كيف يتم طلاء السياره بالكامل ؟؟؟؟

**mina_opel** · 07-02-2016 09:07 PM

اصدقائي الاعزاء
حابب اخذ رايكم في حاجه كده عايز اعملها
انا نويت اني ارش سيارتي بالكامل وكنت عايز اخذ رايكم وملاحظتم علي هذا الموضوع
انا عربيتي اوكتافيا a5 موديل 2007 وطبعا بها بعض الخدوش البسيطه وخبطه في العتبه الشمال ونغزه بسيطه في القايم الشمال نتيجه سقوط طوبه عليه وكانها كانت متنشنه في القايم حتي كده قد عقلتين الصوبع
وفي يوم في الاسكندريه الدنيا شتت جامد وكانها بتحدف طوب ادت الي وجود بعض النقر في السقف من الثلج
المهم مش عايز اطول عليكم
انا حسيت ان الحاجات دي كلها علشان اعلجها لازم حرش الحتت دي فقولت بالمره ارش العربيه كلها نظافه
المهم انا سمعت انه حيتم ازاله طبقه الورنيش فقط من علي سطح السياره وعلاج المشاكل السابقه دون استخدام المعجون الا قي الحالات الضروريه فقط ثم يتم رش السياره مره اخري ووضع الورنيش الجديد
السؤال
هل يوجد ورنيش في السوق يعادل الورنيش الفبريكه في جودته وقوه استحماله

**mario_9111** · 08-02-2016 12:23 AM

ياباشا ورنيش ايه ازاي طيب والنقر والخدوش هتروح فين الورنبش دا شفاف لازم لون العربيه ودي البويه. بص العربيه بتتسنفر الأول وتتخشن وكده طبقه الورنيش القديم بتطلع بعد كده معجون ثم فلر وسنفره وغسيل. وبعدين رش بويه وورنيش ثم سحق وتلميع. .. أحسن بويه ورنيش سكنز الكيلو تقريبا 750 ج ... نصيحه بلاش رش العربيه بالكامل دا هيقلل من تمنها جامد ومش هتعرف تبعها ياريت تبعها كده أفضل. وربنا يوفقك

**gamal_sharaf** · 08-02-2016 08:48 AM

لو العربية مش راشة قبل كدة مترشش العربية خالص وخليها فابريكة
انما لو رشة قبل كدة ، ممكن ترش الاماكن اللى رشت بس
يعنى لو رشت حزام ، يبقى ترش الحزام بس وسيب السقف والشنطة
لو العربية راشة كلها ، يبقى ممكن ترشها كلها
ربنا يوفقك

**mohamed-83** · 08-02-2016 08:57 AM

إللى أعرف إنه يقلل من تمن العربيه رش الدواخل فقط
إنما رش العربيه من برة مش بيأثر يعنى عشان أخلى العربيه فابريكه أسيبها مخبطه
يعنى فى حد ممكن يمشى لابس هدوم مقطعه عشان ماركه
شكل العربيه من شكل صاحبها العربيه فى الأساس غير إنها من أساسيات الحياة دلوقتى برضو نزاهه

**Ahmed abdkarim** · 08-02-2016 10:06 AM

العربية كده سعرها حيقل جامد لانها حتبقى مش فابريكة
وفابريكة يعنى العربية الصاج بتاعها و البويه متلمستش من اى بوهيجى
فيها نقر فيها جروح دى حاجه عادية فى ثقافة المشترى المصرى العربية تكون معفنه وطالع عينها بس فابريكة يديك فلوسك و فوق منهم بوسة
اما لو فيها 1 سم دهان يفضل يفاصل فيك و يبقى شاكك فى العربية كلها و كمان يكون مش مبسوط وهو شارى العربية
لو الحاجات دى مضايقة حضرتك بيعها زى ما هى كده واشترى عربية تانية لان سعرها حيقل على الاقل 10000 جنيه لو رشتها

**mina_opel** · 08-02-2016 05:31 PM

ياعني انا افهم من كده اني لو رشيت العربيه كلها
لازم كلها حتاخد طبقه معجون
ولا المعجون حيكون في الاماكن المحتاجه بس لمعجون
وايه اللي يعيب العربيه لو رشتها كلها بدون معجون خالص تزاهه ياعني كده زي ما بيقولو

**tasaka** · 08-02-2016 06:01 PM

لو رشيت السقف .. يبقى كويس لو عرفت تبيع العربيه دى .. اصلا محدش حيبقى عايز ياخذها حتى لو هو متاكد و شاف بعينه العربيه قبل رش السقف .. لانه موش حيعرف يبيعها بسهوله بعد كده لات الناس تخاف تكون مقلوبه فى حادثه

و الكابوت نفس القصه بس على اقل

ممكن تلمع تلميع كويس .. ممكن لو هى راشه اجناب قيل كده ترش الاجناب تانى .. اما سقف و كابوت .. بلاش

**mina_opel** · 08-02-2016 09:21 PM

طب ممكن تفيدونى ياشباب
عندى خبطة فى القايم الشمال ( طوبة وقعت على القايم ) ناس يتقولى اعملة وناس بتقولى سيبة كدة
بس انا شكلة مضيقنى بصراحه
اية اسلم طريقة لردة وهل يمكن ردة على البارد
اغلب السمكرية بيقولو لى لازم حندى بونطة لحام ونشد الصاج بس لازم بعد كدة يترش
وانا مش عايز ارش القايم
هى حته كدة قد الصوبع بس جنه امى بصراحه

**mina_opel** · 08-02-2016 09:43 PM

معلش ياشباب انا عارف اني زهقتكم مني
بس انا بحب عربيتي تكون شكلها شيك ونظيفه
سؤال بس ارجوا منكم ان تفيدوني فيه
لو حبيت اعمل شويه السمكره دي ( القايم و العتبه )
اعملهم عندي سمكري في الحرفين ولاا مركز صيانه ولاا التوكيل ايهما سيعطيني شغل ١٠٠ ١٠٠
في مركز صيانه عندنا في الاسكندريه اسمه كارفيكس انا بتعامل معاه في بعض الحاجات بس مجربتهمش في شغل السمكره والرش وكده
ارجوا ان تفيدوني الي انهي جهه اتجهه

**طارق _عبد السلام** · 09-02-2016 07:02 PM

لو رشيتها وكمان بالسقف هتطلع منها بصعوبه وسعرها هينزل الارض علشان السقف

ثانيا مفيش حاجه اسمها هترشها من غير معجون لان عند نقر وخبطات.............نصيحه لمعها كويس او لو مش فارق معاك كل اللى فات رشها وروقها على هواك