استفسار عن بيجو 309

**nour2007** · 04-01-2009 04:09 PM

الف الف الف شكر ليك ايها المنقذ اخي هاني
انا شاكك في منظومة الفرامل ككل والفرملجي قاللي انها عايزه ماستر فرامل علشان الفرامل ضعيفه وراح فاكك خرطوم داخل علي الماستر مش عارف بتاع ايه بس هو والعربيه دايره بيجيب هواء ولقاه عليه زيت وقاللي ده يعني الماستر بايظ وهو سبب ضعف الفرامل ومالوش طقم اصلاح وتمنه حوالي 150 جنيه
بالنسبه لموضوع المساعد العفشجي قاللي انه هو هو بتاع ال405 واني لوفكرت اجيبه جديد واصلي مش هيقل عن 1200 جنيه وهيكون الجوز انما هو ممكن يجيب واحد استيراد 150جنيه زي الفل وهيشتغل تمام واحسن من الجديد
ايه رأيك؟؟

**Nour_Peugeot** · 04-01-2009 05:48 PM

تمام هات ااستيراد لان فلا الاصلي ب 1200 جنيه و مش صناعه فرنسي كمان

04-01-2009 07:22 PM

ياباشا مش هو هو ولا حاجة .
هو الواضح ان مالك السيارة كان مركبلها بتوع ال 405 ولجهل الصنايعى بال 309
افتكر ان هو دا المساعد بتاعها.
هات جوز مع بعض أحسن والافضل يكونوا بتوع بعضيهم يعنى ما تجبش كل مساعد من عربية شكل.
وبالنسبة للفرامل حلها 650 جنية ونغيرلك منطومة الفرامل كاملة بالشمعدانات كمان .
ويركب مكانها ال309 ال mi16 بجد اعجاز !!!!!!!
او ال306 gti-6
.....
وخللية يكشف على القباقيب

**nour2007** · 05-01-2009 09:32 AM

ايه حكاية القباقيب وايه مشاكلها ؟
اصل انا عندي مشكله في العربيه من يوم ما جيبت العربيه عندي العجله الخلفيه الشمال بيحصل فيها تصفير بدون ما ادوس فرامل ولما اكارك علي دواسة الفرامل ممكن الصفاره تروح وكانت بتسخن جدا جدا جدا لردجة انها كانت ممكن تولع بس ماكانتش مأثره علي سحب العربيه تأثير كبير او ممكن انا مالاحظهوش علشان دي اول عربيه اركبها ورحت للفرملجي وقاللي السوسته اللي ماسكه التيل ضعيفه وغيرها بواحده اقوي شويه بس لسه الصفاره موجوده بس السخون مفيش واحيانا الصفاره بتروح لما اكارك علي دواسة القرامل والفرملجي قاللي لو المشكله دنتها زي ما هي يبقي المشكله اكيد في السلك بتاع الهاند بريك لازم لايتغير

**nour2007** · 05-01-2009 09:40 AM

انا عندي مشكله في قفل الشنطه بأي مفتاح بيفتح وده نفسه اللي بيحصل مع الابواب رحت للصنايعي بتاع الاقفال قاللي اقفال الابواب هم بتوع ال505 موجودين ب40 جنيه وموجودين بس المشكله هي قفل الشنطه مالوش بديل فلازم ادور عليه استيراد
ما تعرفشي يا استاذ هاني مين ممكن يوفرهولي
ولك ولكل اعضاء المنتدي جزيل الشكر علي هذا الملتقي العملي العظيم

05-01-2009 04:10 PM

القباقيب المقصود بها طقم التيل الخلفى.
اكشف عليهم كويس ولو محتاجين يتغيروا غيرهم ماتملاهمش.
واكشف على ريجلاش وويرات الهاند بريك.
وكنت عايزك تعرفلى الماستر العمومى بتاع الفرامل 4 ماسورة 2 فقط ???

بالنسبة لكالون الشنطة اعتبرو فى جيبك لكن هيبقى من غيرمفتاح والكوالنجى هيعمللك له مفتاح منفصل .

نصيحة جانبية :-
انا مش عجبنى يابشمهندس عمرو طريقتك فى صيانة العربية !
بمعنى :-
اى عربية مستعملة مهما كان شكلها يوحى بنزاهة مالكها فى معاملتة مع العربية
مش مقياش خالص,,انت واخد بطيخة خضرة ونضيفة لكن مقفولة متعرفش اية اللى جواها.

العربية اول ماجت كان لازم يتعمل الآتى حتى ولو عمله من المصنع10000 كيلو.

تغيير جميع الفلاتر مهما كانت حالتها ,,بنزين-زيت-هواء
تغيير جميع الزيوت مهما كانت حالتها ,, فتيس-باور-فرامل-موتور
تغيير السيور مهما كانت حالتها ,, دينامو,,كاتينة
تغيير اطقم تيل الفرامل مهما كانت حالتها ,,امامى وخلفى
تغيير البوجيهات وسلوكها مهما كانت حالتها
تغيير جميع الفيوزات مهما كانت حالتها
تغيير قواطيش وكابلات البطارية مهما كانت حالتها
لو العربية كربراتير يتفك ويتنضف مهما كانت حالتة
فك تنك البنزين وتنظيفة مهما كانت حالتة
تغيير كاوتش العربية بالكامل
فك الريدياتير وتنظيفة مهما كانت حالتة وتنظيف دورة الماء كاملة وتغيير ثرموثتات الحرارة.
...............
بجانب وجوب فحص الآتى مع حتمية تغييرها اذا لزم الأمر
كبس الموتور
دينامو وبطارية
مراجعة الضفيرة والاسلاك مع ترميم المتآكل منها
كبالن
طقم دبريااااااااااااااج
مارش
طلمبة بنزين-ماء-زيت
منظومة الفرامل بالكامل
ترس الكاتينة وتقسيمتها
منظومة اخراج العادم كاملة
واخيرا العفشة.
..........
طبعا فى ناس هتقول عليا مجنون.
لكن اقسم بالله انا اى عربية مستعملة قبل مايتاخد بها مشوار واحد لازم كل دا يتعمللها
بعد الشراء مباشرةا.

عشان تريح دماغك وتركب العربية وانت مطمن ومتتعرضش لأى دقة نقص من العربية
دا غير انك ممكن تكره العربية واليوم اللى اشتريتها فيه
وكل ساعة عند الميكانيكى,, وبنظلم العربية !!
والسبب الرئيسى هو قلة ضمير البائع دا غير هلكو لعربية وعدم اهتمامة بصيانتها وتلصيمو للاعطال الموجودة لأنه خلاص هيبعها والزبون يلبس بقة اللى فيها !!!
بجانب قلة خبرة المشترى او استعجالو عليها او توفيرا للمال !!

العربية هتقفلها يومين تلاتة ?? طظ
هتصرف الفين تلاتة?? طظظين
هتعب شويتين تلاتة?? الف طظ

لكن فى المقابل ماشى بعربيتك مرتاح البال..
ونتمنى لكم قيادة هادئة وممتعة,,وأزاح الله عن سياراتكم عيون المرورجيه..وايادى الصنايعية الكفتجية
ونأسف للإطالة

**nour2007** · 05-01-2009 05:19 PM

والله ياهاني يا اخويا انا خلصت الفلوس وبفكر ابيعها علشان اكمل الشغل اللي فيها
انت كلامك مضبوط بس مش هنا في مصر ومع كل قطع الغيار المضروبه والمستعمله يعني اللي عمرها الافتراضي علي وشك
انا مهندس صيانه الات ومعدات صناعيه وصدقني عن خبره انا كنت بفكر مثلك كده ولما اتدبست في مشاكل ان حاجات تكون شغاله كويس ولما افتح عندها واشتغل فيها صيانه ممكن تفتح عليا النار بكمية اعطال كتير ويرجعوا يجيبو المشكله فيك
بس اللي بنفذه هو خطه الصيانه الدوريه الموضوعه من قبل المصنع وبقطع غيار هو اللي بيكون باعتها مع المكن
يعني مثلا سير الكاتينه مشاكله ممكن تكون قد تمنه عشر مرات فلازم يتغير ايا كانت حالته حتي لو مشي العربيه 40000 كم
وبعدين علي قد امكانياتي انا بصرف عليها وهي كمان علي قد امكانياتها ماشيه معايا بس علشان مايحصلشي تعارض مع التزامات البيت الماديه
وعموما كله هيتعمل بس واحده واحده
وعموما متشكر ليك جدا علي ردودك الجميله والمفيده جدا جدا
وبالنسبه لموضوع قفل الشنطه موجود عندك وللا في اي جيب من جيوبي بالضبط اصلي خايف لا العربيه تتسرق وبعدين مش عايز اغير الابواب الا مع الشنطه كله مع بعضه لأني لو صلحت الابواب بس هتكون العربيه مفتوحه خالص

وعايز اطمن منك علي نسبة انضغاط المحرك بتاعي كم ؟؟
لأني عرفت ان لو نسبة انضغاط المحرك 8 ده يعني ممكن امشيها ببنزين 80 لحسن ال90 خرب بيتي ولو نسبة الانضغاط 9 يبقي هو ال 90 وامري لله
ربنا يخليك لينا يا حبيب وخدوم الكل بس ياريت ترد علي التليفون او تعمل كل يوم ساعتين للرد علي التليفونات يكونوا مناسبين لظروف شغلك او حتي ساعه واحده في اليوم وممكن تاخد لك رقم يكون 09000900
هههههههههههههههههههه

**nour2007** · 06-01-2009 02:35 PM

ازاي اعرف الماستر العمومى بتاع الفرامل 4 ماسورة 2 فقط ؟؟؟
معلش انا مش عارف فكرة الماستر ده شغاله ازاي ؟؟ وايه الفرق بين ال4 ماسوره وال 2 ماسوره ؟؟؟؟؟

06-01-2009 02:50 PM

دى كانت نصيحة عامة لكل الأعضاء ياصديقى . مش بخصك انت بالذات.
وربنا يعينك عليها ياعمرو باشا وأهم حاجة مادام مش هتعملها مرة واحدة
يبقى تحط خطة لصيانتها الأهم فا الأهم لحد ماتخلصها خالص بإذن الله

وبالنسبة للمساعدين متشتريش حاجة.
انا هعمل عملية جرد للجراج عندى وهنزل قائمة بجميع القطع اللى عندى وهتكون أى حاجة إهداءا طبعا ..وانا بنسبة 80% عندى مساعدين 309gti زيرووووو بس يارب مكنش اديتهم لحد.

ونصيحة من أخ بلاااااااش 80 فى مكن ال 405
انا ممكن أقولك على زاوية الاسبراتير وتقسيمة الكامة اللى تسمح باستخدام ال 80
لكن العربية والله هتكرها.
سلانسية واطى ومبرجل وهتبطل منك كتير.
نتيجة لتحجيم نسبة الإنضغاط فالعربية هتبقى بطة بلدى على كل السرعات
دا غير ان لازم تعدل الجاب بتاع البوجيهات وتجارب للصبح.
دا غيركمية التسقيف اللى هتحصل على الفاضى والمليان لو نقلت غيار بدرى ولو حاجات بسيطة او اثناء الكبس المفاجىء والتسقيف دا لوحدو بلوه كبيرة.
إلخ إلخ

وبالنسبة لقفل الشنطة..انا عندى شنطة كاملة وهفكلك منها القفل وابعتهولك بإذن الله.
لكن إسمحلى على يوم الجمعة عشان أكون فضيت.

واى حاجة اخوكم فى الخدمة وآسف على تقصيرى فى بعض الأحيان

06-01-2009 03:04 PM

المشاركة الأصلية كتبت بواسطة nour2007

ازاي اعرف الماستر العمومى بتاع الفرامل 4 ماسورة 2 فقط ؟؟؟
معلش انا مش عارف فكرة الماستر ده شغاله ازاي ؟؟ وايه الفرق بين ال4 ماسوره وال 2 ماسوره ؟؟؟؟؟

إفتح الكابوت..فى الوش بالظبط وفى صدرالعربية على أيدك اليمين هتلاقى قرص حديدى وهو دا السيرفو راكب فى منتصفة صباع حديد خارج منه مواسيرحديد وراكب علية قربة زيت صغيرة ودى خاصة بزيت الفرامل,,والصباع ده هو ده الماستر العمومى
خارج منو مواسير .عد المواسير دى وقوللى.

والفرق بين الماستر ال 4 ماسورة وال 2 ماسورة.

ان ال 4 مواسير بيروحو مباشرةا لكل ماستر فرعى على حدة وبيقوم الماستر العمومى بتوزيع ضغط الزيت على الاربع مساتر بالتساوى والنظام دا بيكون افضل طبعا

اما ال 2 ماسورة
بيخرج منه ماسورتين فقط مباشرةا الى المساتر الفرعية الامامية فقط
وبيخرج من كل ماسورة وصلة منها الى احد المساتر الخلفية.

الموضوع: استفسار عن بيجو 309

LinkBack

أدوات الموضوع

عرض

-

-

-

-

-

-

المواضيع المتشابهه

استفسار عن بيجو 307

استفسار مهم عن بيجو 407

استفسار فى بيجو 405

استفسار عن بيجو 407

استفسار عن ال بيجو 308

الكلمات الدلالية لهذا الموضوع

المفضلات

المفضلات

ضوابط المشاركة