الموضوع: محتار و مش عارف اشتري يه

المشاركة الأصلية كتبت بواسطة salam100100

اختيار عربيه فى الوقت الحالى من اصعب القرارات فى الشراء, وبصراحه مش العربيات بس دا كل حاجه حتى تروح مصييف مش عراف تروح :)

حضرتك عايز "تكون اوتوماتيك و ثباتها عالي و قطع غيارها متوفره و رخيصه و بها كماليات معقوله و قليلة الاعطال"
توافر كل الطلبات دى فى عربيه واحده صعب جدا انا اسف- ثبات عالى يعنى المانى فبالتالى هتضرب عندك فسعر العربيه الاساسى وقطع الغيار
قطع غيارها متوفره يعنى كورى فهتضرب عندك فالثبات
قليله الاعطال يعنى يبانى فهتضرب عندك فقطع الغيار

المهم انا قليل قوى لما سمعت عن اجماع على عربيه بعينها يمكن كمان عمرى مسمعت على اجماع على عربيه
لازم تسمع عن عيوب ان كانت فالتقفيل- اتزان- فرامل- فتيس- خامات- مراكز صيانه- اسعار قطع غيار- اعاده بيع- كماليات- امان- عفشه- ..................الخ

اتفق تماما مع الرأي ده.. بس بم ان مفيش فعلاً إجماع على عربية واحدة أحب اقولك رأيي الشخصي اللي قد يتفق معاه البعض ويختلف آخرون..

نصيحة لوجه الله انا بقالي شهرين بدور على عربية في حدود 150 الف تقريباً وبقارن وأدور وأسأل وزهقت الناس هنا في المنتدى وزهقت أصحابي وجيراني من كتر الأسئلة علشان اعرف الفرق التفصيلي بين النيسان صني (أعلى فئة) والرينو لوجان (أعلى فئة بالنافيجيتور) والشيري تيجو وشيفروليه اوبترا الجديدة وأحب أقولك انا رأيي تجيب شيفروليه أوبترا الجديدة (التجميع المصري مش المستوردة من الصين).. احجزها من التوكيل أفضل.. سعرها الحالي 140 إستلام خلال 45 يوم (والحقيقة خلال اسبوعين تلاتة ان شاء الله) وهتكون موديل 2017.. ممكن تزود 5 آلاف وتستلمها فوري من اي موزع لكن هتكون موديل2016 ..

العربية دي غلبت الكل من وجهة نظري وعندي أسبابي.. انا اعرف اللي اشترى الصني والستيب واي (اللي هي نسخة من اللوجان) وبيندموا ومنهم اللي بيدور يبيعها بعد شراءها باسبوعين !!! فيه طبعاً ناس مبسوطين منهم وبيشكروا كمان لكن إقرأ المقارنة دي اللي تعتبر خلاصة مجهود شهرين مني ويارب تفيدك وربنا يوفقك لأفضل اختيار حتى لو كان حاجة تانية..

مقارنة بين النيسان صني (أعلى فئة) ورينو لوجان (أعلى فئة بالنافيجيتو) وشيفروليه اوبترا الجديدة (اللي بدأ تجميعا في مصر في ابرلي 2016 تقريبا)

بالنسبة للصني أعلى فئة:

مزاياها:
سمارت كي (مفتاح ذكي)
- طي المرايات الجانبية كهربائيا (بس دي ميزة وعيب لان لو سايس قفلهالك بإيده هيكسرها او يبوظها وتبقى مصيبة)
- صالون واسع جداً (بس باقي العربيات مش ضيقة.. مش فارقة كتير يعني)
- فتحة تكييف للكنبة الخلفية بمروحة سرعتين (بس تكييف الصني اساسا ضعيف)
- زجاج فاميه خلفي (بس موجود برضو في الاوبترا)
- مسند يد بالكنبة الخلفية: الكرسي الاوسط يمكن طيه ليتحول لمسند يد به حامل لكوبين من المشروبات (بس ده موجود في الاوبترا ومش موجود في اللوجان)


عيوبها:
- صاجها ورق (كل العربيات صاجها ضعيف صحيح بس الصني أضعفهم على الاطلاق... سمك الصاج حاجة تقرف)
- صحيح بيقولوا ان مشكلة الطنابير والفرامل بتاعة 2015 اتحلت بس بسمع ان فيه ناس تانية ظهرت عندهم والله اعلم
- أسوأ توكيل في العالم من وجهة نظري.. (كل التوكيلات ممكن تستهبل في تصليح عيب صناعة لشخص معين .. عربية او اتنين او عشرة مثلاً لكن توكيل نيسان كان بيستهبل في أسطول كامل من العربيات اللي كان فيها مشكلة الفرامل وكانوا بيتهربوا من المسئولية ومش عاوزين يعترفوا بالمشكلة).. حتى نيسان قشقاي الجديدة فيها مشكلة في الفتيس ومش سائلين في العملاء .. من الآخر اكتر توكيل عليه أحكام وسوابق وقضايا في المحاكم وحماية المستلهك.. واكتر توكيل معموله جروبات للمتضريين منه للمطالبة بحقهم..
شكلها لسه وحش من ورا (حسنوا شكلها من ادام بس لسه وحش من ورا..تحسها واخدة شالوت) بس دي طبعاً أزواق

بالنسبة للوجان:
مزاياها:
- موتورها 1600 (الاوبترا والصني موتورهم 1500.. بس قوة موتورهم والعزم تقريبا هو هو.. فرق بسيط اوي .. بالعكس المواتير ال 1500 يمكن توفر شوية في البنزين)
- فيها مثبت ومحدد سرعة (وده هيريحيك اوي في السفر.. اما لو مكنتش بتسافر كتير مش هيفرق معاك.. خصوصاً انه بيفصل اول ما تدوس على الفرامل او البنزين.. وهتحتاج تشغله تاني ساعتها).. باختصار يعني مش مهم اوي في القيادة داخل المدن.. ده حتى الدادائري بتاعنا مش هتقدر تشغله عليه
- أكبر شنطة 510 لتر (لكن الفرق مش كبير... الصني 490 والاوبترا 480.. يعني تقريبا زي بعض)
- جودة عالية (لكن هتتفاجيء لما تقارنها بالاوبترا.. إنبهارك بيها هيروح وهتلاقي الاوتبرا جنبها جوهرة بتلمع.. زي ما تقارن الدهب بالماس.. اللوجان حلوة بس الاوبترا تحفة)
فيها كاسيت بشاشة ونافيجيتور (دي اعلى فئة..بس اي عربية ممكن في المستقبل تركبلها كاسيت فيه نافيجيتور عادي يعني)
- عالية عن الارض (لكن ده يعتبر ميزة وعيب لأنها مش عربية كبيرة suv لا دي عربية صغيرة سيدان وارتفاعها هيقلل من ثباتها.. رغم ان اللي معاهم مش بيتشتكوا من ثباتها لكن بالعقل كده الارتفاع مبالغ فيه فعلاً وكان المقصود انها تبقى مناسبة لمصر وده فعلاً شيء كويس في السرعة البطيئة لكن فعلاً بيأثر على الثبات على السرعات العالية لأن حجم العربية صغير.. وفيه ناس بعد ما بتجيبها بتعدل العربية علشان توطيها شوية!! هتلاقي النت مليان مواضيع عن كده)

عيوبها:
- فتيسها 4 سرعات (صوته بيعلى على السرعات العالية لأن الفتيس جاب الرابع ومفيش غيارات تاني) اما الاوبترا ففتيسها 6 سرعات
- سحبها وحش لحد 60 كم/ساعة.. واعرف ناس بتحاول تبيعها علشان كده!!
- مفيهاش سمارت كي زي الصني (بس بصراحة تغور الصني بمشاكلها)
- مفيهاش زجاج فاميه (مش هتفرق مع البعض) لكن الاوبترا والصني فيهم زجاج فاميه خلفي
- مفيهاش فتحة سقف (الأوبترا فيها فتحة سقف وكمان التحكم فيها الكترونياً)
- مفيهاش مسند يد بالكنبة الخلفية

بالنسبة للاوبترا الجديدة (التقفيل المصري):
مزاياها:
- فئة واحدة هاي لاين فيها تقريبا معظم الاوبشنز اللي في أعلى فئة من كل العربيات المنافسة (مش عاملينها فئات لإستغلال المشتري ورفع السعر مقابل بعض الكماليات تحت اسم فئة اولى وتانية وتالتة.. إلخ)
- فخمة جداً من الداخل والخارج: شكل خارجي رائع وتقفيل وعزل ممتاز وفرش جلد وتابلوه فخم فعلاً (تحس إنك راكب نسخة من الكروز)
- فيها فتيس 6 سرعات (وده بيوفر بنزين ويخلي صوت الموتور منخفض حتى على السرعات العالية)
- موتورها صحيح 1500 بس قوته 110 حصان وعزمه شديد زيه زي مواتير ال 1600 (يعني هيوفر بنزين وكمان بنقس القوة)
- فيها فتحة سقف والتحكم فيها الكتروني كمان (والاوبشن ده تحفة بجد..بيحسسك بالفخامة)
- تكييفها أفضل من اللوجان والصني
- شنطتها كبيرة (تقريبا 480 لتر)
- مسند يد بالكنبة الخلفية: الكرسي الاوسط يمكن طيه ليتحول لمسند يد به حامل لكوبين من المشروبات (بس ده موجود في الصني ومش موجود في اللوجان)

عيوبها:
- البعض بيعتبر من عيوبها ان معظم مكوناتها مصنوعة في مصنع جينيرال موتورز بالصين وبعضها مصري وبعضها كوري.. وبتتجمع في مصر.. لكن أقسم بالله انا لما ركبتها حسيت بفرق شاسع في الفخامة بينها وبين اللوجان اللي تقفيلها مغربي.. والله قلت لنفسي هشتريها حتى لو كانت صيني صيني ماركة جاكي شان او بينج بونج :) .. أركب اللوجان واركب الاوبترا وانت تفهم انا اقصد ايه.. مش هتصدق فرق الفخامة والرفاهية.
- مفيهاش مثبت سرعة (بس ده برضو مش موجود في الصني.. ومش مهم غير في السفر.. واعرف ناس كتير عندهم ومش بيستخدموه اساسا)
باختصار هتلاقي فيها كل ما تتخيله من مواصفات وكماليات وبأفضل سعر وجودة عالية لم أكن انا شخصياً أتوقعها لحد ما شفتها بعيني..

بس أقولك فكرة أحسن وان شاء الله هتدعيلي لو عملت الفكرة دي؟؟ روح الشيخ زايد.. على المحور من بره.. بعد هايبر وان على طول.. هتلاقي توكيلات نيسان ورينو وشيفروليه.. التلاتة لازقين في بعض !!! .. ادخلهم واحد واحد واركب الصني واللوجان وخلي الأوبترا للآخر علشان هتنبهر !! مش هتصدق نفسك... هتحس بفخامة وجودة واوبشنز عالية جداً ..

انا بعد ما كنت هجيب اللوجان خلاص لما شفت الاوبترا وركبت الاتنين ورا بعض زي ما بقولك حسيت ان مفيش وجه للمقارنة.. حسيت ان اللوجان (اللي كنت شايفها عربية تحفة وفاكر انها فخمة) لما ركبت الاوبترا بعدها بنص دقيقة حسيت ان اللوجان جنبها عاملة زي اللانوس !!!!
انا نفسي انبهرت ومكنتش مصدق الفخامة والاوبشنز العالية.. فتحة سقف الكترونية وفتيس 6 سرعات وزجاج فاميه... تحس انك راكب نسخة من الكروز... وب 140 ألف بس.. بس خلي بالك ان سعرها غلي من 8 ايام بعد ما كان 137.. بسبب زيادة الطلب عليها..
وزي ما اللوجان ملت الشوارع الفترة اللي فاتت هتشوف الايام الجاية الاوبترا هتعمل ايه... بدأت فعلاً تغرق الشوارع..
صدقني انا قبل ما اشوفها قلت لنفسي اكيد مش هجيبها دي صيني بس بعد ما شفتها وقعدت في اللوجان قبلها وبعدين قعدت فيها (توكيل رينو وشيفروليه لازقين في بعض في الشيخ زايد) قلت لنفسي انا هجيب العربية دي حتى لو كانت مش شيفروليه (حتى لو كانت ماركة صيني صيني ماركة جاكي شان او بينج بونج مثلاً).. بس يارب ألحق قبل ما سعرها يغلى تاني..

وبصفة عامة إلحق اشتري بسرعة لأن الأسعار غالبا هتغلى قبل نهاية رمضان..كل السيارات.. وده خبر شبه اكيد والله اعلم..

وأخيراً متنساش ان العربية اللي مناسبة لشخص ممكن متكونش مناسبة لشخص آخر (شاب غير رب أسرة..إلخ) علشان كده انصحك بالإستخارة وإستشارة آخرين..

ملحوظة أخيرة: انا فكرت أعصر نفسي واطلع 15 او 20 الف كمان (كده كده انا سالف فلوس) واشوف عربية تانية بس لقيت العربيات اللي في السعر ده برضو مش هتفرق كتير.. هتزنقني فلوس وكمان مش هتكون أعلى فئة وهيكون ناقصها أوبشنز مهمة.. فقلت ملهاش لزمة خليني في اللي على ادي ..سعرها كويس وهاي لاين فيها كل الاوبشنز..

وكمان لازم تقرأ الموضوع ده هيفيدك اوي ان شاء الله:
http://www.nilemotors.net/Nile/329150-a.html

وربنا يكتبلك اللي فيه الخير

الرد على موضوع صيني:
معظم الشركات متعددة الجنسيات (Multinationals) في العالم كله لجأت في السنين الأخيرة لفتح مصانع في الصين بهدف تقليل تكلفة التصنيع والإستفادة من توافر الأيدي العاملة الرخصية و التكنولوجيا.. بص لجيب حضرتك هتلاقي فيه موبايل سامسونج.. سامسونج مثلاً فتحت مصنع في الصين وبقت تنتج من هناك.. بس طبعاً عندهم إدارت للرقابة على الجودة Quality Control وتأكيد الجودة Quality Assurance للحفاظ على سمعة العلامة التجارية.. علشان كده كتير مننا بيشتري موبايلات سامسونج وغيرها ومبيهتمش هي مصنوعة فين وده بسبب ثقته في اسم سامسونج..

ولو جينا للحق بأه ففيه شركات صيني صرف (صيني صيني يعني مش مالتي ناشيونال) منتجاتها أفضل من الشركات العالمية المنافسة... زي شركة هواوي للموبايلات مثلاً. موبايلات وتابلت هواوي أفضل 100 مرة من سامسونج...

يعني من الآخر المشكلة مش ان المنتج صيني ولا اوروبي... المشكلة في الجودة والرقابة على الجودة والرقابة على الواردات واننا في بلد زي مصر محتاجين بجد نحط ونفعل مواصفات جودة لازم تكون في العربيات المستوردة وإلا يتم رفض دخولها البلاد (لو كانت تأثر على سلامة الركاب) اما لو فرق الجودة في أمور غير هامة او كماليات فممكن السماح بيها بهدف وجود تنوع وكل واحد يشتري اللي على اد فلوسه (طالما مش حاجة خطيرة تأثر على السلامة)

ده رأيي الشخصي في موضوع صيني ده.. بس بصراحة مكنتش مقتنع بيه اوي قبل ما اشوف الاوبترا الجديدة.. كان وجهة نظري عن الصيني ان معظمها عربيات رديئة.. لحد ما شفت الاوبترا الجديدة وحسيت بالجودة العالية والفخامة اللي بجد خليتني أعيد النظر وأتأكد ان الكويس موجود والوحش موجود.. حتى اللي مش صيني فيه منه الكويس والوحش..

انا مبقلش لحضرتك انت تشترى السينترا- انا بتكلم عن نفسى, انا لو هغير هجيب السينترا
بالنسبه لمشاكل الفتيس للسينترا, انا مقراتش حاجه عنه هنا على نايل موتورز من ناحيه انه فيه مشاكل. وكمان اعرف زميل لى فالشغل (عن قرب) معاه العربيه وعامل تقريبا 20000 كم ومبسوط جدا منها. كان معاه شارك وبيرشح السينترا عنها.
طبعا لسه معملش كم كتير عشان احكم على الفيتيس- ممكن يبوظ وممكن يعيش

كنت كتبت موضوع من فتره ولسه مقتنع بيه

http://www.nilemotors.net/Nile/445717-a.html

الموضوع دا ينطبق على كل العربيات الزيرو (صنى -لوجان -سياز- اوبترا- سينترا- توليدو- رابيد- فلوينس........................)

الف شكر لكل الناس اللي ردت و شاركتني بأرائها القيمه و بخبرتها الكبيره
انا بعد ما قرأت كل الكلام و سألت ناس كتير بره المنتدى و جواه
قررت اني ازود المبلغ اللي معايا و احاول اشتري حاجه اعلى
و انا مبدأيا بختار دلوقتي بين سيارتين هما نيسان سنترا و شيفروليه كروز
يا ريت يا جماعه تكملوا جميلكم معايا و تقولولي رأيكم في السيارتين دول و ايه الفرق بينهم و ايهما افضل
و لو حد يعرف اي حاجه عن فيتيس السنترا يا ريت يقول لي لان سمعت انه هو نفس فيتيس الجوك و القشقاي اللي عامل مشكله و بيضرب بعد عدد قليل من الكيلوميترات.
اعذروني لاني بسأل كتير لكن موضوع شراء العربيه ده موضوع مش سهل و لازم الواحد يقتنع بالعربيه اللي هيشتريها
و شكرا لسعة صدركم

المشاركة الأصلية كتبت بواسطة sameh elrefaey

الف شكر لكل الناس اللي ردت و شاركتني بأرائها القيمه و بخبرتها الكبيره
انا بعد ما قرأت كل الكلام و سألت ناس كتير بره المنتدى و جواه
قررت اني ازود المبلغ اللي معايا و احاول اشتري حاجه اعلى
و انا مبدأيا بختار دلوقتي بين سيارتين هما نيسان سنترا و شيفروليه كروز
يا ريت يا جماعه تكملوا جميلكم معايا و تقولولي رأيكم في السيارتين دول و ايه الفرق بينهم و ايهما افضل
و لو حد يعرف اي حاجه عن فيتيس السنترا يا ريت يقول لي لان سمعت انه هو نفس فيتيس الجوك و القشقاي اللي عامل مشكله و بيضرب بعد عدد قليل من الكيلوميترات.
اعذروني لاني بسأل كتير لكن موضوع شراء العربيه ده موضوع مش سهل و لازم الواحد يقتنع بالعربيه اللي هيشتريها
و شكرا لسعة صدركم

- الكروز معروف ان فيها مشكله فتيس .. ده كلام اكيد بدون اختلاف
لكن هل اتحلت المشكله فى 2017 .. الله اعلم



- السنترا
الفلوانس راكب فيها موتور و فتيس نيسان سنترا ..
الملحوظه اللى ممكن تكون موش واخد بالك منها .. فتيس الفلوانس و السنترا CVT .. و معظم الجديد برضه كده مثال الكرولا

مفيش مشاكل حتى الان فى فتيس فلوانس او سنترا

اقرأ الروابط دى
http://www.nilemotors.net/Nile/48690...post3876082175 (هنجيب حقنا من نيسان - فتيس cvt سئ السمعه)

www.nilemotors.net/Nile/489011-2013.html (توجس وحذر وطلب الرأي بخصوص فتيس القشقاي 2013)

و الرابط ده بخصوص فتيس العربيات الفرنسبه
http://www.nilemotors.net/Nile/483743-a.html (كولر الفتيس و زيت الفتيس و التوكيل ...)




- و ده رأى احد ملاك السنترا و كان معاه فلوانس قبلها

http://www.nilemotors.net/Nile/481154-a.html

المشاركة الأصلية كتبت بواسطة ROLAND

انا اشتريت فلوانس 2015 هاى لاين وقعدت معايا لحد ماعملت بيها 4 الاف كيلو وبعتها واشتريت سنترا
كلامى مش معناه خاااالص ان الفلوانس وحشة بس دى راحة شخصية وماحسيتش بيها الا لما ركبت العربية كام شهر وهانقل لك بمنتهى الأمانة تجربتى والله على ما اقول شهيد وللمرة الأخيرة ده رأيى الشخصى
الفلوانس عربية بجد حلال فيها تمنها بالمقارنة بكمية الأوبشن الموجودة فيها وانا بتكلم عن الهاى لاين 2015 وانا اشتريها وقتها بحوالى 188 تقريبا عربية شيك جدااا فخمة جداا لكن اداء انا شايفه اقل جدا من مستوى الأوبشن بمعنى حرام تكون كل الأوبشن دى موجودة والعربية ادائها وحش كده ,, العربية فعلا سحبها زفت او بالنسبة لى كنت حاسس كده يعنى انتى لو هادى فى سواقتك ورايق وهادى وبالك طويل هات الفلوانس واللى هايقول ان هى والسنترا نفس الفتيس والموتور هاحط صباعى فى عينه علشان انا ركبت العربيتين وفنيا انا معرفش ايه الفرق ولا افهمه لكن سحب السنترا مختلف تماما عن الفلوانس ودى كانت اكبر نقطة خنقتنى من الفلوانس وخليتنى افكر فى بيعها وعايز اقول نقطة تانية بكل ثقة برضه ان خامات السنترا الداخلية افضل بمراحل من خامات الفلوانس وانا بقول خامات مش شكل لأن الشكل ده ذوق شخصى وبيختلف من شخص للتانى ,,, السنترا عربية انا شايفها هايلة عيبها فى رأيى انها فقيرة جدااا اوبشن
يبقى باختصار المقارنة بين الأوبشن (فلوانس) والأداء (سنترا)
وانا تحت امرك فى اى استفسار