تغيير ربع امامى لانوس بالبطاحات

**friend4allmo** · 24-02-2016 12:18 PM

السلام عليكم
معايا لانوس 2014 عملت حادثة ووريتها لكذا سمكري قالولى دي لازم تغير ربع بس المفروض يكون ربع بالبطاحات عشان ساعات الربع بيبقى من قبل البطاحات.
سؤالى عن "كم سعر ربع امامى فيه الجزء بتاع البطاحات"؟
و أفضل الأماكن اجيب منها الربع ده؟ و هل أى ربع لانوس امامى يبقى مظبوط و كويس و يركب وللا فيه حاجات لازم اراعيها فى الموضوع ده ؟
و السمكري ياخد تقريبا كام عشان تغيير الربعه عشان انا سمعت من كذا سمكري اسعار متفاوتة جدا؟

و جزاكم الله خيرا

**friend4allmo** · 24-02-2016 03:10 PM

هوا ده شكل الخبطة
هل دي ممكن تتعدل وللا لازم فعلا تغير ربع ؟

**lamada** · 24-02-2016 03:42 PM

ده كتر الف خير السمكرى انه قلك ربع بس اللى هيتغير

**fathiazab** · 24-02-2016 05:40 PM

المهم انت بخير الحمد لله على سلامتك

**AlphaCharlie** · 24-02-2016 08:40 PM

اولا الف حمدا لله علي سلامتك. ومعلش قدر الله ما شاء فعل.
الصورة مش باينة كويس اذا كان السلاح الشمال متضرر بشدة ام لا.
لكن انا اظن ودي وجهة نظري انها تتصلح بس طبعا حتحتاج صدر امامي كامل بالاكصدام والفوم والفوانيس والشبكة وكل محتويات الصدر الامامي.
وايضا مجموعة تبريد ريداتير وسربنتينة ومراوح.
ورفرف وكبوت.
واحتمال سلاح شاسيه.
طبعا حضرتك حتحسب الحاجات دي منفردة بكام. وانك تشتري نصف امامي كامل بكام. بس اعتقد انك حتشتري الحاجات مفردة ارخص.
لاني اشتريت الحاجات دي بالضبط لهيونداي نيو اكسنت والحاجات دي اتكلفت 5500جنيه استيراد بوش الموتور الفيبر وعمة الهواء.

**dbabis8** · 25-02-2016 01:47 AM

انا شايفها محتاجة نص مش ربع عشان تطلع مظبوطة

**friend4allmo** · 29-02-2016 06:42 PM

شكرا لردودكم
و جزاكم الله خيرا
ربنا يسلمكم و عربياتكم و ما يبتلى حد بالحوادث أبدا

بعد سؤال كذا سمكري و بصوا عليها وصلت انى المفروض اغير الفخدةا لشمال بالصدر بس هيبقى فيه زراجين عشان العربية تفتح عشان الميكانيكي يعرف يفك الموتور و الفخدة اليمين فيها لوحة بسيطة هتتعدل

اللى انا محتار فيه بصراحة السمكرى
انا رحت لكذا سمكرى و سمعت اسعار متفاوتة جدا و الناس اللى اشتغلت معاهم بيشكروا فيهم كلهم
2000 , 3000 , 5000, 6500
تخيلوا دى كلها اسعار سمعتها
و محتار و فيه واحد يقولى ال 2000 ده مش هيعرف يظبطها وواحد ينصحنى انى اششوف حد بياخد المقاسات بالكمبيوتر عشان يظبطها
انا بصراحة اول مرة اسمع عن موضوع مقاسات بالكمبيوتر

بسؤالى لحضراتكم و اتمنى تساعدونى مشكورين
هوا ايه موضوع المقاسات بالكمبيوتر ده؟
و كمان تقريبا شغل السمكرة اللى قلتة ده المفروض السمكري فى المعقول ياخد عليه كام ؟

و جزاكم الله خيرا

**Mohamed Desoky** · 29-02-2016 09:22 PM

وعليكم السلام ورحمة الله وبركاته انا كان عندى لانوس 2 واتخبتط من عربيه نقل تقريبا نفس الخبطه والجانب الشمال اتقصر وكان عايززرجينه المهم لازم نص لوعايز عربيه مظبوطه وكلفتنى 7 الاف ج بعد الثوره على طول لان الدنيا كانت فوضه وبتاع النقل خبطنى وضحك وجرى ولا نمره ولا عملتله اى حاجه حسبى الله ونعمه الوكيل فيه كان هيموتنى وربنا سترها وبعد ماتتصلح سدقنى مش هتحب تركبها تانى وقلبى معاك لانى جربت وشوفت القرف لحد ما بعتها واللى اشتراها قلتله الحقيقه كامله علشان ارضى ربنا وضميرى وربنا معاك

**mohfud** · 01-03-2016 06:24 PM

الحمد لله علي سلامتك

**tameem2010** · 02-03-2016 12:38 AM

حمد لله على سلامتك
المصنعيات للسمكري مش هتقل عن 4000 جنيه باي حال من الاحول ده السعر العادي
السمكري مصنعيته دايما عاليه لانه بيعتبر نفسه فنان وبيرسم لوحة وبصراحة حقه
لان ال سم الواد بيفرق
ربنا يصبرك ويكفينا شر الحوادث