عربيتى لانوس 2015

**falcon44** · 31-01-2016 11:04 PM

السلام عليكم ورحمة الله وبركاته
بعد اذن حضراتكم انا عايز استفيد من خبرتكم فى موضوع الزيوت وهطرح عليكم حالتى واعتذر لو فيها اطاله
انا عربيتى لانوس 2015 اشتريتها من 3 شهور تقريبا كانت كسر زيرو وكان عدادها 4 الاف كيلو تقريبا وطبعا هيا فى الضمان ودلوقتى عدادها داخل على 9 الاف كيلو وبصراحه مش عاجبنى ولا صوت الماتور ولا استهلاك البنزين وصاحب العربيه الاصلى اللى اشتريت منه العربية عمل اول صيانه صيانة ال5 الاف فى التوكيل بس عاملها على عداد 3 الاف كيلو بس لان العربيه مكنتش بتتحرك كتير ومكتوب فى فاتورة التوكيل ان الزيت اتغير فى الصيانه دى بزيت اسمه xhpوسعره 140 جنيه بس انا بصراحه مش عارف ده زيت كام كيلو ولا لزوجه كام ولا اى حاجه بس اللى متاكد منه انه مش عاجبنى وصوت الماتور عالى ومسموع واستهلاك البنزين سىء مع العلم ان والدى معاه لانوس 2012 من الزيرو وصوت الماتور انعم بكتير وسحب العربيه افضل برضه بشكل ملحوظ وافضل قليلا فى استهلاك البنزين وهو بيستخدم زيت التعاون الاصفر برضه من الزيرو والمفروض انى اروح صيانة ال10 الاف قريب جدا بس مش عارف اجيب زيت ايه ولزوجته ايه واللى موجود فيها دلوقتى ده ايه ولزوجته ايه واعمل ايه ياريت اعرف من حضراتكم
اسف على الاطاله وشكرا

**borio1704** · 01-02-2016 12:58 AM

دايما هات الزيت المكتوبة مواصفاته في الكتالوج... ونصيحة مني اطلب كتالوج العربية من اللي اشتريتها منه.. دي ما مشيتش لسه...

عموما .. لحد ما تجيب الكتالوج.. دي صورة صفحة الزيت في كتالوج اللانوس... وياريت تتأكد من الصفحة دي في الكتالوج الأصلي اللي نازل معاها.

لو عايز تستخدم زيت معدني .. اللزوجات المسموج بيها والمناسبة لجو مصر (حسب الكتالوج) هي:

20W-40 و 20W-50
15W-40 و 15W-50

اللزوجات اللي جاية دي تنفع تشتغل معاك.. بس غالبا هتلاقيها نصف تخليقية

10W-30 و 10W-40 و 10W-50

لو عايز تحط زيت تخليقي (أفضل بس أغلى).. اللزوجات دي هتمشي معاك

5W-30 أو 5W-40 أو 5W-50

باختصار كده.. كل الزيوت في السوق تقدر تحطها... المهم انت أولوياتك إيه... وإيه طبيعة استخدامك للعربية... هو ده اللي هيحدد أنسب زيت.

...

**pepo2011** · 01-02-2016 08:49 AM

اعتقد الرد السابق كافي لحضرتك في موضوع الزيت
اما موضوع السحب والصوت لازم ميكانيكي يشوفها لانه ممكن يكون حاجة تانية غير الزيت

**falcon44** · 01-02-2016 09:23 AM

استاذ بييو
انا عايز اعرف نوع زيت كويس احطه فى العربيه يمشى 10 الاف كيلو

**borio1704** · 01-02-2016 09:24 AM

المشاركة الأصلية كتبت بواسطة falcon44

الف شكر لحضرتك على الرد
انا المشكله معرفش ليه حاسس ان صوت العربيه مش عاجبنى وخصوصا ان العربيه جديده ومعرفتش من حضرتك الزيت اللى فيها دلوقتى لزوجته ايه ويمشى كام كيلو وانزله دلوقتى بالفلتر ولا ايه
وبخصوص اولوياتى واستخدامى فهو اكيد انا عايز احافظ على الماتور مع استهلاك بنزين اقل وصوت ماتور اهدى واستخدامى للعربيه فهو تقريبا متوسط مش عالى يعنى تقريبا فى الشهر ممكن اعمل 700 او 800 كيلو وممكن توصل ل1000 كيلو لو سافرت مثلا بس مش علطول والعربيه بتتحرك كل يوم الصبح بدرى للشغل غير شوية مشاوير وانا من السويس يعنى الزحمه مش كبيره اوى وياريت اعرف رأى حضرتك ايه فى التعاون الاصفر والاهم ياريت حضرتك تقولى لو مكانى حتحط زيت ايه وشكرا جزيلا لحضرتك واسف مره تانيه على الاطاله

يا فندم أكيد أنا مش حافظ كل الكتالوجات ولا كل أنواع الزيوت بأسماءها التجارية

عموما.. الـXHP ده من منتجات موبيل.. وغالبا هتلاقيه بلزوجة 20W-50.. ودرجة جودة API SL.. وده الموجود في السعودية لإني عايش هناك (معرفش إيه نظام مصر دلوقتي.. يجوز مواصفاته اتغيرت).

المدة اللي يقعدها الزيت في الموتور هي نفسها المكتوبة في الكتالوج... نظام زيت الـ3000 والـ5000 ده سيبك منه خالص.. كله فتي بدون علم.

الكتالوج عندك بيقول إنك تغير على 10 آلاف كيلومتر أو 6 شهور (أيهما أسبق) .. ده في الأحوال العادية.. وفي الأحوال الشاقة على الزيت يبقى تغير على 5000 كيلومتر أو 3 شهور (بردو أيهما أسبق).

والأحوال الشاقة هي اللي كلنا بنسوق عربياتنا بيها... يعني حضرتك هتغير على 5000 أو 3 شهور.

أهم شيء في كل الكلام ده إن الزيت يكون مطابق لمواصفات الكتالوج.. مش أقل منه...

على فكرة.. الزيت مش لزوجة وبس... الكتالوج طالب منك مستوى جودة للزيت اسمه SH... وما ينفعش تحط أي زيت مستوى جودته أقل منه.

الموضوع ده فيه الخلاصة بالنسبة للزيوت ومستوى الجودة.. أرجو إنك تقراه.
http://www.nilemotors.net/Nile/341680-a.html

أما بالنسبة لصوت الموتور... فأعتقد إن الموضوع ده له ارتباط بجودة تقفيل الموتور .. مش الزيت... لإن دي شكوى عامة من كل اللي اشتروا اللانوس بعد ما بقت شيفروليه.. وخصوصا اللي كان عندهم لانوس قبل كده.

الحاجة اللي عايز أؤكد عليها... هي إن صوت الموتور ماهواش مؤشر أساسي على جودة الزيت.. أغلب الزيوت التخليقية بتخلي صوت الموتور أعلى.

وبالنسبة لزيت التعاون الأصفر.. خلينا نحكم عليه من مواصفاته... وكل اللي طالبه من حضرتك إنك تجيبلنا درجة لزوجته ومستوى جودته.. أو صورة واضحة للعلبة من ورا (علشان بيبقى فيها كامل المواصفات).

حاجة زي كده:

وأنا تحت أمرك في أي استفسار بعد كده.

...