، بخصوص المرش سعره 150 وبيركب عليها بتاع الشاهين ونفس السعر ، اللي مش لقيها خالص اكره الباب الامامي يمين واحد بيقولي هصبهالك مخصوص وتقعد 3 ايام وتتكلف 170 جنية طبعاً كبرت دماغي من الاخر ونصيحه لو رايح تجيب قطعه غيار قول رينووووووووووووووووو 9 بلاش داتشا نوفا بيضربو السعر في 2 على طول ،
بس انا شوفت عربية داتشا لسه مرشوشه اخصر ميتلك معملوها شويه عتب واكصدامات تحفه وعليها تبلوه سيات ابيزا وطارة وقطمه بتوع لنوس عرفت السمكري الي عامل الشغل ده وهحاول اشوف الدنيا معاه تتكلف كام ، وهقولكم اخر الاسعار . مبروك كمان مره على العربية وربنا يديك خرها ويكفيك شرها

**Shoman** · 17-01-2016 04:50 PM

كتر خيركم يا بشاوات
اشكركم جدا على متابعة الموضوع و مباركة العربية بجد حاجة جميلة قوي

انا من المنوفية يا بشمهندس حازم . من اشمون يعني قريب جدا لقليوب .

انا فعلا بدات في العربية من توضيبات و شايف انها تستاهل جدا . بس وقفت لحد الكربيراتير لأني مش لاقي حد يظبطه و روحت لبتاع الكربيترات لكنه قالي ملوش قطع غيار و نصحني اني اغير لكربيراتير 305 استيراد مش جديد لان الجديد صيني
و لما سالت فيه مهندس قالي ان كربيراتير 305 ها يهلك بنزين لانه 2 باب و كمان ها يتعبني في السلانسيه
بجد محتاج رأيكم
لأني مش عارف اعمل ايه و بفكر اجيب الكربيراتير بتاعها و ها يكلف من 700 الي 750 . أفيدوني أفادكم الله
و كما حاجة . ايه بديل المساعد الخلفي للداتشا .
عربيتي موديل 97 متركب عليها موتور رينو 9 . و كمان الشكمان مغلبني شوية لأني رحت لبتاع الشكمانات و عملي فيلم و قالي عايز تعديل و ها يكلفني 300 جنيه .
انتظر رددودكم و خبراتكم و انتظر معرفة مكان التعديل و الصور .
جزاكم الله خيرا

**hazemawad** · 19-01-2016 01:39 PM

متركب عليها موتور رينو 9 . و كمان الشكمان مغلبني شوية لأني رحت لبتاع الشكمانات و عملي فيلم و قالي عايز تعديل و ها يكلفني 300 جنيه .
انت تشرفني في اي وقت في اجازتي....
تصدق اني كنت فاكر انك بتتكلم عل ماكينة الداتشا ولكن طلعت ماكينة ال٩...
لكن خير برضه
الشكمان سهل وانا مغبر الوصله ومظبط الدنيا وماتكلفتش الكلام ده ٨٠ و ٢٠ وهبه
والكارببراتير بيتصلح وله طقم اصلاح لاقيته عند الباساطي وللي مايعرفش اقول ان كاربيراتير ال٩ باب واحد غير بتاع الداتسا اتنين باب
بس لما بيكون مظبوط بيبقي موفر جدا وسلس وبيأمن سرعة وقوه في الغرزة لابأس بها وان كان برضه لا يضاهي قوة و جنون كاربيراتير النوفا الاتنين باب...وعن تجربه
وماتور عربيتك ناعم كتير عن بتاع الداتشا بصراحه
فا من رأيي انك تظبط كاربيراتير عربيتك لانك هاتدخلك في حوار القاعده بتاعة الكاربيراتير الجديد مع المنيوفولد فان كان ولابد هات واحد استيراد و مش هاتعمل حاجه الا انك تنظفه بمنظف كاربيراتيرات من جوه و بره قبل ما تركبه علي الماكينه

**Shoman** · 21-01-2016 11:05 AM

يا حازم باشا اشكرك على الاهتمام
و على فكرة انت سبب اني اشتري الداتشا . اه و الله .
و عموما ها ازورك قريب ان شاء الله . بس انا ها اغيب اسبوعين لظروف شغلي
و طبعا انا واخد قرار اني مش ها اعمل حاجة الا لما اقبلك و تدلني اعمل ايه .
مشكرور جدا بشمهندس حازم
مشكورين جدا السادة اعضاء المنتدى و دائما نلتقي على خير.

**hazemawad** · 22-01-2016 07:25 PM

المشاركة الأصلية كتبت بواسطة shoman

يا حازم باشا اشكرك على الاهتمام
و على فكرة انت سبب اني اشتري الداتشا . اه و الله .
و عموما ها ازورك قريب ان شاء الله . بس انا ها اغيب اسبوعين لظروف شغلي
و طبعا انا واخد قرار اني مش ها اعمل حاجة الا لما اقبلك و تدلني اعمل ايه .
مشكرور جدا بشمهندس حازم
مشكورين جدا السادة اعضاء المنتدى و دائما نلتقي على خير.

انا فى الخدمه دايما بس بينى وبينك كلمة (انت السبب) دى بتخوفنى دايما بل بتزعجنى لانها فى الغالب بتحملنى ذنب اخطاء الصنايعيه فى عربيات وكأنى الضامن والوكيل المعتمد للصنايعيه على جميع انحاء المعموره وده طبعا مش ذنب احاسب عليه....
بس واظنى محق بان العربيه قويه واعماديه طالما حسُن عمل الصنايعى بل هى بالاساس مجنونه اذا طلب منها ذلك وعلى تحدى امام اى مخلوق كان وتحدى امام اى سيارة من فئة ال 1300 شريطة ان تكون العربيه مظبوطه على ايدى وكاريراتيرها الاتنين باب والماكينه الداتشا المجنونه بنت المجنونه

**mohsen128** · 29-01-2016 05:47 AM

ههههههههههههه صدقت والله ياحازم المكنه فعلا بنت مجانين في الجري بس لو ربنا يكرمنا بفتيس تكون حالته 100% العربيه ديه هتزعل عربيات كتير اوى، بتفرم 128 المكنه 1300 وسدت مع اكسيل 1500 لحد 120 راس براس

**hazemawad** · 30-01-2016 07:46 PM

المشاركة الأصلية كتبت بواسطة mohsen128

ههههههههههههه صدقت والله ياحازم المكنه فعلا بنت مجانين في الجري بس لو ربنا يكرمنا بفتيس تكون حالته 100% العربيه ديه هتزعل عربيات كتير اوى، بتفرم 128 المكنه 1300 وسدت مع اكسيل 1500 لحد 120 راس براس

بالله يا محسن انا بالكاربيراتير القديم الاصلى الاتنين باب بتاعها كنت باكل الطريق ولا كان حد بيسد معايا ....
فعلا عربيه مجنونه
بس لو الاقى الكاربيراتير ده انا كنت اعيد الامجاد