اقرا الموضوع من اول صفحه وانت حتستفاد
عرض للطباعة
النهارده ماشي 3500 كيلو من ساعه مغيرت للشل الترا بقيس الزيت لقيته على النص بين الميني والماكس بظبط على 1لتر رايك اكمل عليه ولا ازوده ولا انزله
على حسب ما أنا فاهم... حضرتك حاطط زيت شل ألترا 5W-40... بعد ما عملت فلش :(
بصراحة... أنا شاكك إن الفلش يكون هو سبب النقص للأسف...
عموما.. رأيي تنزل الزيت وتحط زيت أتقل شوية زي ما قلتلك قبل كده...
تنزيل الزيت هنا علشان نشيل أي آثار للفلش...لو كان لسه له آثار.
في الحالة دي أنصحك بواحد من اتنين...
كاسترول ماجناتك 10W-40
كاسترول ماجناتيك- زيت محرك السيارات | Castrol
أو موبل 1 بيك لايف 5W-50
5W-50 Oil | Mobil 1 Peak Life 5W-50
بردو عايزك تتأكد من وجود أي تسريب الأول قبل ما تفكر تنزل الزيت... عايزين نطمن...
وما تبصش على الموتور من فوق بس... يا ريت ترفع العربية وتبص عليها من تحت كويس... ولو كان معاك حد خبرة يكون أفضل بكتير.
...
حسب كلام حضرتك انو خطر امشي عليه بلحاله دي انا رفعت العربيه من شهر وكان معايا الميكانيكي وغسلناها والحمد لله كان ترشيح اولسيل الكوبلن وصلحناه وبعديها غسلت وبعدها بأسبوع شيكنا لقينا مفيش ترشيح من اي حته بس زيت الماتور بينقص برده فاقترح عليا انو نزود الناقص علشان الزيت لسه نضيف نمشي عليه 3000 كيلو لو معدل النقص فضل زي ماهو
التغيير من باب الاحتياط فقط.. علشان نبقى ضامنين إننا تخلصنا من كل آثار الفلش... لإن لما بتنزل الزيت غالبا بيفضل شوية من الزيت القديم مركون في بعض الأماكن (كمية بسيطة ما تزيدش عن 100 مل أو نص كباية مية).
للأسف.. الفلش زي ما فيه مواد مذيبة للرواسب فيها مواد تنظيف وغالبا بتبقى زي الصنفرة.. ولو ما تخلصناش من كل بواقي الفلش هيفضل شغال في الموتور..
عموما... التسريب بتاع الكوبلن ده كان زيت الفتيس مش الموتور.
ورجاء حار من أخوك... عمال البنزية وبتوع الزيوت واللي من عينة بلية واللي زيهم خليك حازم معاهم... ما دام حضرتك عارف الصح ما تخليش حد يغير رأيك.
...
إن شاء الله علم وسينفذ
شكرا ياابو سكندر
السلام عليكم ورحمه الله وبركاته
غيرت الزيت لشل الأصفر إللي كنت ماشي عليه ومجربه ومشيت عليه 2368 كيلو بالتمام اللي حصل إنو ركنت العربيه كام يوم وشيكت قبلها على كلحاجه وكانت تمام ولما جيت امشي بيها كعادتي قولت اشيك عليها واتفجئت إن مؤشر الزيت على الميني بعد مكان على المكس بصيت من تحت لفوق شمال يمين مفيش نقطه زيت روحت لمكانيكي قالى كله تمام قولتلو اومال فى ايه قالى كده بتاكل زيت قولتلو مفيش دخان من الشكمان قالي عادى إيه رأيكم
معنى الردود الانجليزى كالاتى
انت بتقول انك قست الزيت طلع على الماكس .. و بعد كام يوم و هى واقفه فى مكانها لم تتحرك اصبح على ال Min
معنى الكلام ده ان العربيه نقصت كيلو زيت و هى واقفه .. و انت بصيت كويس مفيش نقطه زيت تحت العربيه .. راح فين كيلو الزيت ( و هى واقفه اصلا ) ؟؟
انا قلت ان احتمال طريقه قياسك هى اللى سببت اللخبطه دى كالاتى :
- تم قياس الزيت اثناء دوران الموتور و ده اعطاك قياس Max
- او تم قياس الزيت و العربيه سخنه بعد ما بطلت الموتور على طول .. و ده اعطاك قياس Max ( الزيت بيكون منتشر و ممكن يعطى علامه اعلى على المقياس .. لان الزيت احتمال يطرطش على المقياس )
- بعد عده ايام قست الزيت و العربيه بارده لقيته على ال Min ( بعد الزيت كله ما نزل للكرتيره )
لو الاحتمال ده صح .. يبقى لازم تغير طريقتك فى القياس .. لازم تنتظر 5 او 10 دقائق قبل القياس .. و الاصح هو قياس الزيت الصبح قبل اول تدويره ( موش بعد المشاوير )
لو انت بتقيس بعد ما تبطل .. ده خادع يعنى ممكن جدا العربيه تكون ناقصه زيت كتير و القرايه على المقاس حتلاقيها كويسه لان الزيت احتمال يطرطش على المقياس
ده مجرد احتمال .. و ممكن جدا يكون خطأ .. لان اعتقد الطبيعى ان العربيه بعد تبطيل الموتور مباشره المفروض الزيت يقرأ اقل و بعد ما تبرد يقرأ اعلى ؟؟؟؟؟؟؟
الصديق العزيز المهندس بوريو اعطاك اختيارات الزيت 10W40 كاسترول ماجنتيك , و 5W50 موبيل1
و العربيه عندك حسب ما انا فاكر كانت ما بتنقصش على 15W50 .. و نقصت لما عملت الفلش و غيرت لزيت تصنيعى شل الترا 5W40
طبعا لازم تبقى فاهم .. ان الفلش اظهر عيب موجود فعلا من الاول لكن كان غير محسوس ( ده لو انت عملت الفلش بطريقه مظبوطه .. اما لو عملته بطريقه خطأ ممكن هو اللى سبب العيوب الحاليه ) ..
علشان ال Sludge كان سادد الفراغات دى و لما تم تنظيف ال Sludge بان العيب .. و اللى حصل ده افضل للموتور لان ال Sludge تأثيره سيئ على الموتور
اعتقد انك تبدأ ب 5W50 موبيل1 ممكن يمنع النقص فى الزيت .. و ممكن لا .. حتجرب و تشوف .. و ان شاء الله يمنع النقص .. و ممكن بعد غيارين زيت علي الموبيل 1 تجرب مره ال 10W40 و تشوف ايه الحال
مع العلم كل ما تكون اللزوجه اخف يكون افضل ليك يعنى لو بدأت ب 10W40 و لقيته منع النقص يكون افضل .. ( بس لاحظ ان لزوجته قريبه من 5W40 اللى نقص معاك قبل كده )
مع ملاحظه ان كاسترول ماجنتيك احتمال يكون اقل من مجموعه 3 ( الله اعلم .. محتاجه بحث ) و الموبيل 1 حيكون مجموعه 3 على الاقل او اعلى ( على ما اظن )
طبعا احتمال كبير جدا انك عندك تفويت موتور .. يبقى الافضل تعمل نصف العمره .. الموضوع متروك لاختيارك و تقديرك
بالتوفيق
و لازم تغسل جسم الموتور و تدقق فيه كويس و تعرف اماكن الرشح الناشف ان وجد( عامل زى بقعه لونها مختلف عن لون جسم الموتور ) .. ان كان فيه رشح ناشف على الموتور تعرف مكانه و حجمه قد ايه .. و تتابع الرشح ده بيزيد ام لا ( علشان تعرف نقص الزيت ده تسريب اويلسيلات ام تفويت موتور )
لو لقيت تسريب ناشف .. تابعه على مدى اول و تانى غيار زيت موبيل 1 و شوف حيقل او ثابت ( او ممكن يزيد شويه و بعدين يقل )
لو قل الرشح يبقى ممكن ساعتها تنقل على 10w40 و تجرب .. الفكره ان ال Sludge ( لو كميته زايده جدا ) بيكون عامل عازل بين الاويلسيل و الزيت .. فالاويلسيل بينكمش شويه ( لعده اسباب )
لو الاويلسيل لسه سليم .. الزيوت التصنيعيه فيه مواد معالجه للاويلسيلات .. و ممكن الاويلسيل يرجع يسد الفراغ و يمنع التسريب
الرأى الاول و الاخير للمهندس بوريو استشارى زيوت المنتدى
احنا مجرد بنتناقش و اكيد هو متابع .. الملخص ده للتسهيل على المهندس بوريو ( لان الموضوع هنا فيه اكثر من عربيه لانوس ) .. انا اصلا اتلخبطت شويه لما كنت برد عليك
الملخص
1- شل اصفر .. و مفيش نقص
2- عمل فلش .. ثم وضع شل الترا 5w40 و النتيجه :
بعد الف كم لقيته على الحرفm بتاع max
زودت ربع كبلو لقيته نزل على النص بعد اسبوع
مشيت حتى 3500 كيلو الزيت لقيته على النص بين الميني والماكس
3- غيرت الزيت لشل الأصفر تانى و النتيجه:
مشيت عليه 2368 مؤشر الزيت نزل على الميني .. و مفيش رشح زيت
الملحوظه هنا اللى محتاجه تفسير
انه نقص اقل على زيت شل الترا ( مشيت حتى 3500 كيلو الزيت لقيته على النص بين الميني والماكس ) و انت زودت ربع كيلو خلالها
و نقص اكتر فى مسافه اقل على زيت شل الاصفر ( مشيت عليه 2368 مؤشر الزيت نزل على الميني .. و مفيش رشح زيت )
احتمال يكون الاتى .. الفلش نظف جزء .. و شل الترا خلال ال 3 الاف كم عمل تنظيف اضافى .. فابتدأ النقص يزيد بغض النظر عن نوع الزيت
انت عملت الفلش بالظبط ازاى ؟؟ هل قرأت التعليمات على العلبه ؟؟ كل نوع فلش بيختلف عن التانى فى الخطوات و المده .. لكن اللى مفيش خلاف عليه بينهم
- ممنوع المشى بالعربيه
- ممنوع تزويد بنزين ( رفع لفات الموتور )
- المده حسب نوع الفلش بتكون 3 دقائق او 5 دقائق ( ده الاغلب ) .. و فيه انواع بتكون ربع ساعه
والله بتحرجني بزوقك بص يا سيدي انا جبت فالش وولفر وفضيتو في المتور ودورت عشر دقائق وبعد كده نزلتو وسبتو نص ساعة يصفي وبعد كده حطيت ربع لتر زيت الجديد وسبتهم ينزلو وغيرت الفلتر والباقى انت عارفه
ايه رائيك احط زيت شمبر على رأي أستاذ عصام غنايم لغاية ما المتور يجيب آخره واجيب شورت بلوك
نكشت الموضوعين دول من فين
شكرآ ليك وللبشمهندس بوريو بعد الموضوعين دول حاحل المتور وربنا يستر الموضوع ميكبرش جزاكم الله كل خير
قى زيتين فلش ..
واحد منهم مدته 5 دقائق فقط Wolver Motor Flush Express
و الثانى موش مكتوب مده .. لان وظيفته هى تنظيف ثم حفظ المواد الضاره عالقه فى الزيت لحين انزاله .. Wolver Motor Flush Adapter
و مفيش تعليمات استخدام .. بس دى بتكون مكتوبه على العلبه بالتفصيل الممل
أنا آسف لإني ما ردتش بقالي فترة...
كنت عايز أرد وأرفع صورة بس موقع رفع الصور بتاع نايل موتورز كان واقع كذا يوم... حتى الصور اللي كانت مرفوعة عليه ما كانتش بتظهر في المواضيع.
المهم...
أنا أهم حاجة عندي دلوقتي إننا ما نتسرعش وناخد قرار فتح الموتور قبل ما نتأكد تماما إن مفيش حل تاني غير كده.
فتح الموتور بيجر وراه مصاريف تانية كتير... معتقدش إننا في حملها حاليا.
الأول... عايز أتأكد إننا بنقيس الزيت صح.. لإني شاكك نفس الشك بتاع أخويا tasaka
دي صفحة فحص الزيت من كتالوج اللانوس..
http://nileup.com/up/uploads/nilemotors_14756755391.png
ملخص المكتوب هنا كالتالي..
- استهلاك الزيت شيء طبيعي.. ولازم تتابع مستوى الزيت وتزود الناقص.
- لما تقيس الزيت... لازم :
1- توقف العربية على سطح مستوي
2- تستنى كام دقيقة بعد ما توقف الموتور
3- تسحب مقاس الزيت وتمسحه بمنديل
4- بعدين تحطه تاني وترجع تطلعه .. وساعتها تشوف المقاس.
- لما تزود زيت.. لازم يكون من نفس نوع الزيت المحطوط.
طيب ليه أنا بأكد على الكلام ده؟؟؟
علشان أتأكد إننا كنا بنقيس صح وبالتالي قرارنا يكون صح لما نتأكد إن معدل النقص كبير.
المعدل الطبيعي هو حوالي ربع-نص لتر كل 5000 كم... ممكن يزيد على فكرة حسب طبيعة الاستخدام.
حضرتك بردو لسه ما استخدمتش زيوت أتقل... وبالتالي مش قادرين نعرف إذا كان الزيت بينقص بس مع اللزوجة دي ولا مع كل اللزوجات..
لو كان الزيت بينقص مع كل اللزوجات .. ساعتها فعلا ممكن نفكر في فتح الموتور... بس قبل كده ... حرام بصراحة.
جرب لزوجة أعلى.. زيت الـ5W-50 بتاع موبيل مخصص للعربيات اللي ماشية كيلومترات كتير...
وإذا كان لسه بينقص.. نجرب نرجع تاني للـ15W-50 بتاع الشل الأصفر... وساعتها أتوقع إن الزيت ما ينقصش أو ينقص بمعدل طبيعي.
إنما لو فضل ينقص بنفس معدل النقص الحالي... يبقى نفتح الموتور لما تيجي ظروف مناسبة.
عندي أمل إن المسألة كلها ما تخرجش برا أويلسيلات الصبابات.
...
دي مجاملة كبيرة يا صديقي.. لإن الموضوع مش رأيي أنا وبس... كلنا بنتشارك الرأي وبنتعاون مع بعض علشان نوصل لأفضل الحلول.
أشكرك جزيل الشكر لتعبك... ودايما إضافاتك مثمرة فعلا..
متفق معاك في مسألة تأثير الفلش... بس لسه عندي أمل صغير إن ما يكونش تأثيره سيء للدرجة دي.
...
- رأيى هو نفس رأى المهندس بوريو .. بلاش فك الموتور لغايه ما تتأكد ان مفيش حل اخر
خصوصا على ما اتذكر عربيتك موديل 2011 و ماشيه 120 الف كم فقط .. يعنى الموتور المفروض كويس ..
يس على ما اتذكر انك قلت انك لسه شاريها و كانت بتستعمل شل الاصفر من المالك السابق
- و برضه عندى امل انها تكون اويلسيلات صبابات و ده هو هو نفس رأى المهندس بوريو
انتظر منى رد توضيحى لموضوع اويلسيلات الصبابات ده
انا كنت باراجع كل الردود بتاعتك .. و لقيت الرد ده
انا كنت عارف ان العربيه 2011 و ماشيه 125 الف كم .. يعنى المفروض حاله كويسه
لكن الرد ده خلانى اتشكك ان الموتور ممكن فعلا تكون حالته موش مظبوطه
خلاصه الوضع الحالى ان العربيه بتأكل زيت زياده بعد الفلش و ده حيكون اجد سببين :
1- ان الموتور فعلا حالته كانت موش كويسه و الفلش اظهر العيب .. حلها ميكانيكى
2- او ان اللى حصل ده كان نتيجه استعمال خاطئ للفلش ( 10 دقائق بدلا من 5 دقائق .. ده بفرض انك استعملت النوع ده من Wolver ؟؟؟؟ ) .. و ان الموتور كانت حالته معقوله نسبيا ( و ما كانش بينقص زيت ) و ان الفلش اثر على بعض الاويلسيلات
الميكانيكى يقدر يشخص موضوع الصبابات عن طريق العادم .. او تفويت الموتور
موضوع الصبابات اعتقد بيكون شويه دخان فى اول دواره الصبح ( لانه بيحرق الزيت المخزن فى السلندر ) و بعدين مفيش دخان بقيه اليوم .. و لو تفويت حيبقى الدخان على طول
لو حنفترض ان اللى حصل هو الحاله الثانيه ( موتور معقول + استعمال خاطئ للفلش ) .. و تأثر الاويلسيلات
يبقى لو فى احتمال ان اويلسيلات الصبابات اتأثرت حيكون كالاتى :
- اويلسيل تالف .. و تم ازاله طبقه الرواسب من حوله .. حيبدأ تسريب داخل السلندر .. و حله ميكانيكى
- اويلسيل سليم .. و تم ازاله طبقه الرواسب من حوله .. و نتيجه لانه معزول عن الزيت بطبقه الرواسب .. فقد الاويلسيل بعض من محتوياته .. و يمكنه استعواضها مع الوقت لان الاويلسيل سيمتص الزيت ولاضافات المعالجه للاويلسيلات الموجوده فى الزيت ( طبعا الزيت التصنيعى ) .. ده حلها بالتجريه و انت و حظك
- اويلسيل سليم .. و تم ازاله طبقه الرواسب من حوله .. و نتيجه للفلش الخاطئ .. فقد الاويلسيل بعض من محتواياته الاساسيه ( لكن بكميه زائده ) .. قد يقوم الزيت ( طبعا الزيت التصنيعى ) بتعويض بعض الفقد لان الاويلسيل سيمتص الزيت و لكن لن يعوض المواد المفقوده اللازمه ( اذا كان الفقد بكميه زائده جدا لمواد اساسيه ) .. و ده انت و حظك انه يرجع مظبوط ام لا بس انا مستبعده شويه
عندما طلبت منك غسيل الموتور و المراقبه الجيده ( اشترطت ان الفلش تم بطريقه صحيحه ) .. دلوقتى ممكن الفقد فى داخل الموتور عن طريق اويلسيلات الصبابات و مفيش رشح خارجى .. او ممكن يبقى تفويت موتور
على فكره لزوجه 5W50 موبيل ( ده الزيت اللى فضله المهندس بوريو لحالتك ) و 15W50 حتكون نفسها بعد الموتور ما يسخن لان اللزوجه فى الاثنين هى 50 .. الفرق بيكون فى اول فتره من الاستعمال و الزيت بارد .. الفرق ان موبيل فيه اضافات للمواتير القديمه لتحسين الحمايه و حفظ الموتور
شكرا لردك معلش أنا مردتش عليك علشان لما قفلت الموضوع مع الزميل تاساكا إللي اتفضل مشكورا ونبهني على كام ملاحظه ومشيت عليهم جزاه الله وإياك كل خير أنا لسه معملتش حاجه في الموتور من ساعتها لأني راكنها ومن ناحية تانيه خايف افتح وتفتح معايه ومقدرش المها ماديآ بالنسبه للقياس بطبقه زي ما بتقول بحذافيره ولسه قايسه النهارده ولقيته مللي عن أخر مره قيسته من حوالي إسبوع يمكن علشان العربية ممبتحركش حاخد بنصيحتك بس حزود كيلو بشل أصفر زي المحطوط واجرب علشان حاليآ معنديش استعداد مادي لتغيير زيت كامل
شكراً لنصايحك فى نقطه لاحظتها وهى موجوده فعلا وهي اول مباجي ادور الصبح بلاقي دخنه لمده ثانيتين وبعد كده بتختفي مهما دورت وبطلت طول اليوم مدتش الملاحظة دي اهميه علشان انا بركن العربيه 3 ايام بدون استخدام وكمان العادم ابيض فمتوقعتش إنه من الزيت انا اسف لأني مقولتش المعلومه دي
أظن كده صبابات من كلامك اعمل ايه ازود ولا افتح
وفعلاً كل ده بعد مفلشت
و ممكن تبقى بخار ميه .. بس بخار الميه اعتقد ممكن بقعد اكتر من ثانيتين طبعا
و لو دخان صباب يبقى ثانيتين دى كميه بسيطه و الدنيا موش خربانه اوى
بس انتبه ثانيتين دى موش متناسبه مع كميه النقص ( كيلو زيت فى 2500 كم )
علشان كده لازم الميكانيكى يديك رأيه علشان تتأكد هل ده مشكله صبابات ام انها تفويت موتور .. و كمان يقول لك الاحتمالات المبدئيه للمصاريف
و طالما الامور الماديه ملخبطه .. و الميكانيكى يقول لك ان الحاله معقوله و ممكن تمشى شويه .. يبقى انتظر شويه .. و زود زيتك بانتظام
انتظر رأى المهندس بوريو حيعطيك الخلاصه
بالتوفيق و ربنا يسهل لك الامور ان شاء الله
و
نسيت اقولك إن العربيه لو باتت يوم مايطلعش دخان والميكانيكي مش حعرف اوريهالو علشان بيطلع فى اول دواره بس
سؤال تاني هو زيت موبيل اللي حضرتكم مرشحهولي معدني بردو انا بسأل اعرف الفرق بين الزيتين غير اللزوجه اللى على رائيك مش حتفرق
زيت موبيل بيك لايف 5w-50 مخصص للعربيات اللي ماشية مسافات طويلة أو نقدر نعتبرها قديمة شوية (عمرها فوق الـ5 سنوات)...
الزيت ده تخليقي بردو..
بس لو معدل نقص الزيت عالي كده.. يبقى خليك في المعدني.. خصوصا إن الأسعار بتزيد كل شوية في بلدنا المحروسة.
أعتقد لزوجة 15w-50 أو 20w-50 هتكون مناسبة بالنسبالك.
وممكن تروح على زيت شل الأحمر... أعتقد سعره أقل ومواصفاته مناسبة بردو.
أو ممكن تحط زيت من التعاون... بردو زيوتهم كويسة خصوصا لو جبت مستوى sj أو sl... وأسعارهم أقل من السوق... بس اختار محطة موثوق فيها علشان الغش.
...
ايه المناسب للسيارة لانوس 37000كم
الزيت المناسب هو اللي مواصفاته مكتوبة في كتالوج عربيتك...
الكيلومترات مالهاش دعوة باختيار الزيت...
قول لنا على أسلوب سواقتك وتحميلك على الموتور علشان نساعدك أكتر...
ويا ريت تقرا الموضوع ده من أوله علشان فيه حاجات كتير قوي هتعرفها..
وغالبا كلامنا مش هيختلف عنه..
في انتظار رد حضرتك
...