الموضوع: العمل في امريكا أفضل ولا الاكمال في دراسة الطب في بريطانيا ؟

أنا متفائل بالكلام دا .. ولكن الميول لرأي لا يكفي ..
الخطوة الحقيقية المبشرة لما تاخدي قرار نهائي
بس لو قررتي .. متلغيش البعثة دلوقتي .. إلغيها في بريطانيا ..
عشان تقدري تسافري
فتوفيرًا للوقت خلي البعثة عادي جدًا ..
إلغيها بعد ماتضمني الهجرة

و إسمعي نصيحتي وهتوفري على نفسك جهد ووقت كبير
( أنا لو مكانك هعمل كدا )
المصدر المضمون هوا المحامي يسهل عليكِ الإجراءات
أفضل من إنك تضيعي وقت كبير في البحث

الوظيفة في العقد في مجالك ولكن المهمة متعبة على المرتب القليل ..
أنا شايف إن الهجرة أفضل

الموضوع محتاج تخطيط كويس بس المحامي هيجبلك من الآخر

المحامي عشان يسهل عليكِ ويرشدك لكن مفيش قانون يلزمك ..
فـ لاء مش لازم حد يمثلك .. لا كندا ولا استراليا
بس المحامي ضروري .. أنا عن نفسي بدي كل شيء للمختص فيه .. دا أدق
وتكلفته ( من 5 إلى 7 آلاف دولار أمريكي ) المحترف أقل من كدا متضمنيش الكفاءة وممكن أقل شوية لو شركة جديدة
( أنا سألت عن أسعار محامين كندا قبل كدا ومفتكرش استراليا أقل )
باقي التكاليف ( رسوم فيزا + ورق + تذاكر + سكن + تأمني نفسك بمصاريف لحد ماتلاقي شغل .. إلخ )
متقلقيش من أي تكلفة ( مهما وصلت ) لحد ماتهاجري و تستقري في سكن وتحصلي على وظيفة ملائمة
أنا متكفل بالموضوع من الألف للياء ..
في حالة فضلتي المحامي سيبي مهمة إختيار محامي والتعامل معاه عليا
وياستي لما تهاجري وربنا يوفقك في وظيفة مناسبة إبقي رجعي المبلغ على مهلك
( هكلمك عن نفسي أنا استلفت من أقرب حد ممكن يسلفني وسددت بعدين للي سلفني أو لأولاده لو توفى
يعني أخدت مدة طويلة لحد ماتمكنت من السداد ...)
أي حد بيجي عليه وقت ويمر بظروف وبيستلف .. ولما يرد دينه أو صاحب الدين يتسامح محدش له عنده حاجة ..
اللي استلفت منهم بعد ردي للدين .. شكرتهم برسائل إيميل ومشفتهمش لا أثناء ردي للدين ولا بعد ردي للدين .
وطبعًا لن يكن هناك أي شيء مكتوب أنتِ لستِ ملزمة على السداد ولن تكوني مدينة بشيء أساسًا .. لكن ليطمئن قلبك
بخصوص سؤال ضامن الهجرة
فمفيش حاجة مضمونة في الحياة .. لا أحد يستطيع أن يضمن لك إلا ماتحت يديه
والمحامي لو واثق 100% إن كل شيء سليم بيقولك إن إحنا عملنا اللي علينا وهتقبل بنسبة كبيرة
ولكن لا يؤكد ولا يضمن ولو وعد بالقبول يبقى مش محترف وتقلقي منه
وجوابًا على سؤال التكلفة مستردة أو لاء في حالة عدم القبول
من خبرتي في الأمور دي التكاليف كلها غير مستردة في حالة الرفض سواء محامي أو غيره
أساسًا لو حد قالك مستردة يبقى شيء غريب عن المعتاد
( وفي حالة الرفض ولم تستفيدي من الهجرة يبقى أنا مدين لك بإعتذار )
إذًا أرجو أن لا تشغلي نفسك بموضوع التكاليف نهائيًا وتوجهي كل تفكيرك على الهجرة

المشاركة الأصلية كتبت بواسطة إنسانة

مش عارفة اقولك ايه كلمة شكر لا تكفي اخجلني كرمك

وانا بحثت ولكن الموضوع محتاج وقت كبير في البحث وانا احتاج فقط طرف الخيط وانا هكمل واشوف امكانياتي واقرر بناء عليها

ولكن مش عايزة احملك تكلفة واحمل نفسي فوق طاقتها وخاصةانه كما اوضحت في ردك ان الموضوع في النهاية ممكن يترفض ومش مضمون واناا عندي البعثة والعقد يعني مش في حالة اضطرارية على الاقل الان

فخلاص بلاش محامي لان المبلغ كبير واذا فيه امكانية اني انا انجز الامر بنفسي فبلاش هذه التكلفة لاني لا اعلم عن بكرا فيه ايه

فشكرا ليك بجد مش عايزة اكلف عليك ولا على نفسي امر بامكاني انجاز جزء مكلف منه خاصة فيما يتعلق بالمصاريف المتعلقة بالمحامي

ولكن ابدا منين كندا واستراليا هل اكلم السفارة او اتواصل مع مين في الدول دي

لا شكر على واجب .. أنا عايز أسهل عليكِ
وحتى لا يبقى لكِ عذر
كل اللي محتاجاه خطوة شجاعة وقرار جريء .. لا تخافي من شيء

إختصارًا للوقت لازم محامي دي نصيحتي .. والتكاليف مش كبيرة زي مابتتصوري
ولكن اللي يريحك ..

نبدأ بإستراليا .. لو كلمتي السفارة هتبعتلك لينك لموقع الهجرة
اللينك دا هوا بوابتك للهجرة لإستراليا ( حاولي تاخدي فكرة عامة )
Australian Government Department of Immigration and Border Protection

هتصفح الموقع وكتب عن اللي اشوفه مفيد

Skilled Independent visa (subclass 189)

الشغل كله اللي يخصك على الفيزا دي
بتسمحلك بالإقامة الدائمة تشتغلي وتدرسي إلخ
لازم وظيفتك تكون في قائمة الوظائف
ولازم تكوني حصلتي على نتيجة إيجابية من جهة التقييم
لازم تكوني حصلتي على النقاط المطلوبة ..
شوفي اللينك

اللينك دا الوظائف المطلوبة , جهات التقييم , كود الوظيفة

Skilled Occupations List (SOL)

هتلاقي تخصصك ( المسمى الوظيفي ) أمامه موقع جهة التقييم .. إضغطي اللينك
هيفتحلك الموقع و تواصلي مع جهة التقييم الخاصة بتخصصك عن طريق Contact us
وهتعرفي كل المطلوب من الجهة نفسها مباشرة

و يفضل تشوفي Assessment for Migration
عشان تعرفي بالظبط المطلوب ولما تبعتيلهم تبعتيلهم استفسارات محددة

لاحظي جهة تقييمك محددة score 8 في (Speaking and Listening) وإنتِ 7 يعني لازم تشدي حيلك أكتر

نقطة مهمة لازم تعرفيها ... إن الهجرة مرتبطة بشكل أساسي بجهة التقييم
إدارة الهجرة لازم تشوف إنك مؤهلة في نظر جهة التقييم
يعني دي النقطة الأساسية والمحور الرئيسي اللي لازم تجتازيه

عايز أوضح نقطة مهمة
المعلومات اللي بكتبها دي مجرد إجتهاد مني
مرجعتش لأي حد مختص فيها ..
كل اللي بعمله إني بتتبع اللي بظن أنه ممكن يدلك على شيء مفيد في موقع الهجرة
فلا تثقي فيها ثقة عمياء وتصفحي الموقع بنفسك .. إحتمال الخطأ وارد ..