هـل تـؤمـن بالابراج !!.؟

**mahamedaraby** · 25-11-2008 01:38 PM

انا مش مقتنع بيه او بمعنى اصح وانا بقراءه الجرنال جيت على الصفحه الاخيره ممكن ابص على البرج بتاعى لكن مثلا افتح جرانال مخصوص علشان اشوف البرج بيقول ايه النهارده طبعا عمرها ما حصلت

وانا اكتر واحد بكره وبيجى يتكلم عن الموضوع ده راجل كده بيجى فى otv والله شكله داجال بس مودرن وبيلبس خاتم كده فى اخر صابع ليه ومعاه لاب توب وبيلبس بدله وعمال بقى يقول اى كلام للناس

**D . a .\ AYMAN** · 25-11-2008 02:33 PM

المشاركة الأصلية كتبت بواسطة Ayman_52

مش كل صفات البرج الواحد بتكون ميزات...حضرتك لو شفت صفات اى برج هتلاقى المميزات والعيوب....وفى ناس كتيره لما بتقرا صفات برجها سواء مميزات او عيوب بيلاقوا فعلا فى تشابه لحد كبير

وانا شايف ان كل اللى رد...عمال يقول سحر وكهانه وعلم الغيب...انا مش فاهم ايه دخل ده بـــصفات الاشخاص...وفيه فرق بين حظك اليوم اللى كل يوم فى الجرنال وصفات الابراج

وعلى فكره يعنى الواحد لما يقول انه مقتنع بيها يعنى مش مؤمن...بس فعلا بلاقى تشابه كبير بين اللى مكتوب والواقع...وانا بحسها علم معتمد على دراسات اكتر منه معتمد على النجوم ومواقعها والحاجات دى...

وشكلى انا الوحيد اللى مقتنع بالكلام ده هنـــــــــا

كلمة إقتناع هي في حد ذاتها مرادف لكلمة إيمان ... فماينفعش تقول انك مقتنع لكن غير مؤمن لأنها هية هية

أعتقد ان المقصد هنا هو عبارة عن دراسات أخرى لشخصية الإنسان وليس لها علاقة بالأبراج اللهم إلا إذا كانت الأبراج عبارة عن وسيلة لتحديد الأزمنة خلال العام الميلادي فقط

اللى انا أقصده ان في دراسات كتير بتشير الى ان المواليد خلال فصل الصيف يختلفون في شخصياتهم عن مواليد فصل الشتاء وكذا فصل الربيع أو الخريف أو ما بين الفصول وفي أوقات معينة أخرى ... والتأثير بيكون بسبب نوعية الطقس وظروفه شدة الجاذبية الأرضية ودرجات إختلافها المتأثرة بموضع الأرض من النظام الشمسي والأجرام السماوية .. قوة تأثير الشمس من حرارة وموجات كهرومغناطيسية وضوئية المتفاوتة على مدار العام ....

.... لكن في النهاية كل هذه الدراسات هى مجرد تخمينات ونظريات لا يوجد أدلة مادية علمية مؤكدة تستند اليها

وفي نهاية الأمر فهو بهذا الشكل ليس له علاقة بالسحر والتنجيم ولكنه ترسبات ثقافية وحضارية منذ الآف السنين ويحاول المتعمقون في هذا الأمر وضعه في نطاق علمي وإيجاد تفسيرات وأساسات علمية مؤيدة له

فإذا كان الأمر هكذا أنا على إستعداد للإقتناع به .... ولكن إذا كان الأمر أن شخصية الإنسان مواليد برج العقرب مثلا تتميز بالصفات الفلانية لأنه -برج العقرب- يتميز بالشكل الفلاني ويتعامد على النجم الفلاني النشط أفقيا ويتقاطع مع البرج التاني الفلاني ولونه براق يبقى الشخصية كذا .. فأنا غير مقتنع به ولن أقتنع به نهائيا ... اللهم إلا بأدلة مادية قوية جدا وتستند بدورها الى حقائق فقط وليست مجرد نظريات وأعتقد ان تواجد مثل هذه الأدلة شيئ مستحيل

**AhmedGen2** · 25-11-2008 02:45 PM

انا بشبه عملية الأبراج دى بالظبط كأنك عملت استطلاع ل 100 شخص مواليد شهر 9 ، كل واحد يمسك ورقة يكتب فيها مميزاته وعيوبه ، وبعدين أخد الصفات المشتركة أحطها فى كتاب فصل برج العذراء مميزات/عيوب وبكدة لو صادف أى واحد من ال 100 وقرأ الفصل يقولك "آه صح دة فعلا أنا" وهكذااااا

كلام فارغ طبعا ً حتى لو صادف اتفاق بعض الكلام مع الواقع.

**M!NA** · 25-11-2008 03:01 PM

مع احترامي لجميع الآراء...كلام الأبراج ده كله تخاريف أصلا...

و مهما كان قريب من الحقيقة...
لأن في رأيي الطبع بيتكون من التربية و النشأة... يعني مينفعش أقول على مواليد برج معين أنهم أكثر جرأة مثلا... ولا مواليد برج تاني أنهم معندهمش قلب...
لأن الواحد مننا بيتولد و فيه كل الصفات و اللي بيحصل من خبرات الحياة أن حاجات بتطغي على حاجات تانية...نتيجة للتربية و النشأة و الاعتقاد و التجارب اللي الواحد مر بيها...
و في النهاية برضه ... كذب المنجمون و لو صدقوا ...

**ams** · 25-11-2008 11:47 PM

http://www.youtube.com/watch?v=3Dp2Zqk8vHw

http://www.youtube.com/watch?v=uDhxcIaC23k

لا اصدق التنبوء بالغيب -ضد مباشر لعقيدتى- لكنى ارى ان تحليل الشخصية يكون صحيح الى حد ما ، لذا فانا لست مع او ضد لكنى اترك الامر برمته لا يعنينى فى شىء و لن اتعب عقلى فيه

على سبيل الدعابه :
انت برجك ترابى وهى برجها مائى تبقى حياتكو طيييين

**MoDyBeNz2008** · 25-11-2008 11:51 PM

انا بقراها من باب التسلية لكني لا اومن بيها نهائي

**medo55** · 26-11-2008 02:31 AM

الابراج حرام والاخوه ما شاء الله ربنا يجزاهم خيرا كتبو ووضحو بشكل جميل جدا

وحبيت اضيف حديثين كدا للتاكيد برضو

1715 - من أتى عرافا فسأله عن شيء لم تقبل له صلاة أربعين ليلة
الراوي: بعض أزواجه صلى الله عليه وسلم المحدث: مسلم - المصدر: المسند الصحيح - الصفحة أو الرقم: 2230
خلاصة الدرجة: صحيح

157933 - أنهم كانوا على منهل من المناهل فلما بلغهم الإسلام جعل صاحب الماء لقومه من الإبل على أن يسلموا فأسلموا وقسم الإبل بينهم وبدا له أن يرتجعها منهم فأرسل ابنه إلى النبي صلى الله عليه وسلم فقال له ائت النبي صلى الله عليه وسلم فقل له إن أبي يقرئك السلام وإنه جعل لقومه من الإبل على أن يسلموا فأسلموا وقسم الإبل بينهم وبدا له أن يرتجعها منهم أفهو أحق بها أم هم فإن قال لك نعم أو لا فقال له إن أبي شيخ كبير وهو عريف الماء وإنه يسألك أن تجعل لي العرافة بعده فأتاه فقال إن أبي يقرئك السلام فقال و عليك وعلى أبيك السلام فقال إن أبي جعل لقومه مائة من الإبل على أن يسلموا فأسلموا وحسن إسلامهم ثم بدا له أن يرتجعها منهم أفهو أحق بها أم هم فقال إن بدا له أن يسلمها لهم فليسلمها وإن بدا له أن يرتجعها فهو أحق بها منهم فإن هم أسلموا فلهم إسلامهم وإن لم يسلموا قوتلوا على الإسلام فقال إن أبي شيخ كبير وهو عريف الماء وإنه يسألك أن تجعل العرافة لي بعده فقال إن العرافة حق ولابد للناس من عريف ولكن العرفاء في النار
الراوي: جد رجل المحدث: أبو داود - المصدر: سنن أبي داود - الصفحة أو الرقم: 2934
خلاصة الدرجة: سكت عنه [وقد قال في رسالته لأهل مكة كل ما سكت عنه فهو صالح]

**pro_samir** · 28-11-2008 01:47 PM

يا جماعة حتى قرائة حظك اليوم مجرد القراءة بدون اقتناع مينفعش

لانة كما ذكرتم فى الحديث الشريف فيما معناة انة من أتى كاهنا او عرافا وصدقة فقد كفر بما انزل على محمد ... أما لو مصدقهوش فلا تقبل منة صلاة أربعين يوما

وحظك اليوم دى ما هيا الا تنبؤات برضو بالغيب زى الكهنة والعرافين بالظبط

أما موضوع انة مواليد كل برج او فترة معينة من السنة ليهم مواصفات شخصية معينة الله أعلم قد تكون صح لكن بشكل عام بحس ان المواضيع دى بتبقى مجرد اشتغالات مش أكتر .. ودى شرعا مش عارف ان كان فيها حاجة ولا لأ لكن مفتكرش انة فيها حاجة ان شاء الله