انقذونى مشكله فى فيات 128

**mohamed-87** · 15-07-2016 03:56 PM

السلام عليكم
عندى مشكله فى عربيتى فيات ١٢٨
إن جهاز الانذار كان بيعلق وبيشتغل شويه ويطفى شويه
فاروحت للكهربائى وقال ان الجهاز ده تعبان ومتهالك وعايز يتغير
وبصراحه الانذار كان عامل ليا وجع دماغ
فا قلتله فك جهاز الانذار خالص مش محتاجه
وبعدين قالي سيب العربيه علشان افك سلوك الانذار وارجعلك العربية زى الاول على نظام بلدها المنشأ يعنى
قلتله تمام
سبتها وروحت شغلى ورجعت الساعه ٥ قبل المغرب واستلمت العربية شغاله وتمام
وانا موديله العربية كل حاجه شغاله
بس وانا بستلمها قلتله هو ليه مؤشر العدادات فى الطابلوه معدش بيلعب أو بيرقص زى الاول رغم انه كان شغال كويس
قال لي اصله كان بايظ ووصلاته كانت محتاجه تتظبط
ووجدت المؤشر تقيل فى الحركة بس شغال حراره وبنزين وسرعه
وبعد شويه لما مشيت من عنده
وجدت مؤشر عداد السرعه وقف خالص على صفر
وبعد شويه وجدت مؤشر عداد البنزين وقف خالص على صفر
وفى نفس اليوم وجدت بعد شويه
وجدت مؤشر الحرارة وقف خالص على صفر
فا دلوقتى بيقولى سيبلى العربية تانى اصل الموضوع هايطول علشان اكشفلك على عوامة البنزين وهاضطر اشيل الكنبه علشان اوصل للسلك علشان فتحه ترمبة البنزين مقفول او ملحوم عليها
دلوقتى انا مش عارف اعمل ايه
هل الكهربائى ده بوظ حاجه فى العربية
ولا هو غير أمين وفك منها حاجه
علشان عنده نفس العربية 128
ولا ايه بالظبط
علشان لما وديتهالو العدادات كانت شغاله كويس وزى الفل
وبعدين لما استلمتها منه العدادات فصلت خالص
مش عارف اعمل ايه
حسبى الله ونعم الوكيل
برجاء الإفادة
ولكم جزيل الشكر

**mohamed-87** · 15-07-2016 04:39 PM

هو مفيش حد فى المنتدى ده ولا ايه!!!!

**amr011111** · 15-07-2016 04:56 PM

متتعاملش مع الكهربائى ده تانى. وكان يكفى انه يفك الانذار فقط. والسلوك يسيبها تحت الموكيت زى ما هى. انما موضوع ارجعهالك لنظام بلدها والكلام الفاضى ده ملوش لزمه واشتغاله

**juba8** · 15-07-2016 05:28 PM

متتعاملش مع الكهربائى ده تانى

**mohamed-87** · 15-07-2016 05:35 PM

شكرا جزيلا لك استاذ عمرو
هاشوف كهربائى غيره
واتمنى مايكونش بوظ العدادات
بعد اذنك هو الموضوع ممكن يكون كبير ولا ايه؟؟

**mohamed-87** · 15-07-2016 05:47 PM

يعنى الكهربائى فك حاجه أو بوظ حاجه
وهاضطر اشترى حاجه جديده
للعدادات لان المؤشر كان بيرقص اول ما أضع المفتاح فى الكونتاكت والف اول لفه
ولما اخدت العربية من عنده كان المؤشر تقيل وبعد كده فصل
المشكله ممكن تكون فى ايه؟؟؟؟

**dbabis8** · 15-07-2016 07:15 PM

اهرب

**م أحمد** · 16-07-2016 06:47 PM

كل العدادات دى بتفصل لما بيتفك التابلوه بتاع العدادات و ووراها 3 فيش تقريبا دول اللى بيوصلو الكلام دا كله

او ما فكش التابلوه بس لما جه يشيل اسلاك ووصلات جهاز الانذار ما ربطش ارضى العربية او اتلخلخ منه

كان يكفى يفك فيش جهاز الانذار و خلاص

او انت و انت بتقفل الباب من الريموت فى زرار للوضع الساكن