الموضوع: زيت فتيس نيسان صنى 2014 الشكل القديم

قبل اى شيئ

شوف كتالوج العربيه .. الزيت المطلوب مواصفته ايه ؟؟ .. و بيتغير كل كام كم .. و هل يلزم تغيير الفلتر ام لا ؟ .. و حط البيانات دى هنا

لو الكتالوج موش معاك .. شوفه فى قسم الكتالوجات فى المنتدى .. او على النت

اسأل صاحب العربيه القديم .. امتى غير زيت الفتيس ؟؟ .. و استعمل زيت ايه لو كان غيره قبل كده ( مهم ) ؟؟

انتظر منى رد وافى على جميع اسئلتك النهارده ان شاء الله

المواصفات المطلوبه لجميع سوائل السياره

- دى صور من الكتالوج وضعها احد اعضاء المنتدى لعربيته ( نيسان 2013 الشكل القديم )

دى مواصفات جميع سوائل و زيوت السياره




و ده جدول لزوجات الزيت المسموح بها للسياره ( الاختيار بيتم حسب درجه حراره المنطقه الجغرافيه فى العالم )

مواصفه زيت الفتيس

- زيت فتيس نيسان الاصلى ( ده انت موش حتعرف اى نوع منه هو اللى مناسب عربيتك ) .. فى الحاله دى لو عايز تغير بالزيت الاصلى يبقى حتروح التوكيل و هم عارفين ايه المناسب لعربيتك

و الفرق المفروض يكون بسيط سواء فى السعر او المصنعيه ( على ما اظن )

- يمكن استعمال الزيت المكافئ .. و هو حسب الكتالوج ATF ديكسرون 3 .. و ده هو زيت موبيل ATF 320 .. انا افضل انك تحط زيت نيسان عن اى زيت تانى لانه مصمم لفتيسك بالظبط

- لو رحت التوكيل و لقيتهم بيستعملوا زيت موبيل ATF 320 .. يبقى غير بره اوفر لك

- غيار زيت الفتيس كل 40 الف كيلو .. و اعتقد الكميه بتكون 4 لتر ( موش متذكر بالظبط )

- نصيحه هامه جدا جدا .. سيبك بقى من اللى يقول انا غيرت ليكوى مولى او فالفولين او غيره .. لان الفتيس الزيت اللى بيتحط جواه صعب يطلع ثانى من جوه الفالف بودى او الكونفرتر .. يعنى ال 4 لتر اللى انت بتغيرهم دول بيمثلوا نصف زيت الفتيس مثلا و بالباقى بيفضل جوه

انت الفتيس عندك لسه جديد .. و متستعملشى الانواع دى

فلتر الفتيس

- المفروض فيها فلتر

-الفلتر ما اعتقدشى انه بيتغير كل 40 الف .. انا مستبعد ده بنسبه كبيره جدا .. و الاقتباسات حتبين لك انه كان نظيف و فى اعضاء بتقول ما بيتغيرش

- ده اقتباس من موضوع عن تغيير زيت و فلتر فتيس نيسان صنى 2007 ( المفروض انه نفس موتور عربيتك ؟؟ .. لان عندك الشكل القديم )
رابط الموضوع
http://www.nilemotors.net/Nile/328114-2007.html

المشاركة الأصلية كتبت بواسطة highspeed

السلام عليكم ورحمة الله

حبيت انقلكم تجربتي في تغيير زيت الفتيس للعربية نيسان صني 2007
أولا : المشكلة:
العربية كانت مكتومة وبدأت احس بالنقلات وده غير معتاد في النيسان
وكانت في الكيكات صوت الموتور يعلى والعربية مبتسحبش كويس.
سألت الميكانيكي قاللي غيرت زيت الفتيس امتى ؟ قولتلو معاد غياره عدى ( العربية مستعملة وصاحبها كان موصيني اغير زيت الفتيس)
المهم الراجل قاللي نكشف على الفلتر وممكن نغيره بالمرة...

ثانيا: الزيوت المرشحة:
كنت عايز احط ليكولي مولي بسبب ترشيحات الاعضاااء
روحت لاقرب موزع ليا في فصل ولقيت معندوش غير 3 لتر فقط وقاللي ان في مشكلة في الاستيراد والله اعلم....
جبت نمر الموزعين وفي الاخر لم اوفق في الحصول عليه...
حطيت زيت موبيل 320 .. سعر اللتر 50 جنيه وهيا أخدت تقريبا 4 لتر وشوية....

ثالثا : مرحلة التغيير:

دي صورة الفتيس من تحت فكينا الطبة علشان نفضي الزيت
ودي الكارتيرة اللي تحتيها الفلتر هتتفك برده


ده الفتيس بعد مفكينا الكارتيرة
والجزء الاسود ده فلتر الزيت بتاع الفتيس....ودي صورته بعد ما اتفك


لما فكينا الفلتر لقيناه كويس مش محتاج يتغير والزيت كمان كان نازل نضيف نضفنا الفلتر بالبنزين وكمبريسور الهوا وركبناه تاني ( تمنه 320 جنيه عند السرساوي بالدقي)
الموضوع اخد تقريبا ساعه ونص ... الفك والتركيب نص ساعه والباقس علشان السليكون ينشف قيل منحط الزيت.....

رابعا:النتيجة:
العربية ما شاء الله رجعت زي ماكانت:
1- هدوء في صوت الموتور
2- نعومة في النقلات
3- سحب ممتاز وتسارع احسن في الكيكات
4- اجمالي التكلفة: 250 جنيه زيت -30 جنيه مصنعية

أخيرا: حبيت انقلكم تجربتي لو اقدر افيد حد بيها....
تحياتي لصقور نيسان...
د/ احمد ابوالليل

بخصوص تغيير الفلتر

اقرأ الاقتباسات دى من ردود الاعضاء

-الفلتر ما اعتقدشى انه بيتغير كل 40 الف .. انا مستبعد ده بنسبه كبيره جدا .. و الاقتباسات حتبين لك انه كان نظيف و فى اعضاء بتقول ما بيتغيرش

- عموما عن نفسى لو انا حاغير فلتر موش حيكون الا بعد 100 الف و يكون كمان كتالوج العربيه بيطلب تغيير الفلتر و حاطط مده فى الكتالوج .. غير كده يبقى موش مطلوب تغيره .. ممكن تنظيفه .. ابحث عن كتالوج العربيه كما اوضحت لك و شوف هو عايز ايه

الخلاصه .. هم فكوا و لقوا الفلتر نظيف و هو اصلا صاج .. يبقى الافضل ما تفكش الكرتيره اصلا .. نزل الزيت من الطبه و غير جديد بس .. ده رأيى الشخصى

المشاركة الأصلية كتبت بواسطة elnady_1987

بس الى انا اعرفه ان الفلتر مبيتغيرش بس عموما قلنا جبته بكام ويا ريت تحافظ على القديم احتياطى وانا لما فكيت الفتيس عندى لقيت ان الفلتر دا عبارة عن مصفاه شبك والراجل غسلها بالبنزين والهواء وبس

المشاركة الأصلية كتبت بواسطة highspeed

هوا بيتغير وتمنه 320 جنيه عند السرساوي في الدقي... بس انا لقيته نضيف فعملت زي حضرتك نضفته وركبته تاني.....
شكرا على الرد يا باشا.....

مواصفه زيت الموتور

- حط صور صفحه الزيوت فى الكتالوج .. و كمان جدول اللزوجات و ضعهم مع السؤال

- حط سؤالك فى الموضوع ده .. و استشارى الزيوت فى المنتدى حيدلك على الزيت المناسب

رابط الموضوع
القواعد الذهبية لاختيار زيت العربية.... موسوعة مبسطة لأساسيات زيوت المحركات

موضوع هام جدا يقرأ بالكامل

- ده موضوع ( لابد تقرأه بالكامل ) حتلاقى فيه ردود استشارى الزيوت فى المنتدى

رابط الموضوع
http://www.nilemotors.net/Nile/486600-a-2.html

- الموضوع ده فيه مناقشات فنيه كتير خارج الموضوع .. و علشان ما يحصلش لخبطه ليك .. اتبع المعلومات الاتيه

1- لو انت موش عايز زيت التوكيل و عايز الزيت البديل .. يبقى تحط موبيل ATF 320 .. الزيت ده نوعيته هى ديكسرون 3G .. ( فيه نوعيات تانيه نوعيتها ديكسرون 3H .. دى لها استخدامات خاصه موش لسيارات الركوب الملاكى .. لا تستعملها )

2- زيت الباور عندك هو نفس زيت الفتيس

3- زيت الفرامل عندك مواصفته Dot 3 .. ما تستعملشى Dot 4

بالتوفيق

شوف الكتالوج ده هو لعربيتك ام لا .. المفروض سنترا 2005 هى الصنى .. بس اتأكد
2005 Nissan Sentra Owners Manual - Dealer E-Process

رابط كتالوج تانى
2005 Nissan Sentra Owner's Manual - JustGiveMeTheDamnManual.com

و الف مبروك العربيه .. ان شاء الله تريحك

المشاركة الأصلية كتبت بواسطة the9ranger

طيب فى بس حاجه صغيره لمبه الايرباج بتنور ثوانى وتطفى لما بدور العربيه ده كده شغال ولا لا ولو شغال انا عايز افصلو ازاى

- انتظر رد من حد معاه عربيه صنى زى بتاعتك

- المفروض كده شغال .. طبيعى فى اى عربيه لمبات كتير بتنور مع الكونتاكت .. و بعدين تطفى مع الدواره او بعد مل تفتح الكونتاكت شويه بدون دواره .. ده الطبيعى

مثال ..مثلا علشان الكمبيوتر بتبين لك انه حاسس ب ال abs ( اللمبه تنور ) .. ثم بيقول لك انه شغال كويس بعد ما يختبره ( اللمبه تطفى ) .. و نفس الامر لبقيه اللمبات

- غريبه اوى .. عايز تفصل الايرباج ليه ؟؟ .. طبعا غلط جدا
بلاش لانه مكلف جدا .. و ما اعرفشى انت لو لعبت فى الايرباج ايه اللى ممكن يحصل .. و بيكون لاى ايرباج كنترول خاص بيه