بشطب شقتى و بعمل المحارة حاليا و اسف لو الموضوع طويل بس دى زى مابيقولوا شقه العمر و بدفع فيها تعبى و دم قلبى فخايف اعمل حاجه تتعبنى نفسيا والله هزعل اوى بجد انا ممكن اتقهر فقولت اكلمكم و اخد شوية من خبراتكم

اولا المحار طلب منى ديبوند بيخلطة مع الاسمنت و الرمله عشان الاسقف و الحوائط بس بيحط كمية قليله لانه طلب فى الشقه كلها 5 جراكن و الجركن 900 مللى و قالى انه بيمنع الرطوبه

ثانيا قالى فيه بلاستيك بيتباع بيتحشى بيه الفراغات الموجودة مكان خراطيم الكهربا عشان دى فيما بعد ممكن لو اتمحرت على طول تعمل تشققات فى النقاشه و لو فيه مواد بتتحط على النقاشه بتمنع التشققات ايه هيا و كمان انا هجيب جوتن كمبيوتر و فيه نوع قطيفه طالع منه هعمل بيه شوية شغل فى النص

ثالثا عايز افهم انا كدة ماشى صح ولا غلط
انا عملت السباكة مواسير باننجر بس قبل العزل و كلها فى الحوائط يعنى مفيش حاجه على الارض الا الصرف و لسه معملتش عزل و الصرف معمول بمونه و اسمنت يعنى متغطى فهل اعمل عزل حواليها بالبيتومين على الارض لان الى تحت ده اخويا فلازم برضه مضرهوش و هل اجى عند باب الحمام و اعمل حرف مونه طوله 10 سنتى عشان لو لاقدر الله حصل تسريب ميسرحش فى باقى الشقه ؟

رابعا برضه سباكة
قولت للسباك متعملش بلاعة فى المطبخ على اساس انه هيعمل الصرف بيرمى فى بلاعة الحمام و عملى صرف الغساله فى المطبخ بيرمى على البلاعة لان الاتنين بيفصلهم حائط واحد
لان فيه ناس قالت انه لو بيرمى على الصرف العمومى على طول بيعمل ريحة وحشة فى الحوض و ممكن يطلع حشرات من الحوض نفسه و انا ساكن فى الدور قبل الاخير
ادامى 3 حلول
الاول اتوكل على الله و خلاص عادى و اشتغل كدة
التانى اخليه يعدل كل دة و يخلى صرف حوض المطبخ بيرمى مع صرف الغساله فى بلاعة الحمام
التالت اخلى خرطوم صرف الغساله مكان الحوض بيرمى على العمومى لو مش هيأثر عليها ولا ممكن بعملها ريحة وحشة و يدخلها حشران هو كمان ؟ و اخلى صرف الحوض مكان الغساله بيرمى على بلاعة الحمام

خامسا بالنسبه للجبسون بورد مش عارف هيبقى غالي اوى ولا لا بس عمتا هو الصاله الطول 10 متر فى 5 متر و هعمل اطار جبسون بورد بس بعرض 60 سنتى فى الاركان بتتحسب ازاى يعنى بالطريقة دى ؟
10 متر فى 60 سنتى = 6 متر
5 متر فى 60 سنتى = 3 متر
يعنى 9 متر × 2 للمربع = 18 متر بس ؟
و لو المتر ب100 جنيه هيبقى كل ده ب1800 جنيه
ولا فيه طرق تانيه للحساب ؟
طيب لو غالي اوى ايه البديل بتاعه و يكون نفس الشكل و فيه نور و سبوتات يعنى الكرانيش ولا المصيص ولا الفيوتيك و كلهم معرفش عنهم حاجه على فكرة

لو فيه جديد هعيش معاكم هنا تانى