الموضوع: إستفسار عن فيتيس هوندا سيفيك 2005

السلام عليكم و رحمة الله
محتاج مساعدة فى الإجابة عن شوية أسئلة تخص عربية هوندا سيفيك 2005 الأوتوماتيك

1- العربية جابت فيتيس ( أو كوبلن ) بس الأرجح فيتيس , و طبعا هشترى فيتيس إستيراد
أنا ما أعرفش أى حد بيبيع فيتيس و مش عايز يتنصب عليا , فممكن حد يقول على ناس إتعامل معاهم قبل كده و يا ريت يكون بيراعوا ربنا فى شغلهم , لأن العربية إتصرف عليها الفترة إللى فاتت كتير جدا و خلاص الميزانية ما بقتش تستحمل

فإللى يقدر يرشح لى محل بيع فيتيس أوتوماتيك و يقول لى المفروض أخد بالى من إيه و السعر هيكون فى حدود كام , يبقى جزاه الله خيرا كثيرا

2- العربية دى ممكن تجيب كام ؟ حالتها كويسة جدا ( بإفتراض تصليح الفيتيس يعنى ) , غيرت لها دورة مياة كاملة ( رادياتير , طلمبة مية , خراطيم مية , مروحة , ثرموستات الكوعة ) , السيور كلها ( ببلية سير الكاتينة ) , جوان علبة الزيت , جوان غطا التاكيهات , بوجيهات و أويل سيل بوجيهات , فرن وش الشكمان
كل الحاجات دى من التوكيل , عدا مروحة الرادياتير و فرن الوش إستيراد , الرادياتير إماراتى مواصفات خليجى

ألف شكر مقدما و جزاكم الله خيرا
رمضان كريم

مؤمن

ممكن الأدمن مشكورا يعدل العنوان من "هوندت " إلى "هوندا"

مفيش اى حد عنده إفادة ؟

طيب سؤال تانى
دلوقتى خلاص إن شاء الله هركب فيتس إستيراد النهاردة

إزاى أفرق بين فيتس حالة كويسة و بين فيتس تعبان ؟

تسلم يا باشمهندس على الرد

و بالنسبة للى حصل فى العربية هكتبه لعله يفيد حد تانى
_______________

الحمد لله
إشتريت الفيتس من التوحيد ( محمد مشهور و عمرو مشهور ) , عمل 3000
و الحمد لله ركب و إشتغل , أخد يوم شغل , المصنعية 500 ج , 4 ك زيت فيتس هوندا الأصلى من عند مجدى الدسوقي عمل 480
الميكانيكى ( سمير من ورشة أحمد و سمير ) و عمرو مشهور قالوا لى بلاش تبيع العربية هخسر فيها ( العربية محتاجة شغل سمكرة و دهان كتير بس من بره بس ) و حالتها نوعا ما كويسة

بس الحمد لله و أنا خارج من الحرفيين تلتت
, و الحمد لله ظبطت , و موبينة التكييف باظت هى كمان
, بس الحمد لله صلحتها ( 300 موبينة و 200 مصنعية ) , بس بقى السير محتاج يتشد لأنه ما إتشدش كويس


الحمد لله

نصيحة : إدعى كتير و إنتا هناك و صلى إستخارة و أسأل على أد ما تقدر , الصناعية هناك شاطرين و التجار شاطرين و نوعا ما معظمنا مش متخصصين , فينفع يتضحك علينا بسهولة , إدعى إن ربنا يوقعك مع ناس تراعيه فيك

* مجدى الدسوقى طلع محل شيك فحت , أشيك من التوكيل نفسه , ما شاء الله يعنى , ربنا يوسع عليه و يفتح فى حتة قريبة بدل المرمطة بتاعت مشوار الحرفيين دى

هي العربية ماشيه معاك اد ايه.. احنا عندنا في العيله 5 عربيات الموديل ده وما شاء الله مفيش واحده فيهم حصل فيها حاجه من اللي انت قلت عليه ده. منهم واحده ماشيه 320 الف كم

235 ألف
المشكلة إللى حصلت فى الأساس كانت إن العربية بتسخن و لما بتهدى أود لها مية خضرا و بتمشى
بس جت مرتين سخنت جامد جدا , منهم مرة عدت النقطة الحمرا فى الأخر خالص
من بعدها و الدنيا ملخطبة , بس خلاص مشكلة السخونية إتحلت الحمد لله
بس بفكر إنى أدور على كبوت يكون فيه فتحة عشان تكون تهويته كويسة , لأنى بقيت موسوس من ناحية حرارة الموتور خلاص