الموضوع: الزيت المناسب لفيرنا 2012

وليه للأسف؟؟؟

الراجل كان بيحط الزيت زي ما الكتالوج بيقول له..


دي صورة توصيات الزيت في كتالوج الفيرنا..



لو عندك الكتالوج اتأكد بنفسك.

وخلي بالك ... مواصفات الزيت ما هياش مجرد درجة اللزوجة المكتوبة ... إنما فيه حاجة تانية أهم وهي اللي فعلا بتحافظ على الموتور.. اسمها مستوى الجودة..

وعلى حسب المكتوب في الكتالوج.. مواصفات الزيت المطلوب (واللي ينفع في جو مصر) كالتالي:

اللزوجة:
20W-50 أو 20W-40
15W-50 أو 15W-40
10W-50 أو 10W-40

مستوى الجودة
API SG على الأقل... وده يعتبر مستوى منخفض شوية.. وتقدر تحط زيوت بمستوى أعلى وهتكون أفضل للموتور..

أي زيت بمستوى SH أو SJ أو SL أو SM أو SN هيكون أفضل... وأفضلهم طبعا هو SN.

لو عايز تعرف أكتر عن معنى الكلام ده.. أنصحك تدخل على الموضوع ده..
http://www.nilemotors.net/Nile/341680-a.html

عموما.. اختيار اللزوجة بيعتمد على حسب أسلوب استخدامك للعربية.. مش على حسب العربية ماشية كام.

قول لنا طبيعة سواقتك إيه:

بتسوق بالهداوة ولا بتحب الشد والقرص.
أغلب الطرق اللي بتسوق عليها زحمة ولا مفتوحة
معدل مشيك بالعربية كام كيلومتر في السنة... ومشاويرك المعتادة طولها قد إيه تقريبا؟
كام فرد بيقعدوا في العربية أغلب الأوقات؟

كل الحاجات دي هتفرق.


...

المشاركة الأصلية كتبت بواسطة amrmovie

الف شكر على اهتمامك

1- انا بسوق بالهداوه و اخرى فى rbm 3
2- معظم مشاويرى محور 6 اكتوبر
3- انا بستخدم العربيه قليل جداااااااا يعنى مثلا فى السنه الاخيره عملت 4500 كيلو بس
4- اللى بيركب العربيه انا و زوجتى و طفلين صغيرين

انا بس مش عايز ارمى فلوس على الارض و اجيب زيت موبيل 1 تخليقى ب 330 جنيه خصوصا ان الشيل الاصفر المعدنى ب 130 جنيه بس

طب سؤال تانى . هل اغير الزيت عند كيلوهات معينه ولا بعد فتره زمنيه معينه ؟ بمعنى تانى لو انا مثلا قعدت سنه و نص و العربيه عملت 6000 كيلو بس و انا حاطط زيت 10000 كيلو هل اغيره و لا استنى لما اعمل مثلا 9000 كيلو مهما طال الوقت ؟

ممتاز... كده الصورة وضحت خالص

اللزوجة اللي حضرتك محتاجها المفروض ما تكونش عالية... خصوصا إن الموتور بيفضل مدة طويلة واقف والزيت راقد في الكارتير وكمان استخدام حضرتك بسيط نسبيا بدون أحمال.

فهنا الأفضل نروح على لزوجة 10W-40... والموجود في السوق وكويس (مستوى جودته عالي) هو كاسترول مجناتك



مستوى جودته API SN.... أعتقد سعره في حدود 220-250 جنيه تقريبا.

سامحني لإني مقيم بره مصر ومعرفش الأسعار عاملة إيه دلوقتي مع الغلو المتزايد اللي بسمع عليه.. ربنا يكون في عون الجميع..


وعلشان كده .. ممكن نفكر في حل اقتصادي.. وأنا شايف إن شل الأصفر بلزوجة 15W-50 حل ممتاز.



مستوى جودته API SL (أقل من كاسترول.. بس أعلى من طلبات الكتالوج)
صحيح مش هيديلك توفير بنزين زي الـ10W-40 (فرق التوفير بسيط جدا)... بس العربية أصلا مش بتمشي كتير وبالتالي مسألة استهلاك البنزين ما هياش مشكلة.


فيه حل معقول جدا بردو.... زيت التعاون SM بلزوجة 20W-50 .. (واسأل بردو على لزوجة 15W-40 عندهم)



لزوجته أعلى شوية... بس ميزته في حاجتين..
مستوى جودته API SM (أعلى من شل الأصفر).. وسعره المفروض يكون أرخص (مش متأكد بس يا ريت تسأل على السعر)...ولو سعره زي الشل يبقى هو أفضل.

بس مشكلته الأساسية في إنك تجيبه من مكان مضمون.. علشان الغش.


عموما... الفيرنا ميزتها إنها عربية اقتصادية في المقام الأول... والعربية الاقتصادية مش بتطلب منك طلبات خزعبلية علشان تمشيها زي العربيات الألماني مثلا..
بمعنى إن العربية الاقتصادية ممكن أي زيت اقتصادي موجود في السوق ممكن يمشيها بمنتهى السلاسة.


بالنسبة لمعدل التغيير..

المسافة اللي حضرتك بتمشيها قليلة جدا... وفي الحالات دي الزيت دايما بيتغير بالوقت... مش بالمسافة..

بشكل عام.. كل الزيوت الموجودة في مصر (معدني وتخليقي) بتتغير كل 6 شهور .. ما عدا بعض الأنواع التخليقية القليلة جدا بتقعد سنة.

والزيوت التخليقية اللي بتقعد سنة دي بتبقى غالية جدا (الغيار الواحد بيكلف حوالي 500-550 جنيه).


فأنا شايف إن استخدام الزيوت المعدنية مناسب جدا لحالة حضرتك... وكل اللي المفروض يتعمل إنك تغير الزيت كل 6 شهور... فقط لا غير..


عموما.. أنصحك تعدي على الموضوع ده لو عايز تعرف أكتر عن زيوت المحركات بشكل مبسط نسبيا.
http://www.nilemotors.net/Nile/341680-a.html


...

المشاركة الأصلية كتبت بواسطة amrmovie

الف الف شكر على حسن ردك الشافى الوافى

اخر سؤالين خلاص

1- هل الزيوت اللى حضرتك كاتبها صناعيه ولا تخليقيه و هل فيه زيها من شركة موبيل ؟

2- هل نفس النصيحه تنطبق على شيفروليه افيو 2017 زيرو لانى ناوى اغير ان شاء الله

كل الزيوت اللي في البوست معدنية... وأي زيت تخليقي كويس سعره فوق الـ300 جنيه.... والزيوت التخليقية المميزة سعرها فوق الـ500.

لو عايز تعرف الفرق بين الزيوت التخليقية والمعدنية.. ادخل على المشاركة التانية في نفس الموضوع اللي حطيتلك اللينك بتاعه.


عموما.. موبل عندها ماركتين...

واحدة اسمها "موبل".. ودي كلها زيوت معدنية...



والتانية اسمها "موبل1".. ودي كلها زيوت تخليقية...



موبل العادية مش موجود منها في السوق أنواع كتير.. ولو ناوي تجيب منه يبقى هات اللي اسمه Mobil Super 1000 بلزوجة 20W-50 بمستوى جودة API SL

يعني زي زيت "شل" الأصفر بس بلزوجة أعلى


عموما.. أنا دايما بأنصح بإنك لو هتيب زيت يبقى حاول دايما تجيب الزيت المتوفر قدامك بسهولة .. واثبت عليه.

التغيير المستمر ما لوش مميزات (حتى لو بتغير بزيت تاني له نفس الجودة واللزوجة)... إنما الثبات على الزيت الصح أفضل بكتير.



بالنسبة للأفيو...


خد القاعدة دي وحطها في دماغك كويس...

"كل عربية ليها مواصفات زيت محددة مكتوبة في كتالوجها.. وما ينفعش نغيرها ولا نحط حاجة من دماغنا... احنا ما نعرفش أحسن من اللي صنعها"

طبعا ده لو عايز تحافظ على عربيتك اللي دافع فيها الشيء الفلاني.


الأفيو طالبة في كتالوجها زيت بلزوجة 5W-30 أو 10W-30 فقط...

لزوجة الـ10W-30 مش موجودة في مصر للأسف.. ودي لو موجودة المفروض تبقى رخيصة لإن أغلبها زيوت معدنية.

لزوجة 5W-30 مفيش منها في مصر غير الزيوت التخليقية فقط... وبتطلب كمان مستوى جودة عالي.


ونصيحة من أخوك... بلاش الأفيو.. الفيرنا أحسن منها بكتير... خصوصا على مستوى الأداء والاعتمادية.


...