الموضوع: احذروا كمين بجوار مسجد السلام بمدينه نصر

السلام عليكم و رحمه الله و بركاته كل عام وانتم بخير جميعا
يوجد في الشارع اللي جنب مسجد السلام حاجه كده هي مش مطب هي كمين او مصيده للسيارات فخلو بالكو منها
انا هحكلكوا قصتي مع الكمين ده
من يومين كده كنت مروح من شغلي بالمنطقه الحره الصناعيه بمدينه نصر عملوا الطريق اجباري من بوابه المنطقه للدخول في شارع مسجد السلام الي مدينه نصر لعمل سيوله في وقت الذروه مع اني مبحبش امشى من الشارع ده لوجود به حبه نقر و في حاجه كده ازي في الطريق اسمه عين قط في الشارع امام شركه البترول اللي في الشارع ده
المهم عشان مطولش عليكم دخلت الشارع و في طريقي اذا بحفر بعرض الطريق من الناحيتين بعد انتهاء الاصلاح انا داخل مهدي جدا علشان عارف ان فيه مطب بس الجديد ان المطب اصبح غويط من كتر العربيات اللي بتعدي عليه هوب دخلت المطب رزعت في حاجه في بطن العربيه ركنت ابص علي حاجه من تحت الحمد لله ملاقيتش حاجه قولت يبقي انا خبطت في المصفحه كملت مشواري و رحت البيت و تاني يوم رحت الشغل عادي جدا مفيش حاجه و انا مروح من نفس الطريق و نفس الكمين بس اخدته المره دي بميل عجله عجله الحمد لله عديت و مفيش حاجه
المهم بدأت اسمع خبط في العربيه من تحت مع اي تزويده بنزين او فرمله قولت في نفسي ده احتمال الشكمان روحت امبارح لبتاع الشكمانات و قاللي الشكمان زي الفل كله بعيد عن جسم العربيه قولت يبقي ده يا اماشداد الموتور او قاعده الموتور او قاعده الفتيس انا كنت نسيت خالص الهبده اللي اخدتها
روحت النهاره الصبح فرنش موتورز اللي في الرحاب اعمل صيانه ال80000 و اغير التيل ال Ebc و قولت بالمره ابص علي الصوت ده طلع معايا المهندس يجرب قاللي ده شداد الموتور يا اما خلصان علي الاخر او المسمار بتاعه مهوي
رجعنا رفعنا العربيه و كشفنا لقينا شداد الموتور كويس بس القاعده اللي مربوطه فيه في الفتيس مشروخه و دي الحاجه الوحيده الي باينه من المصفحه قاللي يا اما تروح لحد يلحمها او تغير فارغه الفتيس قاللي بس لو غيرت فارغه الفتيس لازم نغير حاجات جوه الفتيس و الموضوع هيفتح هيخش في 2000 او 3000 جنيه مع العلم الفارغه هتبقي استيراد قاللي حاول تلحمه الاول
اخدت العربيه رحت لبتاع شكمانات في عين شمس قاللي لحام الومنيا لازم تفك الفتيس لانه مينفعش يتلحم من تحت لازم يبقي من فوق علشان الالومنيا هتكون سائله روحت لاكتر من واحد لغايه ما قالوللي روح لواحد اسمه محمد لطفي ده عنده جهاز لحام كهرباء ليزر المهم روحتله و لحمها الحمد لله و رجعت لفرنش موتورز و قفلت المصفحه و دي كانت حكايتي مع الكمين اللي في شارع مسجد السلام بمدينه نصر ارجوكم خدوا بالكم من المطب ده علشان ميبقاش فيه خساير اكتر من كده
المهم انا بعد ما اخدت طول النهار من الرحاب الي عين شمس الي محمد لطفي الي الرحاب مره اخري وانا مروح قولت اكلم ايمن اقوله علي اللي حاصللي قاللي ان انا لو كنت كلمته من الاول كان بعتني لمحمد لطفي علطول من ما الف
الحمد لله قدر الله و ما شاء فعل
معلش انا اسف طولت عليكم وكل عام وانتم بخير و السنه اللي جايه ان شاء الله نكون جميعا علي عرفات يا رب اكتبهلنا جميعا

الواحد يجيب نيفا روسى يمشى بيها فى مصر