طنبورة و صبابات و اشياء اخرى ( سينيك ) :(

**RagehYS** · 24-04-2016 12:29 AM

السلام عليكم

انا معايا سينيك 2000 ( 1600 سى سى ) بقالها كام شهر و الحمد لله كانت ماشية زى الفل .. لحد ما من فترة كدة حصل فيها مشكلة بسيطة انها لما اركنها يوم او اتنين مترضاش تدور غير بعد خناقات كتير مع ان طرمبة البنزين سليمة و كشف الكومبيوتر مطلعش حاجة :(
المهم ان بعد شوية تظبيطات كهربا فيها العيب تقريبا اختفى .. المشكلة انى فجأة دخلت فى مشكلة تانية فى نفس اليوم اللى ظبطت فيه الكلام ده ...
كل ما اشغل التكييف الاقى لمبة البطارية نورت .. قولت ارجع بيها تانى للكهربائى .. المشكلة انى فجأة سمعت صوت خربطة جامدة و ريحة شياط كوتش .. وقفت و فتحت الكبوت لقيت السير الخارجى للمحرك ( بتاع الدينامو تقريبا ) مقطوع .. كلمت الكهربائى جه بص عليها و قالى دى طنبورة الكرنك اتكسرت ( الكاوتشة اللى بين الحلقتين المعدن اتاكلت ) و هى اللى قطعت السير .. دورت العربية و مشيت بيها لحد الميكانيكى .. حل الطنبورة طلعت مكسورة فعلا .. بعتنى لمخرطة عشان تلحم الطنبورة المكسورة فى بعضها بدل الكاوتشة اللى بتبقى بينهم ..
لحمتها و رجعتله .. ركبها .. جيت ادور بعد ما ركب السير .. لاقيت الكاتينة تقريبا بتفوت .. بتدور بسرعة من غير ما العربية تشتغل .. مش الصوت الطبيعى يعنى .. نزل الميكانيكى شافها تانى .. قالى الكاتينة دارت على الفاضى .. و تقريبا ده بسبب ان الترس بتاعها مش مربوط بشكل مستقل انما بيبقى موصول بالطنبورة دى و واضح كدة انها اتلحمت غلط فمش بايتة فى مكانها صح ( مش مستوعب قوى الحدوتة دى الحقيقة او مش عارف افهمها :( ) و كان فى جزء من السير المقطوع كمان محشور فى الكاتينة .. بس سير الكاتينة نفسه متقطعش ..
المهم ان هو مرضيش يلعب فيها اكتر من كدة .. و قالى ان دوران الكاتينة على الفاضى لما جربنا ندور زيه زى ما يبقى سير الكاتينة اتقطع .. و ان كدة الموتور غالبا هيبقى جاب صبابات ( اتعوجت )

السؤال بقى .. التسلسل ده كدة منطقى ؟ يعنى فعلا كدة هلاقى الصبابات اتعوجت ؟
و هل لو ده اللى حصل فعلا .. كدة هيبقى حلها ايه ؟ تغيير طقم صبابات ؟ ولا تغير وش سليندر كامل اضمن ؟
و يا ترى سعر طقم الصبابات ( 16 ) بتاع سينيك 1 ( تقريبا هى نفس مكنة الميجان 1 ) سعره كام ؟ و وش السليندر كامل سعره كام ؟ ( استيراد غالبا يعنى )
و ممكن الاقيهم فين ؟

و السؤال الاهم .. يا ترى ممكن الاقى حد يشتغل فى الكلام ده بشكل محترم فى المنصورة او طنطا ؟

معلش انا معلوماتى على قدى لسة .. و حاسس انى متدبس تدبيسة وحشة

**RagehYS** · 25-04-2016 01:00 AM

محدش عنده فكرة خالص ؟ :(

**ahmed_eng2001** · 25-04-2016 07:41 PM

اصبر .... و حنلاقى الى يجاوبنا ان شاء الله

**RagehYS** · 29-04-2016 03:41 AM

الحمد لله روحت لميكانيكى اسمه رائد فى بلقاس .. تقريبا هو الوحيد اللى شغال رينو عن فهم فى الدقهلية و الغربية .. كان شغال فى التوكيل سنين .. و انسان محترم جدا الحقيقة ..

فك الوش و طلعت فعلا الصبابات اتعوجت ..
غيرنا طقم صبابات و سير و طنبورة الكرنك و جوان وش سليندر و سير الكاتينة بالمرة ..

الكوميدى بقى انى روحت استلمها النهاردة .. العيب الاولانى خاااالص رجع تانى و سيبتهاله عشان يشوف ده ايه من اول و جديد هههههههه

قدر الله و ما شاء فعل :(

**ahmed_eng2001** · 29-04-2016 08:27 AM

ربنا يوفقك

**Colin Chapman** · 30-04-2016 08:20 PM

http://www.nilemotors.net/Nile/48089...post3876036634

**essam10** · 09-05-2016 05:18 PM

وايه اخبار العربيه دلوقتى يانجم

**alyamer** · 17-05-2016 04:19 PM

السلام عليكم استاذ RagehYS
بعد اللى قراته من الافضل تغيير الماتور باخر استيراد
السينيك 2000حاجتها متوفرة فى الحرفيين وهى نفس حاجات الميجان 2000 تقريبا
اهم حاجة اللى يشتغل فى العربية يكون عارفها واشتغل فيها قبل كدة
للاسف معرفش حد خارج القاهرة
وعموما السينيك 1 عربيه حلوه تستاهل يصرف عليها