مين افضل الافيو ام البونتو والسعر متقارب

**Einstein_EG** · 29-11-2008 09:17 PM

لو عاوز بونتو و خلاص قررت ، ادينى خبر انا و 3 من اصحابى هنجيب 4 عربيات مره واحده و بكده المفروض ناخد تخفيض جامد ، معتقدش هناخدها باكتر من 70 مع المثلث و العدة الكامله مش اللى مع الاستبن و معاهم غطا العربية و 4 دواسات و الهدية المعروفة (CD Radio ) الاصلى بتاعها ، و احنا متفقين هنجيبها مع بعض فى شهر مارس علشان نشوف اذا كانت العربيات هترخص ولا لأ و نشوف العربية عامله اية فى السوق و لو فى حاجة تانية داخله المنافسه. لو تحب تشترى معانا ادينى خبر

**Dr.A.Nabil** · 29-11-2008 09:42 PM

بونتو

اسأل مجرب

............................
بقالها معايا داخله ع 6 سنين
ما اشتكتش منها خالص...

واخويا معاه بونتو 2008

توكل ع الله

الافيو بس تفرق معاك لو انت غاوي شد وسحب وسرعات عاليه...

**Einstein_EG** · 29-11-2008 09:47 PM

مستر احمد نبيل تسلم ايدك ، مادام بقى عندك ، خلينا نستغلك شوية :) ، اية اخبار التكييف و الضمان معاك ؟؟؟ ، و عزل الصوت اخبارة اية ؟
بس الشكر ليك واجب ربنا يعينا و نرد الجمايل يا باشا

**amir11** · 29-11-2008 10:36 PM

انا والله مندهش انتم اسرة واهل بجد مش عارف أشكركم ازاي جزاكم الله كل خير وفعلا معلومات قيمة انا بقيت مقنع بالفيات بونتو

**Einstein_EG** · 29-11-2008 10:52 PM

بالتوفيق يا صديقى

**Dr.A.Nabil** · 30-11-2008 07:41 PM

اينشتاين:

-التكييف في الجو الحار جدا يكون مش وحش.. بس بياخد وقت طويل..
في الليل تلاجه... باشغله على 1 اة 2 فقط
-الضمان .. دخلت التوكيل مره واحده وندمت,,, وحاليا باتعامل مع اي ميكانيكي تاني بره لأن العربيه موتورها بسيط ومافيهوش اي تعقيد وبتتصلح في اي حته
-العزل: كويس جدا

**Einstein_EG** · 30-11-2008 07:51 PM

حلو اوى الكلام دا يا دكتور :k18:، و انا فعلاً سألت مهندس فى الصيانة بتاعتهم و قالى (بشكل غير مباشر) على موضوع بساطة الموتور لما سألته ليه 60 حصان بس مع انها 1300 سى سى ، بس ربنا يخليك طمنتنى ، انا كدة اشترى و انا مطمأن و ربنا يباركلنا فى عم حسنى الميكانيكى دا احنا بنشتغل معاه من 10 سنين هوا بقى يظبطنا .
و الف شكر تانى يا دكتور . :k10:

**mmust** · 01-12-2008 11:12 PM

كويس جدا المقارنة دى لن انا كنت محتار فيها انا كمان بس كده ان شاء الله اشتريها و الأستاذ اللى عاوز يشتريها فى مارس انا معاه لو ناوى يشتريها

**Einstein_EG** · 02-12-2008 01:29 AM

المشاركة الأصلية كتبت بواسطة mmust

كويس جدا المقارنة دى لن انا كنت محتار فيها انا كمان بس كده ان شاء الله اشتريها و الأستاذ اللى عاوز يشتريها فى مارس انا معاه لو ناوى يشتريها

تمام يا فندم انا موجود و لما تبقى جاهز نظبط قبلها بشهر على اساس اننا ممكن نجيبها من التوكيل على طول زى اى معرض او Dealer و طبعاً لازم نقله قبلها على الاقل بشهر و ندفع المقدم .

**فادى** · 02-12-2008 01:25 PM

المشاركة الأصلية كتبت بواسطة Einstein_EG

حلو اوى الكلام دا يا دكتور :k18:، و انا فعلاً سألت مهندس فى الصيانة بتاعتهم و قالى (بشكل غير مباشر) على موضوع بساطة الموتور لما سألته ليه 60 حصان بس مع انها 1300 سى سى ، بس ربنا يخليك طمنتنى ، انا كدة اشترى و انا مطمأن و ربنا يباركلنا فى عم حسنى الميكانيكى دا احنا بنشتغل معاه من 10 سنين هوا بقى يظبطنا .
و الف شكر تانى يا دكتور . :k10:

عدد الاحصنة لا يتناسب طرديا مع تكنولوجيا المحرك, ده اعتقاد خاطىء, موتور البونتو مصمم ليقدم اداء جيد داخل المدينة و يعيش طويلا و يستهلك القليل من الوقود, و هذه الأهداف التصميمية التى فرضتها طبيعة السيارة المدنية هى التى ادت الى انخفاض عدد الاحصنة المتولدة, بالعكس اذا صممت السيارة للطرق السريعة حيث تزيد عدد الأحصنة, و الموضوع ملوش دعوة ببساطة الصيانة من عدمه.