الموضوع: 21افضل زيت لادا 2107

الزيت التقيل المقصود درجة لزوجته sae 50.. وده زيت أحادي الدرجة..

مشكلة الزيت ده إن تزييته في بداية تشغيل الموتور بطيء جدا.. والموتور هيشتغل بتاع دقيقة تقريبا من غير زيت لحد ما الزيت يوصل لكل أجزاء الموتور..

بالطريقة دي انت مش بتحمي الموتور.. انت بتقضي عليه.. وبدل ما الشنابر بس هي اللي تبوظ.. كده كل الموتور هيبوظ علشان اشتغل من غير زيت لمدة دقيقة كل يوم...

الزيت ده ينفعك بس لو عربيتك شغالة ما بتبطلش طول اليوم (تاكسي/ميكرباص شغال ورادي)..

إنما نظام الملاكي ما ينفعش معاه الزيت ده خالص..

اعمل نص عمرة بدل ما تضيع فلوسك في حاجة تبوظلك الدنيا أكتر.


...

المشاركة الأصلية كتبت بواسطة سعد حسن الديب

استاذنا العزيز ممكن شرح مبسط لو سمحت ويعنى ايه احادىاللزوجة وللدرجة دى الزيت مضر للعربية وايه افضل زيت تنصح بيه

الموضوع ده طويل وكبير .. وهحاول أبسطه على قد ما هقدر..

بص يا سيدي...

الزيت العادي (أي زيت.. حتى زيت الأكل) لزوجته بتتغير حسب درجة الحرارة... بيكون تخين ولزج في الجو البارد.. وكل ما الحرارة عليت الزيت بيسيل ويخف.

زيت الموتور ده فيه منه درجات لزوجة.. يعني زيت خفيف.. وزيت وسط وزيت تقيل... وكل واحد له درجة حرارة بيشتغل فيها أحسن ما يمكن.

مشكلة الزيت ده إنك لما تحطه في درجة الحرارة العادية بيبقى لزج جدا وبياخد وقت على مالزيت يوصل للأجزاء المختلفة للموتور.. والموتور يشتغل شوية كإن مفيهوش زيت... الوقت ده هو أول ما تشغل العربية وهي باردة الصبح.. وده فعليا أخطر وقت بيحصل فيه تآكل للموتور...

حل المشكلة دي إنك تحط زيت خفيف يخلي الوقت اللي بيشتغل فيه الموتور من غير تزييت أقل ما يمكن.


بس فيه مشكلة تانية .. إن الزيت الخفيف ده هيخف خالص ويبقى مية لما الموتور يسخن (الموتور بيشتغل على درجة حرارة 100 تقريبا).. وفي الحالة دي الموتور هيتآكل وعمره يبقى قصير.

وحل المشكلة دي إنك تحط زيت تقيل يحمي الموتور من التآكل..

علشان كده.. زمان كانوا بيقولوا إنك في الشتا تحط زيت خفيف وفي الصيف تحط زيت تقيل...


كل اللي فات ده كنا بنتكلم على الزيت أحادي اللزوجة.


من حوالي 70 سنة.. اخترعوا زيت خفيف وتقيل في نفس الوقت.. وسموه زيت متعدد اللزوجة.. وميزته إنه بيبقى خفيف في الحرارة القليلة وتقيل في الحرارة العالية.

وكده تاخد ميزة الزيت الخفيف والتقيل مع بعض.. وما تشغلش بالك بالتغيير بين الصيف والشتا..

ده غير إن الزيوت دي هي اللي بقت ماشية في السوق وبتطور باستمرار.. وبيتحط عليها إضافات لتحسين الأداء وكل الحاجات اللي بنسمع عنها دي.

الموضوع ده فيه تفاصيل أكتر... وفي المشاركة الأولى والمشاركة التانية..

http://www.nilemotors.net/Nile/481878-a.html


أما بالنسبة لأفضل زيت.. فهو دايما زي ما قلنا قبل كده .. الزيت المكتوب في الكتالوج..

ومواصفات الزيت في كتالوج اللادا كالتالي:

زيت معتمد من الـAPI بدرجة SE أو SF على الأقل..
واللزوجة: 5W-30 أو 10W-30 (للأجواء الباردة جدا فقط)
أو 10W-40 أو 15W-40 للأجواء العادية
الكمية : 3.75 لتر
موعد التغيير: كل 10 آلاف كيلومتر (5000 في الحالات الشاقة) أو 6 أشهر.. أيهما أقرب


بالنسبة لحالتك... فأحسن حل هو عمل نص عمرة... وعلى بال ما تعملها استخدم أرخص زيت 15W-40 أو 20W-50 من بتاع التعاون أو مصر للبترول.

الزيت التقيل وزيت الشنبر والكلام ده كله مسكنات ضررها أكتر من نفعها.


...