الموضوع: معايا 150 الف اجيب زيرو ولا مستعمل ؟

المشاركة الأصلية كتبت بواسطة m-sabry

اشتري زيرو.. ونصيحة لوجه الله انا بعد شهرين مقارنات مفصلة بين الصني واللوجان (أعلى فئة بالنافيجيتور) والتيجو ومؤخراً الاوبترا أحب أقولك هات شيفروليه أوبترا الجديدة (التجميع المصري مش المستوردة من الصين).. احجزها من التوكيل أفضل.. سعرها الحالي 140 إستلام خلال 45 يوم (والحقيقة خلال اسبوعين تلاتة) وهتكون موديل 2017.. ممكن تزود 5 آلاف وتستلمها فوري من اي موزع لكن هتكون موديل2016
العربية دي غلبت الكل.. انا اعرف اللي اشترى الصني والستيب واي (اللي هي نسخة من اللوجان) وبيندموا ومنهم اللي بيدور يبيعها بعد شراءها باسبوعين !!!
قريب جداً ان شاء الله هعمل موضوع عن المقارنة بين العربيات دي واقولك أسباب تفوق الاوبترا.. بس باختصار هتلاقي فيها كل ما تتخيله من مواصفات وكماليات وبأفضل سعر وجودة عالية لم أكن انا شخصياً أتوقعها...
أقولك أحسن.. روح الشيخ زايد على المحور من بره بعد هايبر وان على طول هتلاقي توكيل نيسان ورينو وشيفروليه.. ادخلهم واحد واحد واركب الصني واللوجان وخلي الأوبترا للآخر علشان هتنبهر !! مش هتصدق نفسك... هتحس بفخامة وجودة واوبشنز عالية جداً .. انا بعد ما كنت هجيب اللوجان خلاص لما شفت الاوبترا وركبت الاتنين ورا بعض زي ما بقولك حسيت ان مفيش وجه للمقارنة.. حسيت ان اللوجان (اللي كنت شايفها عربية تحفة وفاكر انها فخمة) لما ركبت الاوبترا بعدها بنص دقيقة حسيت ان اللوجان جنبها عاملة زي اللانوس !!!!
انا نفسي انبهرت ومكنتش مصدق الفخامة والاوبشنز العالية.. فتحة سقف الكترونية وفتيس 6 سرعات وزجاج فاميه... تحس انك راكب نسخة من الكروز... وب 140 ألف بس.. بس خلي بالك ان سعرها غلي من 8 ايام بعد ما كان 137.. بسبب زيادة الطلب عليها..
وزي ما اللوجان ملت الشوارع الفترة اللي فاتت هتشوف الايام الجاية الاوبترا هتعمل ايه... بدأت فعلاً تغرق الشوارع..
صدقني انا قبل ما اشوفها قلت لنفسي اكيد مش هجيبها دي صيني بس بعد ما شفتها وقعدت في اللوجان قبلها وبعدين قعدت فيها (توكيل رينو وشيفروليه لازقين في بعض في الشيخ زايد) قلت لنفسي انا هجيب العربية دي حتى لو كانت مش شيفروليه (حتى لو كانت ماركة صيني صيني ماركة جاكي شان او بينج بونج مثلاً).. بس يارب ألحق قبل ما سعرها يغلى تاني..
وبصفة عامة إحلق بسرعة لأن الأسعار هتلغلى قبل نهاية رمضان..كل السيارات.. وده خبر اكيد بنسبة 99% أما اللي اأكيد بنسبة 100% والله اعلم هو انها هتزيد برضو بس مع بداية شهر يوليو 2016 (علشان بداية العام المالي الجديد والموزانة الجديدة اللي هيزيد معاها كل حاجة.. مرتبات الحكومة الغلابة ومرتبات الفئات الممزية في البلد البهوات يعني.. وبداية تطبيق زيادات الجمارك والضرائب إلخ).. يعني كده كده متوقع الاسعار تزيد خلال أيام..

متشكر جدا على ردك حضرتك فى مقارنات و توضيحات كتيير و انا فعلا كنت بفكر فى الاوبترا بس مكنتش عارف الفرق بين المصرى و المستوردة بس انت قولت المفيد وانا ان شاء الله هنزل التوكيل اتفرج عليها و ربنا يقدم اللى فيه الخير ان شاء الله