محمود باشا اخبارك آيه اولا
ثانيا بصراحه مش حقدر أنصحك في موضوع نوع ألعربيه لانى مجربتش فيهم غير ال١٢٨ وكانت اول عربيه أركبها وطبعا كتير من أصحابي شربوا منها بنزين وتقدر تقول ان أنا وأخويا وكتير من أصحابنا اتعلَّم فيها ميكانيكا وكهرباء بس كانت اصيله وياما سافرت الساحل والقاهرة وممكن بتاع السوبر ماركت تحت البيت يصلحهالك لو حصل فيها حاجه بس لو عربيه مش تمام حتكرهك فى العربيات
علشان كده أنا حسيب المقارنه لباقي الأعضاء هم يفيدوك اكتر
بس أهم حاجه تكون مرتاح للعربيه اللي حتشتريها نفسياً علشان حتي لو طلع فيها حاجه تتقبلها وانت مبسوط انك بتعمل حاجه انت حاببها وخد في اعتبارك برضه سرعه أعاده البيع علشان انت عارف الدنيا ممكن فى الى وقت تبقي محتاج فلوسها تعرف تسيلها وانت واقف
ثالثا عن الإجراءات بص اهم حاجه اتطمن ان ألعربيه مش نصين لان كتير عربيّات ناس في الفحص مع حرق رقم الشاسيه اتضح انها نصين ومن غير دق والعربيه بتتاخد وبتتعمل قضيه ودي اللي حيفيدك فيها الشخص الموثوق اللي حيكشفلك
تاني حاجه البيع بيكون اما بتوكيل او بعقد مسجل في حاله ان البايع وافق يعملك توكيل ممكن تقرا المشاركات في الموضوع ده حتفيدك http://www.nilemotors.net/Nile/48158...post3876041681 اما لو صمم يبيع بعقد مسجل فأنت كده حتدفع تمن التسجيل أظن في الموديلات دي مش حيعدى ٣٥٠ جنيه وفي الحاله دي حتكون مضطر ترخص وتفحص وتبقي الرخصه باسمك
لو عملك توكيل تقدر تمشي بين لغايه مالرخصه تخلص وبعدها تفحص وتحول الرخصه باسمك
وفي كلتا الحالتين حتستلم من البايع الرخصه ساريه وسواء العقد المسجل او التوكيل و شهاده المخالفات
اما عن ألطريقه في البيع والشراء فالموضوع حسب الاتفاق يعنى اخويا لما باع عربيته الراجل اداله ١٠٠٠جنيه عربون وقاله اعملي التوكيل واستلم منه التوكيل والرخصة والعربيه تاني يوم وسلمه باقي الفلوس أنا لما اشتريت مع اخويا "علشان موسوس شويه" اتفرجت وكشفت علي ألعربيه ودفعت ٢٠٠٠ جنيه عربون واتفقت ان بعدها بيومين "علشان الحق اظبط الفلوس لان أيامها كانت أعاده الانتخابات وبصراحة في الأيام اللي زي كده مبنزلش من البيت غير علي الشغل وبس " وروحت معاه الشهر العقاري عد باقي فلوسه ودخلنا عملي التوكيل وانا معاه وطبعا اتأكدت من صيغه التوكيل بنفسي واستلمت منه شهاده المخالفات اما الحاج فاتفرج على عربيته والراجل صمم علي التسجيل ومدفعي عربون واتفق علي تاتى يوم يتقابل معاه في الشهر العقاري عد فلوسه وسجل والموضوع انتهي فأنت ودماغك واتفاقك مع صاحب ألعربيه
ومبروك مقدما يا كبير وربنا يكرمك بعربيه تريحك وتكون فاتحه خير عليك .
المفضلات