ستائر الميجان عليها مخالفه؟؟؟؟؟؟؟

**tamer_samy** · 30-11-2008 02:55 AM

بالنسبه لستائر الفبريكه هل عليها مخالفه و لا ايه خلفي او ابواب
مثلا الزينون عليه مخالفه بس العربيات الحديثه نازله بزينون الفابريكه هل عليه مخالفه ؟؟؟
ولو الفابريكه مش عليه مخالفه ازاي بيعرف ان ده الفابريكه و لا متركب؟؟؟؟

**Ramy_Tantawi** · 30-11-2008 09:50 AM

للأسف الستائر عندنا في الميجان والزجاج الملون عليهم مخالفه لان مش مكتوب في الرخصه الكلام ده.....اخويا وقفوه من كام يوم في لجنة عباس العقاد واتغرم الحمد لله بسبب الستائر والزجاج الملون....... عموما الصح عشان ماحدش يتكلم معانا في الموضوع ده الرخصه يكون مكتوب فيها الكلام ده إثبات انه نازل مع العربيه مش انا اللي مركبه.

كان في موضوع احمد عبد المقصود ربنا يكرمه عمله عن الموضوع ده بس مش عارف وصل لفين مع الناس في التوكيل ان شاء الله نعرف منه تفاصيل اكتر .

**Ahmed Selim** · 30-11-2008 09:58 AM

صباح الفل يا وحوش

الموضوع ده محتاج مساعدة من الكتور أكمل ....... لأن تونى ( اللى أنا أعرفه كويس فى التوكيل بقى ماسك مدير عام ما بعد البيع فى رينو و كيا مع بعض ومبقاش فاضيلى قوى :) )
ممكن لو دكتور أكمل يعرف حد هناك يحاولنا فى الموضوع ده

و أنا برضه هحاول من سكة تانية بس مش مضمونة.

ربنا يسهل أن شاء الله

30-11-2008 03:16 PM

الأخوة الأفاضل
السلام عليكم و رحمة الله و بركاته و كل عام و حضراتكم جميعا بخير
بخصوص أى شئ في العربية فبريكة و مش مثبته في الرخصة
عن نفسي لو صادفت لجنة رئيسها فكره ضيق أخليه يعمل مخالفات عليها لغاية ما يزهق و يبعتها على الملف و أبقى ريحته نفسيا و مش حيشوف مني جنيه مصالحه لطمعه في نسبته من المخالفات.
على ميعاد الفحص لازم العربية تتفحص طبعا بمعرفة مهندس الفحص (إذا كان حاصل على بكالوريوس هندسة من أساسه) وقتها أثبت كل ما هو فابريقة (ستاير و غيرها) و أشيل المخالفات المتعلقة بها أو أقدم تظلم الذي بدوره لازم يحولها للفحص الفني لأن ده أساس شغلهم مش أنا إللي أقول لهم يعملوه

**Ahmed Selim** · 30-11-2008 07:52 PM

معلش يا دكتور أكمل:)......لسه واحد صاحبى مسحوبه رخصه عشان الزينون الأوريجينال اللى فى عربيته المازدا 3.......بس هتعمل أيه....؟

بالنسبة للستاير أنا كنت كلمت حد فى التوكيل وقالى أكلم تونى ولما قلتله أن تونى مشغول قالى ممكن أعملهالك أنت.....وفهمت منه أنه مش هيقدر يعملها للناس كلها عشان خارج نطاق سلطته.

عموماً أسأل و ربنا يقدم اللى فيه الخير أن شاء الله.

**abdoweb** · 03-12-2008 02:15 PM

مصر بقت زى الزفت
ولا أم الدنيا ولا حاجه
وبحس أن بتوع المرور بالذات محدش فيهم بيفهم أى حاجه وبحس كمان أنهم مخنوقين من أصحاب العربيات المحترمة وبينتقموا منهم
يقعد يسألك فين الرخصة وبعدين فين رخصة السواقة وبعدين اصل فى كشاف مكسور ولو مفيش كل ده يبقى هل معاك طفاية حريق
والله ربنا ينتقم من كل اللى بيرخموا على الشعب
انا عن نفسى اول رخصة اتسحبت منى ما عرفتش اجيبها تماماً وعملت بدل فاقد
وبحاول على قد ما أقدر ما اخليهاش تتسحب
وربنا يخلى لنا قانون المرور الجديد ويحيا العدل فى بلد العدل

**Amr_Moh** · 05-12-2008 04:24 PM

المشاركة الأصلية كتبت بواسطة abdoweb

مصر بقت زى الزفت
ولا أم الدنيا ولا حاجه
وبحس أن بتوع المرور بالذات محدش فيهم بيفهم أى حاجه وبحس كمان أنهم مخنوقين من أصحاب العربيات المحترمة وبينتقموا منهم
يقعد يسألك فين الرخصة وبعدين فين رخصة السواقة وبعدين اصل فى كشاف مكسور ولو مفيش كل ده يبقى هل معاك طفاية حريق
والله ربنا ينتقم من كل اللى بيرخموا على الشعب
انا عن نفسى اول رخصة اتسحبت منى ما عرفتش اجيبها تماماً وعملت بدل فاقد
وبحاول على قد ما أقدر ما اخليهاش تتسحب
وربنا يخلى لنا قانون المرور الجديد ويحيا العدل فى بلد العدل

حاجة تبكي