الاختبار الاول للداتشا نوفا(( مشكلة في الفتيس))

**mohsen128** · 15-07-2012 10:33 AM

صباح الخير على كل رجالة الداتشا ، هدخل في الموضوع على طول ، انا طبعاً جايب العربية من حوالي 3 اسابيع واول اختبار حقيقي للعربية ديه معايا كان في سفريتن لحد اسماعلية والعربية بصراحه عملت معايا واجب يعني مكنش فيه مشاكل الا ان الغيار الخامس مش شغال يعني كل ما العربية تاخد الغيار يرجع ينتر تاني فكنت ماشي على الربع بس كنت بلاحظ اني لما بزود السرعة و rpm يوصل لحد 3.5 او 4 القي الحرارة عليت جداً لدرجة انها بتكون داخله على الاحمر اول ما السرعة تنزل شوية يعني على 3 القي الحرارة ظبط تاني وكله تمام ، طبعاً عداد السرعة مش شغال تقريباً الوير مقطوع ، مش عارف المشكلة ديه ممكن تكون من ايه مع اني لسه مظبط الرداتير ظبطه كويسة يعني غسيل وتسليك وتلحيم وكله تمام بس مش عارف ممكن يكون الفتيس فيه مشكلة الخامس فالعربية بتحرق على الرابع فبتسخن مش عارف ومحتاج ارائكم معايا لان معنديش خبرة مع الداتشا و طبعاً انتم خبرتكم اكتر مني مع الداتشا وياريت حد ياكدلي المعلومة وهي ان الغيار الخامس بيريح المكنه . صحيح نسيت اقولكم اني بعد ما رجعت اول مرة روحت لميكانيكي فتيس وقلي لازم الفتيس يتفك عشان اشوف مشكلة الخامس .

**bnoqo** · 15-07-2012 11:08 PM

ازيك يامحسن بص هيا المشكلة كده فى المعلقة بتاعت الفتيس وهيا الفتيس مش محتاج ينزل ولاحاجة ظبط الجلبة الى تحت فى الفتيس مادام عصاية الفتيس هيا الى بترجع مرة تانية شوف موضوع حازم عواض وشوف الميكانيكى معاك وولو مفيش حل كل حازم عواض وهيا هايساعدك ان شاء الله

اما بالنسبة للسخونة موضوع السخونة بس بيكون فى القرص وده عيب الريداتير عنك وده حله لازم يتغير تماما وتاخد هوا من العربية تانى بص هوا انا غيرته بـ 300 جينة الشهر الى فات وكل ماقرص الحرارة تنزل مش تعلى وغيرت كمان المروحة والحمد لله كل مااقرص على العربية تبرد فى السلانسية توصل للنص وبس على كده

ولو انت عندك المروحتين على الريداتير يبقى هاتغير الريداتير بس واتفرج على عربية تقرص مية مية معاك
وانا زعلان منك علشان مش ورتنى العربية لحد دلوقت

**mohsen128** · 17-07-2012 10:36 AM

حبيبي والله يا احمد معلش سمحني لاني مشغول جداً الفترة ديه ، بس باذن لله هكلمك ونتقابل ومتزعلش مني والله ظروف الشغل والسفر هما الي منعوني من اني اقبلك ، بخصوص حوار السخونية انا هبقي اعدي على بتاع الريداتير واشوف الحوار ده معاه بس انت جبت ريداتير 3 مصورة ولا ايه ، انا عندي الريداتير الاصلي بتاع العربية وباذن لله هغيرة بس بعد رمضان وكل سنه وانت طيب وكل رجالة الداتشا بخير ، وبالنسبة لموضوع الغيار الخامس هبقي اكلم حازم عوض واظبط معاه الحوار ده . وربنا يسهل وشكراعلى اهتمامك وردك يا احمد وعقبال بقيت رجالة الداتشا ميفدوني بخبرتهم ، ورمضان كريم

**hazemawad** · 28-07-2012 01:13 AM

بص وم الاخر يا عم محسن عشان ماتلفش وتسأل كتير:
بالنسبه للغيار الخامس او اى غيار بينطر من مكانه ( وهنا افرق مابين اللى مابيلقطش واللى بينطر) العيب بيبقى من بليه صغيره على العمود بتاع الغيار والبيليه دى بتقفل على الغيار وفى الفتيس بتاع الداتشا 1-عمود للاول والتانى 2-عمود للتالت والرابع 3-عمود للخامس 4-عمود للمارشدين يعنى اربع بليات .
المشكله هنا فى حاجتين : الاولى ان البليه شاحطه فى المجرى اللى بايته فيه فبالتالى مابتخرجش من مسارها عشان تزنق على العمود بتاع الغيار .
الحاجه التانيه من السوسته اللى بتزق البليه وبتخليها تعمل (دقار) للعمود فميردش لوضع المورتانى فالسوسته لو اصبحت لينه (حنت...من الحنيه) فاصبحت غير ذات فائده.
وفى كلتا الحالتين لابد من فك الفتيس لاخراج البلى والسوست وترييح مبايت البلى ...
وده مش عيب للداتشا وفتيسها ...بل ستجده فى معظم الفتيسات العاده وعلاجه بسيط
اما موضوع الجلبه النحاس ام 15 جنيه دى للى عصاية الفتيس تحس ان فيها بوش جامد وسعات دراع عصايه الفتيس بتفك من الفتيس لما تجيب مارشدين او التانى من كتر البوش اللى فيها ...ف اللى عملته انى فكيت الجلبه ذات ال 1 سم طول واستبدلتها ب جلبه طولها 3 سم تقريبا وبذلك حليت مشكلتين : مشكلة ان الدليل فى وضع الخامس بيبقى على جلبه واجده من الجلبتين اللى جوه الاسطوانه الالومنيوم اللى بيجرى فيها الدليل والمشكله التانيه ان الجلبه الى متركبه الاصليه زمانها بوشت على مدى الفتره اللى تم استخدام عصايه الفتيس من سنة 97 او 98 حتى الان يعنى الجلبه سافرت واصبح الفتيس مع نفسه فى الغيارات

اما ما يتم الحديث عنه بالنسبه لسخونه العربيه : دى بقى مش مشكله فى العربيه!!!!!!!!!
ازاى ؟ هاقولك ازاى :
يعنى الخواجه مركب لك مروحتين تقلب بيهم العربيه طياره لو حبيت وترموستات كذا درجه ( السلوك اللى الترموستات الكتيره دى مش زياده فبريكه والله) لو استخدمت السلك الصح.... عمر- وانا باقولها عمر- ما المؤشر هايجيب الاحمر قى ظل الاتى:
اولا وذى بدئ غير الميكانيكى بتاع حضرتك( وش كده ) لانه لو مؤخذه .
ثانياً بعد ما ربنا يوفقك فى واحد من بتوع ابو دماغ مش دراع فك الكربراتير واظبط الفونيات بتاعته عند دكتور فاهم ( ونصيحه لكل باشا غلب امره وغير الكربراتير الاصلى رجعه تانى بس بعد ما تعمل اللى انا باقول عليه) وقيم الفونيات موجوده فى ام الكتالوج بتاع الخواجه وفيه موضوع منشور على المنتدى فيه الكتالوج والتعب فى ترجمة الكلمات عبر الجوجل ولكنه مفيد بعد ما تقدر تحصل على الترجمه للمعانى والقيم.
ثالثا ابقى قول للباشا الميكانيكى لو سمحت شغل لى الأبانص(تحريف لكلمة advance ) ومعناها التقديم وهيه على شكل قربه حديد على جانب الاسبراتير ومتوصل بيها خرطوم للكاربيراتير من ورا من ناحية الربريزالامامى وتأكد من تمام حكم الخرطوم بينه وبين الكاربيراتير...واضبط كهرباء على كده وبعد كده اتفرج على المؤشر بتاع الحراره .
وعلى العموم زياده الحراره بيبقى من زياده المخلوط من البنزين مع الهواء او عدم ظبط توقت الاشتعال الناتج من تشغيل دماغ الصتايعيه
واخيرا كل عام وانتم طيبين ....وصوماً مقبولا ان شاء الله

**mohsen128** · 08-08-2012 04:02 PM

hazemawad وانت طيب وصوم مقبول من الجميع باذن الله ،، اولاً اشكراً لردك (( بصراحه انت استاذ)) طلع موضوع السخونه من الكربيراتير ببص بالصدفة لقيت مسمرين مهوين على الاخر ربتهم كويس ومن ساعته السخونه معقوله يعني بتزيد عن النص حاجه بسيطه ،، انا عندي كربيرتير واحد باب وكمان من غير عمه للاسف مشتري العربية كده ، وربنا يسهل واجيب الكربيراتير بتاعها اريب لاني سمعت انو بيفرق في عزم العربية جداً ، وموضوع الفتيس بعد العيد ان شاء لله هروح اعمله عندي مكانيكي معرفه وهقوله على شويه المعلومات الي انت عرفتهالي ديه وربنا يسهل ، لاني الي روحتله كان ميكانيكي فيس فقط وقلي فوكلي الفتيس عند ميكانيكي وهتهولي وانا هظبطلك حوار الغيار الخامس .

**hazemawad** · 09-09-2012 01:18 PM

اسف على التأخير فىالرد يا اخى الفاضل بس عذرى ان الكابلات بتاعة التليفون سرقوها من نص رمضان لحد الان ...ومنهم لله اللى سرقوه ... فمعلش يا اخى على التأخير فى الرد ....
لو عاوز اى حاجه فى ظبط العربيه قولى وانا تحت امرك

**mohsen128** · 11-09-2012 03:31 PM

حازم باشا الف شكر ،، وبارك الله فيك وباذن لله اكيد هحتاج خبرتك لاني عندي حاجات كتيرررر في العربية عايز اظبطها ، بس مشغول شوية اليومين دول ، لحد دلوقتي معملتش الفتيس وبمشي حالي بيها على كده