أرجو منكم المساعدة - موتور 318i 2009

**Ahmad Azaaz** · 14-03-2016 01:29 AM

السلام عليكم جميعًا،،

من أسبوع اشترى الوالد أول عربية بي ام دبليو بالنسبة له موديل 318i 2009 عامله 100 الف كيلو متر، أوتوماتيك بدون iDrive، وتم فحصها بواسطة فني والحمد لله (كانت) العربية صفقة ممتازة من حيث الحالة والسعر. الي حصل إنها مشيت الف كيلو متر (سفر)، وجت أول امبارح وقفت مرة واحدة وهوا ماشي بيها (على سرعة 100كم/ساعة تقريبًا) وتقريبًا، ولقلة الخبرة بقيادة الأوتوماتيك كان قارص (RPM 5 مثلًا). ركن على جنب الطريق وحاول يدورها لكن لا حياة لمن تنادي. اتصل بكهربائي وحاول يدورها ببطارية تانية بدون فايدة، جاب ونش ونقلها للورشة وجاب ميكانيكي وفك المارش وقاله محروق، وغيره بواحد استيراد وركبه وجرب يدور العربية لكن كانت تقيلة جدًا في الدوارة، قاله العربية ناقصة زيت، وبناء على كده نزل الزيت كله وحط لها زيت (النجمة على سبيل التجربة) ودور العربية اشتغلت ودارت لكن فيها صوت غريب. وهنا الميكانيكي قال له إن العربية محتاجة شورت بلوك.
ده الي فهمته نقلًا عن الوالد (أنا للأسف متواجد في النوبة حاليًا لظروف العمل والحاج في المنصورة).
قدر الله وما شاء فعل ..

الأسئلة:

- منين يقدر يشتري الموتور/الشورت بلوك (سواء في المنصورة أو القاهرة أو أي مكان آخر) بسعر كويس ويكون بحالة ممتازة علشان ما يعانيش منه في المستقبل؟

- في حالة ما إذا لم يتمكن من إنه يلاقي نفس الموتور، هل ممكن يركب موتور لموديل عربية آخر (320 مثلًا أو ما شابه)؟

- وأنا بدور على الانترنت عن عناوين أو أرقام، قرأت عن مشكلة نقص الزيت في الموديل ده، هل الموضوع ده حقيقي ومنتشر؟ وهل ممكن يكون ده السبب في الي حصل؟ وازاي ممكن يتجنب حاجة زي كده؟

شكرًا جزيلًا مقدمًا،،

**svneleven** · 14-03-2016 04:03 AM

انا كان معايا ال320 مو 2011 يعني نفس الموتور تقريبا و الزيت ما كانش بينقص غير بالمعدل الطبيعي. المهم الموتور 2000 سي سي زي ال 320 لكن اعتقد الفرق في الكونترول مش اكتر.

**pepo2011** · 14-03-2016 08:19 AM

الشورت بلوك في الحرفيين
انا رايح النهاردة انشاء الله اغير كورونا لعربيتي هاسالك عليه بالمرة

**عبدالله برعى** · 14-03-2016 10:24 AM

شورت بلوك ؟؟؟؟
- ما الاسباب لذلك
- وما علاقة البطء فى الدوارة والشورت بلوك
- 100 الف كم وشورت بلوك ؟؟؟؟غريبة و bmw كمان اشك فى التشخيص
- وهل كشف على الشورت بلوك بالعين المجردة
- فحصها بواسطة فني ؟؟؟؟ ازاى فني يحكم على bmw -----السيارة التي بثمن موتورك يتم الكشف عنها فى توكيل او مركز صيانه
....

-عموما ممكن استيراد الحرفيين
- ولكن لو غيرت موتور كامل او شورت التكلفة مرتفعه
- ولماذا لم يتم الاتصال بصاحبها السابق
- الموضوع يحتاج دراية وخبرة منعا للتكلفة الباهظة

واحييك انا كمان من بلاد النوبة

**Ahmad Azaaz** · 14-03-2016 12:36 PM

svneleven
شكرًا للتوضيح

pepo2011
جزاك الله كل خير وفي انتظار ردك ان شاء الله

عبدالله برعي
أنا معاك في كل كلمة فيما يتعلق بعملية الفحص، ولكن ما فدرتش أقول له كده لأنه أكيد مش ناقص :)

**pepo2011** · 14-03-2016 01:04 PM

المشاركة الأصلية كتبت بواسطة ahmad azaaz

svneleven
شكرًا للتوضيح

pepo2011
جزاك الله كل خير وفي انتظار ردك ان شاء الله

عبدالله برعي
أنا معاك في كل كلمة فيما يتعلق بعملية الفحص، ولكن ما فدرتش أقول له كده لأنه أكيد مش ناقص :)

انت بتتعامل مع ميكانيكي bmw اساسا
لازم اكتر من واحد يشوفها ولا ايه؟؟

**عبدالله برعى** · 14-03-2016 06:43 PM

المشاركة الأصلية كتبت بواسطة ahmad azaaz

svneleven

عبدالله برعي
أنا معاك في كل كلمة فيما يتعلق بعملية الفحص، ولكن ما فدرتش أقول له كده لأنه أكيد مش ناقص :)

الاخ الكريم لابد ان تكون طريقة التصليح على خطوات واثقة ...بمعني ان الذى يشترى كاوتش يسال مرة ومرات عديدة لاصابة الافضل

**pepo2011** · 16-03-2016 08:21 AM

للاسف سمعت اخبار مش كويسة عن المكنة دي امبارح
الشورت بلوك من 12 ل 15 الف جنيه اتصدمت والصدمة الاخري انه نادر جدااااا
وغير موجود
والخيار لحضرتك

**Ahmad Azaaz** · 17-03-2016 07:56 PM

شكرً ا جزيلًا على تعاونكم وردودكم،، وبالفعل فحص العربية واحد متخصص في صيانة bmw وأوضح لنا إن السبب في العطل نقص زيت العربية أو عطل في طرمبة الزيت (مع العلم إن العربية ما طلعتش أي رسالة خطأ متعلقة بالزيت وحتي مقاس الزيت كان باين إنه طبيعي).
قدر الله وما شاء فعل واشترينا شورت بلوك واتفقنا مع الراجل على فترة تجربة 15 يوم.
ايه المفروض يتعمل لاختبار الموتور الجديد خلال فترة الضمان (15 يوم)؟
وازاي ممكن اتجنب موضوع الزيت ده في المستقبل؟
وشكرًا مرة تانية على تعاونكم.

**wma_eg** · 28-03-2016 12:58 PM

الف مبرووك ،
بس خلى بالك مدام الزيت طبيعى مش ناقص ، يبقى لازم تخلى الميكانيكى يشيك على طرمبة الزيت عالشان المشكلة متتكرش مع المتور الجديد
لان ممكن يكون العيب منها ومابتوصلش زيت للماتور فاتتكرر المشكلة لا قدر الله

وياريت تقولنا جيبت الشورت بلوك منين وبكام